Talily Soa Nisorate i Marka 7:1-37
7 Nisy Fariseo naho mpampianatse lalàna boake a Jerosalema agne rezay nimbamy i Jesosy mbeo.
2 Le nitrea iareo tie nihinagne tamy ty tagnagne maloto* ty ila’e amy i mpiana i Jesosy rey.
3 (Ty anto’e, o Fariseò naho o Jiosio tsy nihinagne naho tsy nanasa tagnagne hatrake amy i kiho iareoy eo hey, satria izay ty fomban-draza iareo.
4 Naho fa boake a bezara agne ka iareo, le tsy nihinagne naho tsy nisasa hey. Maro ka ty fomban-drazagne norihe iareo, agnisa izay zao tihoe alimpotse agnate rano ao hey o kopeo, o jogio naho ty fitaovagne namboaregne tamy ty saba aloha ty hampiasagne aze.)
5 Nagnontane i Jesosy areke o Fariseò naho o mpampianatse lalànao tie: “Nagnino o mpiana’ò ie tsy magnorike fomban-drazagneo? Henhenke zao iareo mihinagne amy ty tagnagne maloto!”
6 Le hoe reke tamy iareo: “Ry mpanao soa miatreke, maregne vata’e i faminaniagne nisorate i Isaia mpaminany miomba anareo tihoey tie: ‘Am-bava’e* eo avao ty agnajà ty vahoake retoagne ahy fa ty fo iareo lavitse ahy.
7 Tsisy dika’e areke ty fanompoa iareo ahy satria lily o ndaty ro ampianare iareo.’
8 Tsy isia’areo dika’e ty lilin’Agnahare fa ndra ty fomban-drazagne ro orihe’areo.”
9 Hoe ka reke tamy iareo: “Hai’areo ty mipay fomba mba tsy hagnorihagne ty lilin’Agnahare, soa tie hagnorihagne i fomban-draza’areoy.
10 Nirehake zao ohatse ty Mosesy tie: ‘Hajao ty rae’o naho ty rene’o’, naho tihoe: ‘Ze miteratera ty rae’e ndra ty rene’e, le fagneva ty hovonoegne.’
11 Faie inareo mirehake tie: ‘Naho misy ndaty mirehake amy ty rae’e ndra ty rene’e tie: “Fa korobana (fagnomezagne natokagne ho an’Andrianagnahare ty dika o korobana zao) ze raha iaby ho nahafahako nagnampeagne anareo”’,
12 le tsy mampagnino anareo ndra tie tsy manao raha mba hagnampeagne an-drae’e ndra an-drene’e sasa aza i ndatỳ.
13 Tsy isia’areo dika’e areke ty saontsin’Andrianagnahare fa ndra i fomban-drazagne niforogne’areoy ro lahibey ama’areo. Maro ka ty raha mitovy amy izay atao’areo.”
14 Le nitokave’e mbama’e mbeo i vahoakey sady hoe reke: “Tsanogno’areo raho, le fantaro’areo ty dika ty raha horehafeko toy.
15 Tsy ty raha azily o ndatio am-bava’e eo ro mandoto aze, fa ty raha miakatse boake ama’e ao.”
16 ——
17 Naho fa niala tamy i vahoake rey eo ty Jesosy, le nizilike tamy ze tragno zay ao reke naho i mpiana’e rey. Le nagnontenea iareo aze ty dika i fagnoharagne nirehafe’ey.
18 Le hoe reke tamy iareo: “Ndra inareo ka vao tsy mahazo ty raha hoe irey? Tsy fanta’areo vao fa tsy mandoto o ndatio ty raha azili’e am-bava’e eo?
19 Ty anto’e, ty raha mizilike am-bava’e eo, le tsy mizilike am-po’e agne, fa mandeha amy i vavonỳ agne, le amy ty fara’e, miakatse amy i fagnariagne malotoy agne.” Te hirehake ty Jesosy tie malio ze kila hanegne.
20 Hoe ka reke: “Ze raha miakatse boake amo o ndatio ao ro mandoto aze.
21 Ty anto’e, boake am-po o ndatio ao ty eretsere-draty retoa: Fijangajangagne, halatse, vonoagne ndaty,
22 fagnitsakitsaham-baly, fagniriagne tsy mete afa-po, fanoagne raha raty, findesam-batagne baranahigne, fagniriagne fanagna o ndaty, fanivetiveagne, fagnambonean-tegna naho fanoagne raha tsy mete.
23 Boake am-po o ndatio ao o raha raty rehoe iaby, le ireo ro mandoto aze.”
24 Niala ty eo reke, le nandeha amy ty faritse a Tiro naho a Sidona agne. Le nizilike tamy ze tragno raike zay ao reke, satria tsy nitea’e hofanta o ndatio tie niavy reke, faie le mbe nisy nahafantatse avao.
25 Naho vaho niavy ao reke, le naharey ty miomba aze ze ampela nisy demonia ty anak’ampela’e zay, le nandeha mbama’e mbeo sady niankohoke tan-tombo’e eo.
26 Grike o ampela iohoe faie nitoboke ta Fenisia a Siria agne. Nihalale mafe tamy i Jesosy reke mba handroake i demonia tamy i anak’ampela’eỳ.
27 Faie hoe ty Jesosy tama’e: “Engao hey o ajajao hihinagne amparake ty ivontsigna’e,* satria tsy mete naho alaegne i mofo’ey, le atorake amo o anak’amboao eo.”
28 Faie hoe ty navale i ampelay aze: “Maregne zay aba, faie ndra o anak’amboao anio mihinagne ty pote mofo mipoke boake amy ty latabatse ihinana o ajajao ey.”
29 Naho fa naharey izay ty Jesosy, le hoe reke tamy i ampelay: “Noho ze reha’o zay, le akia rehe mandehana, satria fa niala tamy i anak’ampela’oy i demoniay.”
30 Nandeha noly an-tragno’e agne areke i ampelay, le nitrea’e nandre am-pandreagne eo i anak’ampela’ey sady fa niala tama’e i demoniay.
31 Naho fa niala boake a Tiro tao ty Jesosy, le nandalo a Sidona agne, avy eo ta Dekapolisy, le tamy ty fara’e reke niavy tamy ty Ria i Galelia agne.
32 Nisy lahilahy karegnegne sady tsy nahay nirehake zay nente o ndatio tama’e teo. Le nihalale tamy i Jesosy iareo mba hametra-tagnagne ama’e.
33 Le nente’e niala i vahoakey i lahilahỳ. Ie naho fa niavy tamy ty toeragne tsy misy ndaty iareo, le nazily i Jesosy an-tsofy i lahilahỳ ao ty rambotagna’e. Nandrora reke naho fa niavy eo sady nitsapae’e ty lela i lahilahỳ.
34 Tafara izay, le niandrandra i lagnitsey ty Jesosy sady nifoaigne, le nirehake tamy i lahilahỳ tihoe: “Efata!” “Misokafa” ty dika o rehake iohoe.
35 Eo naho eo avao le avy le nipagnake ty sofy i lahilahỳ, sady nibalake ka i lela’ey, le nanjare nahay nirehake soa reke.
36 Rinara i Jesosy o ndatio mba tsy hirehadrehake ty miomba i rahay, faie arakarake ty nandrara’e iareo ty vao mainke nitseiza iareo aze.
37 Tena nigaga iareo, le nirehake tihoe: “Fanjaka iaby ze raha natao’e. Aia le vita’e iaby ndra ty mampaharey o karegnegneo naho ty mampirehake o moagneo!”
Fagnamarehagne ambane peje
^ Tsy maloto ara-bakiteny ty teagne horehafegne, fa tsy malio arake ty fombafomba o Jiosio.
^ Abt: “An-tsogni’e eo.”
^ Ndra: “ivokia’e.”
