Anak’ajalahy tea nagnampe ndaty ty Timoty. Nandeha tamy ty tane maro reke hanao izay. Nisoa ty fiaigna’e. Teà’o ho fantatse vao ty tantara’e?...

Nibey tamy ty tane atao tihoeke Lystra ty Timoty. Mbe nikede reke, le fa nampianaregne ty miomba i Jehovah. I Loisa raza’e ampela naho i Eonika rene’e ty nampianatse aze. Te hagnanatse o ndatio ty miomba i Jehovah reke naho fa nibey.

Naho fa nibeibey ty Timoty, le nitaone i Paoly hagnambara ty miomba i Jehovah amy ty tanàgne maro. Nagneke ty Timoty fa te hagnampe ndaty.

Niharo lia tamy i Paoly mba Tesalonika mbeo ty Timoty. Tanàgne a Makedonia agne o Tesalonika zao. Nandeha tomboke tamy ty lalagne lavitse iareo vaho izay nandeha sambo. Nagnampe ndaty maro hianatse ty miomba i Jehovah iareo naho fa niavy agne. Faie ndra niboseke tamy iareo ty ndaty ila’e, le niteà’e ho vinono iareo. Hafara iareo nisintake ty ao, le nagnambara tamy ty tanàgne hafa.

Nampiherègne i Paoly a Tesalonika agne ty Timoty tafara izay hitilike ze rahalahy tagne. Nampatahotse ty niheregne mbeo fa nahavany loza ty ndaty tamo o tanàgne iohoeke ao. Faie le nandeha avao ty Timoty fa te hahafantatse ty raha nahazo ze rahalahy tao. Naho fa niheregne mbamy i Paoly mbeo reke, le nirehake tie tsy magnahy ty rahalahy a Tesalonike agne fa manompo i Jehovah avao.

Niharo asa tamy i Paoly ty Timoty tagnate ty taogne maro. Nanoratse miomba aze ty Paoly fa tsy misy ndaty soa fagnahy hoe’e hirahegne hagnampe fiangonagne. Tea i Jehovah naho tea ndaty ty Timoty.

Inogne ty raha soa nanoe i Timoty toko’e hianara’o?... Ho soa ty fiaigna’o naho tea ndaty sady magnampe iareo hahafantatse ty miomba i Jehovah rehe.