LESOGNE 01
Akore ty Agnampea ty Baiboly Azo?
Maro ty ndaty te hahafantatse ty anto’e namorognagne antikagne, ty mahavy antikagne mijale, mate naho ty raha hiseho amy ty hoavy. Mampinekoneko antikagne ka ty hahazoagne ze raha paliaegne isan’andro naho ty hahasambatse ty keleiagne. Maro ty ndaty mahatsapa fa mamale o fagnonteneagne lahibey reo ty Baiboly sady magnomey torohevetse amy ty fiaignagne andavanandro ka. Akore ty heve’o, afake magnampe o ndatio vao ty Baiboly?
1. Inogne iaby ty fagnonteneagne valea ty Baiboly?
Mamale ty fagnonteneagne lahibey retoa ty Baiboly: Nisy namorogne vao ze kila raha? Ino ty anto’e namorognagne o ndatio? Nagnino ro mijale iaby ndra ty ndaty soa fagnahy aza? Mbaia o ndatio naho fa mate? Nagnino ro mbe misy avao ty aly ndra tie fa mikezake hampisy filaminagne o ndatio? Ho poteke vao ty tane toy amy ty hoavy? Maro ty ndaty fa nahatrea ty vale o fagnonteneagne reo agnate Baiboly ao. Risihe ty Baiboly ka rehe mba hipay ty vale o fagnonteneagne rehoe.
2. Akore ty agnampea ty Baiboly antikagne mba ho fale amy ty fiaignagne?
Magnomey torohevetse mahasoa antikagne ty Baiboly. Agnisa izay ohatse ty hahasambatse o keleiagneo. Ty toko’e hatao naho fa mivali-doha, naho ty hahavy antikagne ho tea miasa. Naho fa mitohy ty fianara’o ty boke toy, le ho hai’o ty miomba o torohevetse rehoe. Ho tsapa’o amy izay fa ‘mahasoa vata’e ty Soratse Masigne [ndra ze raha agnate Baiboly ao] iaby.’—2 Timoty 3:16.
Tsy mahasolo o Baibolio aloha ty boke toy, faie handrisike azo mba handineke o Baibolio. Risihe’ay areke rehe mba hamaky ze andinin-teny atoagne sady ampitahao amy ze lesogne ianara’o.
ANDAO HANDINEKE TY PITSOPITSO’E
Hodinehentikagne ato ty fomba nagnampea o Baibolio o ndatio. Ty toko’e hatao’o mba hahavy azo ho tea mamaky aze. Ty mahasoa aze naho misy ndaty hafa magnampe azo mba hahazo ty raha rehafe’e.
3. Afake mitari-dalagne antikagne o Baibolio
Ampitoviegne amy ty jiro o Baibolio. Afake magnampe antikagne handrambe fanapahan-kevetse soa reke sady mampahafantatse miomba ty raha hiseho amy ty hoavy.
Vakio ty Salamo 119:105, sady iharò midineke ty fagnonteneagne retoa:
-
Akore ty fihevera i mpanoratse salamoy o Baibolio?
-
Akore ka ty fihevera’o aze?
4. Afake mamale ty fagnonteneantikagne o Baibolio
Nitrea ty ampela raike toy agnate Baiboly ao ty vale ty fagnonteneagne nanahiragne aze fa ela. Alefaso i VIDEO oy, sady iharò midineke ty fagnonteneagne retoa.
-
Inogne iaby ty fagnontenea i ampela tamy i video teoy?
-
Nagnino ty fianara’e Baiboly ro nagnampe aze?
Mandrisike antikagne hagnontane o Baibolio. Vakio ty Matio 7:7, sady iharò midineke ty fagnonteneagne toy:
-
Inogne iaby ty fagnonteneagne manahiragne azo, le tea’o ho trea amy Baiboly ao ty vale’e?
5. Fanjaka ty mamaky Baiboly
Maro ty ndaty tea mamaky Baiboly sady mandrambe soa boake amy izay. Alefaso i VIDEO oy, sady iharò midineke ty fagnonteneagne retoa.
-
Akore ty fihevera i tanora tamy i video teo rey tihoe mamaky teny?
-
Faie nagnino iareo ro tea mamaky Baiboly?
Mampionogne naho magnomey fanantenagne antikagne ty raha rehafegne amy Baiboly ao. Vakio ty Romanina 15:4, sady iharò midineke ty fagnonteneagne toy:
-
Ino ty tsapa’o naho fa fanta’o tie afake mampionogne naho magnomey fanantenagne azo ty Baiboly?
6. Afake magnampe azo hahazo ty heve o Baibolio ty hafa
Maro ty ndaty mahatsapa fa tsy ampe ty mamaky Baiboly irery avao, fa soa naho misy ndaty hafa magnazava aze ama’e. Vakio ty Asan’ny Apostoly 8:26-31, sady iharò midineke ty fagnonteneagne toy:
-
Akore ty hahavy azo hahazo soa ty raha rehafe ty Baiboly?—Henteo ty andine’e 30 naho 31.
Nangatake fagnampeagne tamy ty hafa i lahilahy Etiopianay mba hahazoa’e ty raha rehafe ty Soratse Masigne. Maro ka ty ndaty mahatsapa fa tena soa naho misy ndaty hafa magnazava ama’e ty raha rehafe ty Baiboly
MISY TY MIREHAKE FA: “Mandany andro ty mianatse o Baibolio.”
-
Akore ty havale’o izay? Ino ty anto’e?
FAMINTIGNAGNE
Misy torohevetse soa magnampe amy ty fiaignagne andavanandro ty amy Baiboly ao. Mamale ze fagnonteneagne mampivali-doha antikagne ka ty Baiboly, sady magnomey fampionognagne naho fanantenagne.
Fameregnagne
-
Torohevetse miomba ty ino iaby ty trea agnate Baiboly ao?
-
Ino iaby ty fagnonteneagne valea ty Baiboly?
-
Ino ty raha tea’o hianaragne agnate Baiboly ao?
FAGNAZAVAGNE FAGNAMPE’E
Misy torohevetse mahasoa antika amo o andro hinane zao ty amy Baiboly ao.
“Tsy Mete Lany Date ty Fampianara ty Baiboly” (Fitalakesan-davitse Nim. 1 2018)
Ho trea’o ato ty nagnampea ty Baiboly ty lahilahy raike nivibìke nanomboke ty naha ajaja aze toy.
Misy torohevetse hoahy ty keleiagne ty amy Baiboly ao.
“Torohevetse 12 Mahasambatse ty Keleiagne” (Mifohaza! Nim. 2 2018)
Managne heve-diso miomba ty mpitondra ty tontolo toy o ndatio, faie ho trea’o ato ty maregne ampianare ty Baiboly.
Va'e ho Tea'o Ka
FAGNONTENEAGNE FAPETRA O NDATIO
Inogne ty Atao Tihoe Fianaragne Baiboly?
Afake mampiasa ze Baiboly tea’o rehe naho fa mianatse Baiboly amy ty Vavolombelo i Jehovah. Maimaimpoagne i fianaragney sady afake taone’o hiarake hianatse ama’o ka ty keleia’o ndra ty ragne’o.
