Nanafike o Israelio avao ty Beni-hadada mpanjaka i Syria. Isake ty hanafike iareo, le fa nirehafe i Elisa mialoha ty mpanjaka o Israelio, tsy ho tratse ao. Ndra i Elisa amy izay ty teà’e hotsepahegne. Fanta’e tie ta Dotana ao ty Elisa, le nagnirake maramila tagne reke.

Niavy halegne ta Dotana ao amy izay o Syrianao. Naho fa nifoha i mpiasa i Elisa rey, le nahatrea maramila syriana maro bey nagnodidigne i tanàgney. Natahotse iareo, le nitoka i Elisa tie: ‘Akore ty hataontika?’ Hoe ty Elisa: ‘Maro mandikoatse iareo ty magnampe antika.’ Nampahatreave i Jehovah i mpanompo i Elisa rey tie feno sovala naho galesa afo maro, ty vohitse magnodidigne i tanàgney.

Naho fa ho nitsepake i Elisa i maramila syriana rey, le nivavake reke tie: ‘O Jehovah, anò goa iareo.’ Tsy hoe nanjare goa iareo fa ty toeragne nisy iareo ro tsy nihai’e. Le hoe ty Elisa tamy iareo: ‘Tsy itoy ty lalagne toko’e ho nomba’areo. Oriho raho fa hatoroko anareo ty  ndaty paia’areo.’ Nagnorike i Elisa hatrake a Samaria agne iareo, amy ty tane nipetraha i mpanjaka Israelỳ.

Fanta i Syriana rey amy izay tie aia iareo faie fa tara loatse. Hoe ty mpanjaka Israely tamy i Elisa tie: ‘Vonoeko n’ireo?’ Te hamale fate iareo vao ty Elisa? Hoe reke: ‘Ko vonoegne iareo fa omeo hanegne, le ampolio.’ Nanoa i mpanjakay fete amy izay iareo. Ie iareo nivontsigne vaho nampolie’e.