LESOGNE 6
Mbe ho Velogne Indraike vao o Longontikagne fa Nimateo?
1. Inogne ty talily soa hoahy ze nimate longo?
Nitaitse ty fate i Lazarosy nama’e ta Betania agne ty Jesosy. Marine i Jerosalema o tanàgne iohoe. Fa efatse andro ty nimateza i Lazarosy vaho izay niavy ty Jesosy. Nimbamy i kiborỳ mbeo iareo amy i Marta naho i Maria, rahavave i Lazarosy. Tsielatsiela avao, le nifeno ndaty ty teo. Tafara izay, le nivelome i Jesosy ty Lazarosy. Akore hoe rehe ty nihafalea i Marta naho i Maria tamy izay?—Vakio Jaona 11:21-24, 38-44.
Fa nifanta i Marta i talily soa manao tihoey tie mbe hamelogne ty mate ty Jehovah, sady hiaigne nainai’e an-tane etoy indraike iareo.—Vakio Joba 14:14, 15.
2. Manao akore o ndatio naho fa mate?
Hoe ty Andrianagnahare tamy i Adama: “Lemboke rehe le hiheregne ho lemboke indraike.”—GENESISY 3:19.
Lemboke ty namboaragne o ndatio. (Genesisy 2:7; 3:19) Naho fa mate i vatagney, le tsy misy fagnahy mirererere sasa. Naho fa mate tikagne, le mate ka ty betrontikagne sady tsy afake mieretseretse sasa. Tsy nitalily ty raha nanjò aze tamy ie nimatey ty Lazarosy, satria tsy misy raha fanta’e ty mate.—Vakio Salamo 146:4; Mpitoriteny 9:5, 6, 10.
Maregne vao tie mampijale ndaty agn’afobey agne ty Andrianagnahare? Tsy maregne zay, fa tsy misy raha rei’e ty mate. Magnaratiraty an’Andrianagnahare ze ndaty mampianatse miomba ty afobey. Ndra ty mieretseretse tihoe hagnoro ndaty agnate afo avao, le fa mampangorigne Aze.—Vakio Jeremia 7:31.
Henteo ty video Manao Akore o Ndatio Naho fa Mate?
3. Mbe afake mirehake amantikagne vao o ndaty mateo?
Tsy afake. Tsy misy raha rei’e sasa ty mate. (Salamo 115:17) Faie misy anjely raty fagnahy miseho amo o ndatio, misandoke o ndaty fa nimateo. (2 Petera 2:4) Rarà i Jehovah tikagne tsy hipay fomba hirehafagne amy ty mate.—Vakio Deoteronomia 18:10, 11.
4. Ia iaby ty hovelomegne amy ty mate?
Ndaty an-tapetrisa’e ty hovelomegne, le hiaigne an-tane etoy indraike. Agnisa izay ze nanao raty faie mbe tsy nahafantatse ty miomba i Jehovah.—Vakio Lioka 23:43; Asan’ny Apostoly 24:15.
Hampianaregne ty maregne miomba an’Andrianagnahare ty ndaty hovelomegne indraike, sady afake mijobogne ty hino i Jesosy naho hankatò aze. (Apokalypsy 20:11-13) Ho velogne nainai’e an-tane etoy iareo naho manao ty soa.—Vakio Jaona 5:28, 29.
5. Inogne ty toetse i Jehovah treantikagne boake amy izay?
Soa fagnahy sady tea antikagne vata’e ty Jehovah, kanao nagnomey i Ana’ey ho mate ho antikagne. Tsy ho nisy ty famelomagne ty mate, naho tsy nahafoe ty fiai’e ho antikagne ty Jesosy. Naho fa hovelomegne areke o ndaty nimateo, ia ty tea’o ho trea indraike?—Vakio Jaona 3:16; Romanina 6:23.
