LESOGNE 8
Nagnino o Fijaleagneo Engan’Andrianagnahare Hisio?
1. Ombiagne ty nanomboha o haratiagneo tan-tane etoy?
Nengan’Andrianagnahare hagnandragne fitondragne isan- karaza’e o ndatio, faie trea tie tsy vita iareo ty magnafoagne ze raha manahiragne an-tane etoy
Nanomboke nisy haratiagne tan-tane etoy naho fa namitake i Eva ty Satana. Anjely soa reke tamy ty voaloha’e, faie “tsy nipiteke tamy ty maregne.” (Jaona 8:44) Nagniry ty hotompoegne reke, ie amy izao Andrianagnahare raike avao ty toko’e hivavahagne. Navande ty Satana hitaonagne i Eva tsy hankatò an’Andrianagnahare. Tsy nankatò ka ty Adama, le nanjare nisy ty fijaleagne naho ty fate.—Vakio Genesisy 3:1-6, 19.
I Jehovah raike avao ty managne zo hitondra ze kila raha iaby. Faie niliere i Satana zay. Naho ty maregne, naho fa namitake i Eva reke, le o ndatio naho o anjelio ty tea’e hotaonegne. Nagnorike aze vata’e ty ankamaroa o ndatio. Izay ty anoagne i Satana tihoe “i mpitondra ty tontolo toỳ.”—Vakio Jaona 14:30; 1 Jaona 5:19.
2. Nisy tsiko’e vao ty raha namboaren’Andrianagnahare?
Voririke iaby ze raha namboaren’Andrianagnahare. Afake mankatò aze soa areke ty ndaty naho ty anjely. (Deoteronomia 32:4, 5) Faie tsy mamoresé antikagne reke. Ampijobogne’e antikagne ze teantikagne hatao, ndra hanao ty soa tikagne ndra hanao ty raty. Hijobogne ty hankatò aze tikagne, naho tea aze.—Vakio Jakoba 1:13-15; 1 Jaona 5:3.
3. Nagnino o fijaleagneo ie mbe tsy afahan’Andrianagnahareo?
Mbe mandefetse amy ze ndaty tsy magneke ty zo’e hitondra ty Jehovah hatrake amy izao. Nenga’e hagnandragne fitondragne isan-karaza’e o ndatio, amy izay mibaribary ty loza voka ty fandieragne ty fahefà’e. (Mpitoriteny 7:29; 8:9) Tagnate ze 6000 taogne lasa zay, le voaporofo fa tsy vita ty fitondrà o ndatio ty magnafake ty aly, ty fifamonovonoagne, ty aretegne naho ty tsy rare’e.—Vakio Jeremia 10:23; Romanina 9:17.
Mahasoa vata’e ty fagnekeagne ty fahefà i Jehovah. (Isaia 48:17, 18) Fa marine ty hagnafaha i Jehovah ty fanjakà o ndatio. Ze magneke ty fahefà’e avao ro ho velogne an-tane etoy. —Isaia 11:9; Vakio Daniela 2:44.
Henteo ty video Nagnino o Fijaleagneo Engàn’Andrianagnahare Hisio?
4. Inogne ty toko’e hoporofoe’o?
Nirehake ty Satana fa nao tsy misy ndaty ho tea an’Andrianagnahare vata’e. Nao tombotsoa avao ty mahavy ty ndaty raike hanompo aze. Tea’o hoporofoegne vao tie tsy maregne zay? Atorò amy ty fomba fiaigna’o areke fa i fitondràn’Andrianagnaharey ro tea’o.—Vakio Joba 1:8-12; Ohabolana 27:11.
5. Inogne areke ty toko’e hatao’o?
Trea amy ty fomba fiaigna’o vao tie mifily ty fitondràn’Andrianagnahare rehe?
Ty fivavahagne magnorike soa ze raha rehafe ty Baiboly ro oriho, fa io ty fivavahagne maregne. (Jaona 4:23) Naho tsy te ho ambane ty fahefà i Satana rehe, le manahafa i Jesosy sady ko manao polotike naho ko mialy.—Vakio Jaona 17:14.
Fitahe i Satana hanao raty sady haloto findesan-tegna o ndatio. Naho fa tsy manao o raha rehoe rehe, le va’e hisy amy ty longo’o ndra ty nama’o ho boseke ama’o ndra hikizake azo. (1 Petera 4:3, 4) Mbe hankatò ty lalà i Jehovah vao rehe, le ty ndaty tea aze ro hatao’o namagne? Anjara’o ty misafily! Naho soa ty safili’o, le hoporofoe’o fa mpavande ty Satana. Ty anto’e, nirehake reke fa tsy hisy ndaty hankatò an’Andrianagnahare naho fa miatreke raha sarotse.—Vakio 1 Korintianina 6:9, 10; 15:33.
Azo antoke fa hagnafoagne o fijaleagneo ty Andrianagnahare, satria tea’e o ndatio. Ho velogne nainai’e rehe naho mino izay sady manoro amy ty fiaigna’o fa ty fitondràn’Andrianagnahare ro fara’e soa.—Vakio Jaona 3:16.
