Tsy mpisorogne ty Levita ila’e faie nimaro ty andraiky iareo. Niambegne i tempolỳ ohatse iareo, sady manahake ty asa atao o polisio ty raha natao iareo tamy izay. Nisy sefo nikomandy aze o mpiambegne rehoe. Nisy jiosy raike mpanoratse atao tihoe Philon zay nagnazava ty asa o mpiambegne reo. Hoe reke: “Nampitsanganegne tamy ty vavahady izilihagne tamy i tempolỳ tao ty ila’e amo o [Levitao] mba hiambegne aze. Ty ila’e tamy i kiririsa i tempolỳ ao, taloha i toeragne masigney eo mba hisakagne ze ndaty tsy nahazo alalagne hizilike ao, ndra satrie i ndaty rey zay ndra tsy satrie iareo. Ty ila’e amy iareo nandehandeha nagnodidigne i tempolỳ mba hagnara-maso ze raha miseho ao. Nifandimbe nanao izay avao iareo ndra atoandro ndra halegne.”

Afake nikomandy o mpiambegne rehoe ty Fitsaragne Ambone Jiosy. O Jiosy mpiambegne rehoe avao ka ty nengà o Romanao hinday mesa bey.

Hoe ty manam-pahaiagne atao tihoe Joachim Jeremias: “Naho fa nitsepahegne ty Jesosy, le nagnontane i ndaty nitsepake aze rey reke tie, ‘Nagnino tsy tamy izaho nampianatse tamy i Tempoly taoy ro nitsepahe’areo?’ (Mat. 26.55) Azo antoke fa tsy ho nagnontane iareo izay ty Jesosy naho tsy agnisa ty mpiambegne i tempolỳ o ndaty rehoe.” Nino areke o manam-pahaiagne iohoe fa mpiambegne i tempolỳ ka o ndaty nirahegne hitsepake i Jesosy taloha izaỳ. (Jaona 7:32, 45, 46) Tafara tatoy, le nirahegne hitsepake i mpiana i Jesosy rey naho hinday iareo amo o Fitsaragne Ambone Jiosio agne o mpiambegne tempolio naho ty sefo iareo. Azo inoagne ka fa iareo o nitaritarike i apostoly Paoly hiakatse i tempolỳ io.—Asa. 4:1-3; 5:17-27; 21:27-30.