Faminaniagne 3. Aretegne

“Hisy aretegne manjamagne.”​—Lioka 21:11.

● Mpikarakara fahasalamam-bahoake tamy ty tane raike feno aly an-tragno Afrika agne ty Bonzali. Nikezake mafe reke nitsabo ze mpihaly safira voa ty virisy Marburg. * Nangatake fagnampeagne tamy ty manam-pahefagne amy ty rovabey raike reke, faie tsy nisy nipaoke. Efa-bolagne tafara izay vaho izay niavy i fagnampeagney, faie fa nimate ty Bonzali. Nifindrà ty arete i ndaty mpihaly safira rey reke.

MAMPISEHO INO TY RAHA MISY? Agnisa ty aretegne mahafate mpahazo o ndatio ty aretegne sempotse (agnisa izay ohatse ty pnemonia), ty aretem-pivalagnagne, ty SIDA, ty tiberkilozy, naho ty tazogne. Ndaty 10,7 tapetrisa eo ho eo ty nimate o aretegne rehoe tamy 2004, ty dika izay ndaty raike isan-tsegondra.

INO TY HEVE O NDATIO? Mitombo avao ty isa ty ndaty magneran-tane, le tsy maintsy mihamaro ty karazan’aretegne. Maro ka areke ty va’e harare.

MAREGNE VAO ZAY? Maregne fa mitombo avao ty isa ty ndaty magneran-tane, faie mihamahay mamantatse naho mifehe sady mitsabo aretegne ka o ndatio. Naho izay areke, le tsy toko’e hihegne vao o aretegneo naho ty ndaty marare? Faie ty mifanohetse amy izay ty miseho.

AKORE TY HEVE’O? Mampijale o ndatio vata’e vao o aretegneo arake ty fa nirehafe ty Baiboly?

Mampijale ndaty an-tapetrisa’e o horohoron-taneo, naho o keregneo vaho o aretegneo. Faie an-tapetrisa’e ka ty ampijale ty mpiharo tanàgne ama’e, sady ty ndaty toko’e hiaro aze avao ro mampijale ty ankamaroa’e. Dineho moa ty rehafe ty Baiboly miomba izay.

[Fagnamarehagne ambane peje]

[Hevetse Lahibey]

“Mahaferenaigne ty mahatrea ty ndaty raike hane ty liona ndra ty biby hafa. Faie mitovy amy izay avao ka naho ohatse nihe ty areten-draty rehe naho ty magnodidigne azo.”​—MICHAEL OSTERHOLM, MPANDINEKE ARETEGNE.

[Soratse Magnazava i Sarey]

© William Daniels/​Panos Pictures