Nibey ta Puerto Limón agne raho. Tanàgne misy figaràn-tsambo amy ty faritse atignana i Costa Rica atoy io. Valo zahay ty ana i baba’ay naho i rene’ay, le iraho ty fahafito. Nimate ty baba’ay tamy iraho nivalo taogne, le i rene’ay avao ty niteza anay.

Mbe nikedekede raho le fa nitea nihisa base-ball. Nizilike tamy ty ekipa tsy le mahay manao akore zay raho naho fa nibeibey. Naho fa ni-20 taogne mahery raho, le nisy lahilahy mpipay zoera mahay ty asa’e zay nitaogne ahike hihisa amy i ekipa mahay ta Nikaragoà agne zay. Faie tsy nite hitoboke agne raho, satria tsy nisalama ty reneko tamy izay le mbe nikarakara aze raho. Niliereko areke i fanasagney. Faie nisy lahilahy hafa ka nanasa ahy hihisa base-ball tamy ty zoera nasionaly i Costa Rica naho fa tafara tatoy. Mbe tsy nihisa tamy ty ekipa mahay ty zoera nijobogne iareo ho agnisa o ekipa iohoe. Nekeko i fanasagney, le nanjare agnisa ty zoera nasionaly raho nanomboke tamy 1949 hatrake tamy 1952. Fa nihisa ta Cuba naho a Meksika vaho a Nikaragoà agne zahay. Mpiambegne i faritse nanorahagne i labolỳ ty nataoko, le azo rehafegne tie nahay raho. Nisy fotoagne zahay nihisa im-17 nifanesesese, faie mbe liako naho nanao diso zao ndra indraike aza. Tena nifale ty foko naho fa naharey o sipekitao nibekobeko ty agnarako.

Faie niraty findesam-batagne ka raho. Fa nanagne sakeza raho, faie mbe nila ampela hafa ka sady ie amy izao maro ty ampela nilàko. Mpinon-toake biby ka raho. Nimamo tampegne raho tie indraike zay, le ie nimaray igne vaho nisava i hamamokoy. Tsy nitsiaroko iaby aza tie akore ty fomba niaviako tan-tragno agne. Nihisa loterỳ ka raho sady niloka naho fa nihisa domy.

Nanjare Vavolombelo i Jehovah ty reneko tagnate ze fotoagne zay. Nikezake nirehake amako ty raha ninoa’e reke, faie tsy nahatevagne ahy o Baibolio tamy izay, satria mbe nitondregne tamo o base-ball io raho. Tsy naharey keré iaby aza raho naho fa nanao antirenemà zahay. Tena tsy nisy raha niteàko mandikoatse o base-ball io, sady ty hihisa aze avao ty raha nieretsereteko.

Faie naratse bey raho tamy iraho ni-29 taogne naho fa nikezake nitsepake laboly tamy i matsy natao’ay zay. Niala tsy ho zoera tamy i ekipay ao raho naho fa nisitragne. Faie tsy tihoe lelia’e nijanogne tsy nanao base-ball sasa raho. Nanao antirenera ze ekipa tsy le mahay tan-tanàgne ama’ay eo zay raho.

Nagnatreke havoriambey vondrom-paritse anoe o Vavolombelo i Jehovah-o raho tamy 1957. Natao tamy terrain nihisà’ay base-ball i havoriambeỳ. Nandineke o Vavolombelo i Jehovah rehoe raho tamy i pilasikoy eo. Treako tie magnaja ndaty iareo, fa tsy manahake o ndaty mpagnente base-ball tea aly naho mikorakorake avao rey. Izay ty nandrisike ahy hianatse Baiboly tamo o Vavolombelo i Jehovah-o naho hagnatreke i fivoria iareo rey.

Maro ty fampianara ty Baiboly nahalatsa ahike. Nirehake ohatse ty Jesosy tie hitory ty talily soa miomba i Fanjakàn’Andrianagnaharey magneneke ty tane toy o mpiana’eo amy ty andro fara’e. (Matio 24:14) Nianarako fa tsy karamaegne ty tena Kristiana naho fa manao o asa iohoe. Ty anto’e, izao ty nirehafe i Jesosy: “Fa nahazo maimaim-poagne nareo, le magnomea maimaim-poagne.”​—Matio 10:8.

Nampitovieko tamy ze raha nianarako tamy Baiboly ao ty raha natao o Vavolombelo i Jehovah-o. Tena nahafale ty foko ty nahatrea iareo mikezake mafe mitory ty talily soa i Fanjakàn’Andrianagnaharey magneran-tane. Matarike ka iareo, sady toe izay ka ty toe-tsaigne nandilia i Jesosy mba hanagna ty Kristiana. Nagniry ty hanjare Vavolombelo i Jehovah areke raho, naho fa namaky i fanasà i Jesosy amy Marka 10:21 ao, manao tihoey tie: “Andao hagnorike ty liako.”

Elaela avao aloha raho vaho tena niova e! Fa tagnate ty taogne maro ohatse raho ty nihisa loterỳ. Nisy sifra raike zay nampisy sansy ahike, le lava io avao ty nijobogneko isan-keregnandro naho fa niloka raho. Faie nianarako tamy Baiboly ao tie tsy tean’Agnahare ze mitoky amo o “andrianagnahare ty vintagneo” naho ze tea mena. (Isaia 65:11; 1 Korintianina 6:10) Nanapa-kevetse ty tsy hiloka sasa areke raho. Nahagaga fa nahazo tamy loterỳ i sifra nampisy sansy ahikey, tamy ty lahady voaloha’e tafara izay. Nitsikihe o ndatio raho satria tsy nihisa raho tamo o heregnandro iohoe. Sinere iareo hiloka indraike raho, faie tsy nimete. Tsy niheregne niloka sasa raho.

Fa nikezake niakanjo i “toetse vaovaoy” raho, le natao badisa tamy i havoriambey vondrom-paritse nanoe ty Vavolombelo i Jehovah indraike zay. (Efesianina 4:24) Faie nisy raha nitsapa ty finoako zay tamy i andro nanoagne badisa ahikey. Noly tamy i hotely nipetrahakoy agne raho tamy ty hariva io. Naho fa niavy agne raho, le nizoeko nitsangagne tan-dalan-tragnoko eo i ampela nisakezakoy. Hoe reke: ‘Samy! Andao tika mba hireve heike!’ Le avy le nandietse raho. Nitiahiveko ama’e tie fa mikezake magnorike ze raha rehafe ty Baiboly raho tie amy izao. (1 Korintianina 6:18) Hoe reke: ‘Akore soa?’ Le nagnaratiraty ze raha rehafe o Baibolio miomba ty ndaty tsy mpivaly mifampila teo reke, sady nisisike ty hiarake amako indraike. Faie ndra aleoko nizilike tan-tragnoko tao, le nihiliako lakile i lalagney. Fale raho fa mbe malio findesam-batagne avao, nanomboke tamy niovàko ho Vavolombelo i Jehovah tamy 1958.

Maro ty soa niazoko noho iraho magnorike ty tari-dala ty Baiboly, le ndra boke raike varagne tsy mahampe aze naho soratagne ao iaby. Nanjare nanagne ragnetse soa maro ohatse raho, misy dika’e ty fiaignako, sady tena sambatse ka.

Mbe tea base-ball avao raho tie amy izao, faie tsy io sasa ty raha fara izay ty lahibey amako. Maregne fa nanjare nalaza naho nanan-karena raho naho fa nihisa base-ball, faie mihelagne avao zay. Ty fifandrambesako aman’Agnahare naho amo o rahalahiko Kristianao ro haharetse nainai’e. Hoe ty Baiboly: “Mandriogne ty tontolo toy naho ty fagniria’e, fa ze manao ty zoton’arofon’Andrianagnahare ro maharetse nainai’e.” (1 Jaona 2:17) Teako ty Jehovah Andrianagnahare naho o vahoa’eo, sady tsy misy atakaloko iareo!