మంచిరోజులు రాబోతున్నాయి!
మంచిరోజులు రాబోతున్నాయి!
“కొంతకాలం తర్వాత దుష్టులు ఇక ఉండరు; ... అయితే సాత్వికులు భూమిని స్వాధీనం చేసుకుంటారు, వాళ్లు ఎంతో శాంతిని అనుభవిస్తూ చాలా సంతోషంగా ఉంటారు.”—కీర్తన 37:10, 11.
బైబిల్లోని ఈ మాటలు నిజమవ్వడం చూడాలనుకుంటున్నారా? చూడాలనే అందరూ కోరుకుంటారు. ఈ మాటలు త్వరలో నెరవేరతాయనే పూర్తి నమ్మకంతో మనం ఉండవచ్చు.
జరగబోయే వాటిగురించి బైబిలు ముందే చెప్పిన విషయాల్లో కేవలం కొన్ని మాత్రమే ఈ ఆర్టికల్స్లో చర్చించాం. మనం “చివరి రోజుల్లో” జీవిస్తున్నామని ఆ విషయాలు స్పష్టంగా రుజువుచేస్తున్నాయి. (2 తిమోతి 3:1-5) మనం నిరీక్షణ కలిగివుండాలనే ఉద్దేశంతోనే దేవుడు మనుషులను ఉపయోగించి ఆ విషయాలను బైబిల్లో రాయించాడు. (రోమీయులు 15:4) బైబిలు ముందే చెప్పిన విషయాలు నెరవేరుతున్నాయంటే, ఇప్పుడు మనం అనుభవిస్తున్న కష్టాలు త్వరలోనే పోతాయని అర్థం.
చివరి రోజుల తర్వాత ఏం జరుగుతుంది? దేవుని రాజ్యం మనుషులందరినీ పరిపాలిస్తుంది. (మత్తయి 6:9) అప్పుడు భూమ్మీద పరిస్థితులు ఎలా ఉంటాయని బైబిలు చెప్తుందో గమనించండి:
● ఆహారకొరతలు ఉండవు. “భూమ్మీద సస్యసమృద్ధి ఉంటుంది; పర్వత శిఖరాల మీద ధాన్యం పొంగిపొర్లుతుంది.”—కీర్తన 72:16.
● వ్యాధులు ఉండవు. “అందులో నివసించే వాళ్లెవ్వరూ, ‘నాకు ఒంట్లో బాలేదు’ అని అనరు.”—యెషయా 33:24.
● భూమి మళ్లీ శుభ్రంగా మారుతుంది. “ఎడారి, ఎండిన భూమి ఉల్లసిస్తాయి,
ఎడారి మైదానం సంతోషించి కుంకుమ పువ్వులా వికసిస్తుంది.”—యెషయా 35:1.
జరగబోయే వాటి గురించి బైబిలు చెప్పే ప్రోత్సాహకరమైన విషయాల్లో ఇవి కొన్ని మాత్రమే. భవిష్యత్తులో మంచి రోజులు వస్తాయని మేం ఎందుకంత ఖచ్చితంగా నమ్ముతున్నామో తెలుసుకోవడానికి మీరు ఇష్టపడితే, యెహోవాసాక్షులు ఆ కారణాలను వివరిస్తారు.