ATUTUBET 9
komaata Yawe nepepe kwape ekale
“Komaata ŋol lokesubi akuj ka akwap.”—Apukokinio 14:7
Kwape idaunia ijo aisisiaun kotoma koitabo kalo, ejaatar Ebaibuli keda ipiteno luepedorete aingarakin ijo keda ekonikale. Ekoto ijo Yawe ajaute keda aiyalama. Kisumunit nges ebe arai ibuaik ijo aimaake araun nasodit, “kiyatakinio ŋun kere.” (Matayo 6: 33) Ekoto nges ijo araun opaperoke. Kitosom apak adio kere kanu ijo adukun epaperone keda Edeke. Erai na arereng naibusakinit idio itunganan kere ajaute kede.—Matayo 22:37, 38.
1 KITOGOGONG EDICANE KON KEDA YAWE
NUEBALA EBAIBULI “Araun eoŋ papa kamakus yes da iraunos ikadwe lusap ka lupesur ebala Ejakait.” (2 Ikorinton 6:18) Ekoto Edeke ijo araun opaperoke. Ailip nges erot ediopet loipedoria oni aswam ngun. Kisukunyunit ijo Yawe “ailipenen tiritir.” (1 Isesalonikan 5:17) Ipuda nges apupun nukotau kon ka nuikoto ijo. (Ipilipin 4:6) Ne kilipia ijo keda ekale kon, epote kesi aanyun kwape iminar ijo Yawe.
Aimoriarit einer keda Edeke, ibusakinit ijo aipup nges. Ipedori ijo aswam ngun kotoma aisisia akirot ka itabon luisisianakinite Ebaibuli. (Isabulin 1:1, 2) Kinyabuk nuidau ijo aisisia. (Isabulin 77:11, 12) Aipup Edeke nges bobo imoriarit alosesenen airiamununeta nuka Ikristayon.—Isabulin 122:1-4.
AIimonokin luce da nuikamunitos Yawe erai bobo erot ece loitelekarit kanu ijo aitogogong edicane kon keda nges. Neiyatakinia ijo aswam nu, ibuni ijo aanyun ebe iyasi do ijo aikunyakin nejai nges.—Matayo 28:19, 20.
NUIPEDORI IJO ASWAM:
-
Kodumunun apak kangin paaran kanu asiomenen Ebaibuli keda ailip
-
Kwape ekale, kitopoloosi aswamisio nuka emoyo adepar idio bore kere
2 KOLELAKIS AIMAA NAKOKALE
NUEBALA EBAIBULI: “Kikunyakis neejai Edeke, ŋes da ikunyuni mama ijaas.” (Yakob 4:8) Ibusakinit ijo atupit ainapeta nuka aisisia Ebaibuli kokale kosodi aanyun ebe mam kitwaniari aimaa nakokale. (Ageun 18:19) Konye ipu nuekotoi. Ekoto Edeke korai lo kingarenikinit aijar kus nakokale kangin paaran. Kitigogong edicane loka okale kon keda Edeke kotoma einer nuikamunitos nges “iboienenei kotogokon, ilosenenei korot, iperenenei, inyoununei da.” (Ikisila 6:6, 7) Kojaas keda alosikinet kwape Yosua loabu kotema ebe: “Konye eoŋ ka ekakal, kijaanakini Ejakait.”—Yosua 24:15.
NUIPEDORI IJO ASWAM:
-
Kojaas duc keda ainapetait naitutuori ngin itunganan yen kokale kon
