ርብቃ ንየሆዋ እትፈቱ ሰበይቲ ነበረት። ሰብኣያ ይስሃቅ ይብሃል። ንሱ እውን ንየሆዋ ይፈቱ ነበረ። ርብቃ ምስ ይስሃቅ ብኸመይ ተራኺባ፧ ንየሆዋ ኸተሐጕሶ ኸም እትደሊኸ ብኸመይ ኣርእያ፧ ብዛዕባኣ እስከ ንምሃር።

ወለዲ ይስሃቅ፡ ኣብርሃምን ሳራን ይብሃሉ። ኣብታ ንየሆዋ ዘየምልኹ ሰባት ዝነበርዋ ምድሪ ከነኣን ከኣ ይነብሩ ነበሩ። ኣብርሃም ግና ንወዱ፡ ንየሆዋ እተምልኽ ጓል ኬመርዕዎ ደለየ። ስለዚ፡ ንይስሃቅ ሰበይቲ ምእንቲ ኼምጽኣሉ፡ ንጊልያኡ ናብታ ኣዝማዱ ዚነብሩላ ካራን ለኣኾ። ንሱ፡ እቲ ኤልዔዘር ዚብሃል ጊልያኡ ነይሩ ኪኸውን ይኽእል እዩ።

ኤልዔዘር ድማ ምስ ካልኦት ገላዉ ኣብርሃም ሓቢሩ ተጓዕዘ። እቲ ጕዕዞ ኸኣ ነዊሕ ነበረ። ምሳታቶም ድማ፡ ምግብን ህያባትን እተጻዕና ዓሰርተ ገመል ተማልኡ። ኤልዔዘር፡ ኣየነይቲ ሰበይቲ ንይስሃቅ ከም እትኸውን ከመይ ገይሩ ፈሊጡ፧ ኤልዔዘር ምስቶም ካልኦት ገላዉ ኣብ ካራን ምስ በጽሐ፡ ማይ ዚቐድሓ ኣዋልድ ናብ ዒላ ኸም ዚመጻ ፈሊጡ፡ ኣብ ጥቓ ዒላ ኣዕረፈ። ሽዑ ድማ፡ ‘ማይ ከተስትየኒ ምስ ሓተትክዋ፡ “ስተ፡ ንኣግማልካ እውን ከስትየን እየ” እትብለኒ ጓል፡ ንሳ እታ ንስኻ ዝሓረኻያ ጓል ምዃና ኽፈልጥ እየ’ ኢሉ ናብ የሆዋ ጸለየ።

ሽዑ፡ ርብቃ እትብሃል ጓል ናብታ ዒላ መጸት። መጽሓፍ ቅዱስ፡ ኣዝያ መልክዐኛ ኸም ዝነበረት ይነግረና። ኤልዔዘር፡ ማይ ከተስትዮ ምስ ሓተታ ድማ፡ ‘ሕራይ፡ ስተ። ንኣግማልካን እውን ማይ ከምጽኣለን እየ’ በለቶ። ሕስብ እሞ ኣብሎ! ማይ ዝጸምኣ ኣግማል ብዙሕ እየን ዚሰትያ፣ ስለዚ፡ ርብቃ ናብታ ዒላ ብዙሕ ሳዕ ክትመላለስ ነይርዋ። ንፍዕቲ ሰራሕተኛ ኸም ዝነበረት ኣብዚ ስእሊ እዚ ትርኢዶ ኣለኻ፧— ኤልዔዘር ከኣ፡ በቲ የሆዋ ንጸሎቱ ዝሃቦ ምላሽ ተገረመ።

ሽዑ፡ ኤልዔዘር ንርብቃ ብዙሕ ጽቡቕ ህያባት ሃባ። ንሳ ድማ ንኤልዔዘርን ነቶም ካልኦት ገላዉን ናብ ቤታ ኺመጹ ዓደመቶም። ኤልዔዘር ከኣ፡ ኣብርሃም ስለምንታይ ከም ዝለኣኾ፡ የሆዋ ድማ ከመይ ገይሩ ንጸሎቱ ኸም ዝመለሰሉ ነገሮም። ስድራ ቤት ርብቃ ኸኣ፡ ንይስሃቅ ኬመርዕውዋ ተሓጒሶም ፍቓደኛታት ኰኑ።

ርብቃኸ ንይስሃቅ ክትምርዖ ፍቓደኛ ዀይናዶ፧— ርብቃ፡ የሆዋ ንኤልዔዘር ናብኡ ኸም ዝለኣኾ ፈሊጣ ነበረት። ስድራ ቤታ ናብ ምድሪ ከነኣን ከይዳ ንይስሃቅ ክትምርዓዎ ፍቓደኛ እንተ ዀይና ምስ ሓተትዋ፡ ‘ሕራይ፡ እኸይድ’ በለቶም። ብኡብኡ ድማ፡ ምስ ኤልዔዘር ከደት። ኣብ ከነኣን ምስ በጽሑ ኸኣ፡ ንይስሃቅ ተመርዓወቶ።

ርብቃ ኸምቲ የሆዋ ኽትገብሮ ዝደለያ ስለ ዝገበረት፡ የሆዋ ባረኻ። ድሕሪ ነዊሕ ዓመታት፡ የሱስ ካብ ዘርኣ ተወልደ። እምበኣር፡ ንስኻ እውን ከም ርብቃ እንተ ዄንካ፡ ንየሆዋ ድማ እንተ ኣሐጒስካዮ፡ ንሱ ኺባርኸካ እዩ።