Er Bibilo i er kwagh sha ikyaa ne i ze shimi ga nahan kpa, i yange akaa a shighen sha ishi man akaa a hweegh a wuhan iyol a mi atô kposo kposo la ga. Nahan kpa a u Bibilo ma i hembe veren ishima sha mluashe u ken won la yô, i er nahan ga, i hemba veren ishima sha “hwe u saan ishe ga, u ishima i legh legh man u lun ving la.”—1 Peteru 3:3, 4.

•   Kasev mba jighjigh mba sha ayange a tsuaa la yange ve er akaa a hweegh iyol. Rebeka u yange wan u Aberaham, Isaka vôso un la kpa yange wa kunya u zenaria sha ihinga shi ngohol ikyav mbi hweegh mbi taverishe mbi or u lu u una va hingir ter u nom na la, na un la. (Genese 24:22, 30, 53) Eseter kpa yange lumun “iyol kighir” sha u i wa un ago iyol u va hingir torkwase u Tartor u Pershia yô. (Eseter 2:7, 9, 12) Iyol kighir ne alaghga tsô yange i wa u “shighen ve akaa sha ishi” gayô “shighen ve kaa sha ishi atô kposo kposo.”​—New International Version; Easy-to-Read Version.

•   Bibilo tese ikyav sha u tôôn akaa a hweegh karen sha akaa agen sha gbenda u injaa. Ikyav i tesen yô, or u nan we mbagenev akaa a dedoo nahan, i tôô nan i kar sha “kunya u zenaria u ken to . . . ku ungwan ikaan la.” (Anzaakaa 25:12) Kape Aôndo iyolna kpa yange tôô ieren na a ikyuior i Iserael la kaa sha nom u nan we kwasehe u nan ahye sha ave man shiligh sha mon shi nan we kwase la kunya ken ato la. Hwe u eren yange na ikyuior la hingir “dedoo tsung mimi je.”—Esekiel 16:11-13.

 Mtsum: ‘Tojir u sha ashe’ u Torkwase Yesebel wa la tese ér, kwagh u shighen akaa sha ishi la ka shami ga.—2 Utor 9:30.

 Mimi: Yesebel u yange eren akombo shi lu orwuanor la, yange i ôr un ijir lu sha ci u aeren a na a bo la, lu sha ci u mluashe na la ga.—2 Utor 9:7, 22, 36, 37.