Kwaghôron u Profeti 2. Ijen

“Ijen ia gba sha ajiir wue wue.”—MARKU 13:8.

● Orgen ken tar u Niger yange yevese ijen ken agar va lu hen angeri ugen, mba yer ér Quaratadji. Ônov mba anmgbian u ngô na, kua anmgbianev nav mba nomso man mba kasev kpa yevese ijen ken agar a ken toho ken tar la, va lu her. Nahan kpa, or ne lu tsan sha butu un tswen. Er nan ve yange lu tswene? Tor u angeri ne, iti na ér Sidi, a kaa ér, “Or ne ngu fantyô u koson [tsombor na] ga, nahan kunya ka u kôr un u kenger sha ior nav.”

IJEN GBA SHA AJIIR AGEN KPA? Ajiir kpishi sha tar nyian, aluer i ver iorov utaankaruhar utaankaruhar yô, hanma iorov utaankaruhar cii, a nôngo u zuan a or ker u hanma iyange ka nan zua a kwaghyan a kuma u nana ya ken iyange jimin ga yô. Ken veghertar u Afrika je yô, hemba gban kera. Ityar i i hii ape deserti u i yer ér Sahara la a we a va kighir la, zan zan yem due shin ityôtar i veghertar u Afrika la cii, or u nan zuan a kwaghyan i kuman u nana ya gbem ga ka nan nôngo u lun hen atô u iorov utar keng. Aluer ka iorov utar hen tsombor ye? Tôô ase wer ka tsombor u or nan lu her vea kwase u nan kua wan ve u sha ikyum yô. Aluer mba a kwaghyan u iorov uhar tseegh vea ya a kuma ve yô, ka an ken a ve kwaghyan la una yina a nana? A lu ter la, shin ngô la, shin wan ve laa? Hanma iyange yô, ka i gba u icombor i i lu ken imba mlu ne cii ia tsua or u nana lu ijen yô.

KA NYI IOR KPISHI KA VE ÔR U NYIMAN IKYAV I KWAGH NE? Tar ka u na kwaghyan je i kuma u hanma or a zua a kwaghyan una neer nan. Gba u a eren a kwaghyan sha inja, a hemba er i eren a mi hegen la.

KWAGH U KA VE ÔR NE KA MIMI JE KPA? Mimi je, mbasulev vea fatyô u kahan akaayan shi samber a kwaghyan je a hemba ave a tse. Jighilii yô, ka ugomoti mba uumace je ma ve fetyô u nengen sha kwaghyan u tar u ne la sha gbenda u vea bee a zayol u ijen la ye. Nahan kpa, ve ndera nôngon ér vea er kwagh ne anyom kar hegen kpishi, kpa mba fantyô ga.

U NENGE NENA? Kwagh u i ôr ken Marku 13:8 la ngu kuren sha mii? Een. Shin er uinjin shin umato mba eren tom sule a mi, mba i varen ainge ne ve lu wasen u kahan iyiav kpishi hegen nahan kpa, ijen ngi gban sha ajiir kpishi sha tar.

Tar ka ua tenger shin ijen ia gba hen ijiir yô, kwagh la a seer van a mbamzeyol mbagenev mba tesen ér se mba ken ayange a masejime.

[Mkaanem ma]

“Mbayev kpishi mba hough u sha ijô ahan man akôngo a haan kua iangev mbigenev mbi wua ve la cii yange ma ve fatyô u waren, luun er ve lu zuan a kwaghyan tsembelee yô.”—Mkaanem ma KWASE U NGISE NENGEN SHA INYAREGH KI MZOUGH U TAR CII A NAN SHA CI U U WASEN MBAYEV LA (UNICEF), iti na ér ANN M. VENEMAN.

[Ape i zough a foto]

© Paul Lowe/Ufoto mba Panos