Suur Sha Yehova, “Aôndo U A Lu A Ishimasurun Cii” la

“I̱ wuese Aôndo Ter u Ter wase Yesu Kristu, ka Ter u A lu a mhôônom ma zungwen man ka Aôndo u A lu a ishimasurun cii.”—2 KOR. 1:3.

1. Ka nyi mbayev man mbaganden cii ka ve soo ér i eren a ve?

 HII shighe u i mar se la je, ka se soo ser i surun se ishima. Wanikyundan ka nan vaa sha u tesen se ér se fa ser nan soo ér se sur nan ishima. Ka nana soo ér i kôr nan shin ijen ia kôr nan kpa, nan pase se kwagh ne sha mlia. Shighe u se we ikyondo je kpa, ashighe kpishi ka se soo ser or a sur se ishima, hemban cii je yô, shighe u se lu ken mbamlu mba taver yô.

2. Yehova na mba suur sha a na ibumun i surun ve asema nena?

² Ashighe kpishi mba hen tsombor wase kua azende a ase ka a nôngo u surun se ishima. Kpa ashighe agen di yô, akaa a ka a va se a ican la ka a gande u orumace nana sur se ishima. Ka Aôndo tseegh una fatyô u surun se ishima ken nyityô mlu u ican u se nyer ker cii ye. Mkaanem nam na se ibumun ér: “TER ngu ikyua ikyua a mba ve yer Un cii, . . . man shi Una ungwa mliam vem.” (Ps. 145:18, 19) Sha kpôô yô, ‘ashe a Yehova nga sha mbaperapera, A kegh ato sha u ungwan myer ve kpaa.’ (Ps. 34:15) Kpa cii man Aôndo a sue se shi a sur se asema yô, saa se suur sha a na. Orpasalmi Davidi yange pase kwagh ne ken icam wang, a kaa ér: “TER Una hingir ijiir i yeren sha ci u mba i kighir ve a ican yô, ijiir i yeren sha ayange a ican i tsung la. Mba ve fe iti You yô, vea suur sha a We, gadia TERE, We, U kende mbakeren We la, dang mayange ga.”—Ps. 9:9, 10.

3. Yesu yange tese ikyav i dooshima u Yehova sha ior nav nena?

³ Mba civir Yehova gba un kwagh kpen kpen. Yesu yange pase kwagh ne wang, kaa ér: “Mba teen mbaatsator utaan sha toro uhar gaa? Mô ve môm kpaa i hungur Aôndo ga. Man shi ice yen i sha ityou je kpaa i ôr i cii. De cie nen ga; mbaatsator kpishi je kpaa ne hemba ve inja.” (Luka 12:6, 7) Yehova yange kaa a ior nav mba tsuaa mbara sha ikyev i profeti Yeremia ér: “U doom ishima sha dooshima u tsôron je, ka sha ci u nahan M udugh we sha erdoo ye.”—Yer. 31:3.

4. Se fatyô u nan uityendezwa mba Yehova jighjigh sha ci u nyi?

⁴ Aluer se suur sha Yehova shi se na jighjigh ser uityendezwa nav vea kure sha mi yô, kwagh la una na se ishimasurun ken ashighe a ican. Sha nahan yô, se suur nen sha Aôndo er Yosua nahan, yange kaa ér: “Ma kwagh môm sha akaa a dedoo a TER, Aôndo wen, ter sha a ven la bunde ga, a cii i kure ne a vough, ma kwagh môm bunde ga.” (Yos. 23:14) Heela tseegh ga, se fatyô u lun a vangertiôr ser aluer hegen mbamlu mba taver vea na sea lu yan ican kpa, “Aôndo yô, ka u jighjigh,” nahan mayange una kende mba ve civir un sha jighjigh la ga.—Ôr 1 Mbakorinte 10:13.

5. Se mba fetyô u surun mbagenev asema nena?

⁵ Apostoli Paulu yila Yehova ér “Aôndo u a lu a ishimasurun cii.” Inja i “u surun” or ishima yô, ka u eren kwagh a or u nan lu ken ican shin nan lu ken mzungu, sha gbenda u a pever nan iyol yô. Ka i er kwagh ne sha u panden mnyoon u nan la, geman nan nan myôhôryol. Sha kpôô yô, Yehova eren kwagh ne. (Ôr 2 Mbakorinte 1:3, 4.) Ma or shin ma kwagh tagher Ter wase u sha la kwagh ga, nahan ka a er hanma kwagh u i gbe u una er sha u surun mba a doo ve ishima la asema cii. Se di  kpa ka se fatyô u geman surun mba nan jighjigh a vese imôngo asema “ken hanma ican” i ve lu ker cii. Ka se er kwagh ne “sha ishimasurun i se ayol a ase kpaa Aôndo A sur se asema a mi la.” Kwagh ne tese tahav mbu Yehova a lu a mi a ikighir shio, mbu surun mbayinanasema ishima la.

U Nôngon a Akaa a Van Se a Ican

6. Ter akaa a aa fatyô u van se a ican yô.

⁶ Gba u a sur se ishima sha akaa kpishi ken uma. Môm ken akaa a á hembe nan se ishimavihin yô, ka ku u or u doon se ishima, hemban cii je yô, ku u wan wase shin kwase gayô nom. Shi or u i ker nan ihyom shin i nyaghen nan sha ci u mlu u nan la kpa, alaghga a gba u a sur nan ishima. Iyolbeen man angev man ibanave man uzayol mba ken ivese shin aferakaa a i eren ken tar ne la, aa fatyô u van se a ican, nahan a gba u a sur se ishima.

7. (a) Shighe u se nyer ken mbamlu mba vihin tsung yô, a gba u a sur se ishima sha ci u nyi? (b) Yehova una fatyô u eren nyi sha u surun ishima i ‘uren tsung-nuu’?

⁷ Shighe u se lu ken ican yô, a gba u a sur se ishima sha ci u alaghga ishima yase man mhen wase kua gbong-gbong wase man jighjigh u nan wase je kpa, una kera taver ga. U tesen ikyav yô, hen ase sha kwagh u ishima. Mkaanem ma Aôndo tese ér ishima yase ia fatyô u “uren tsung.” (Ps. 51:17) Yehova una fatyô u sôron mzeyol ne kpee je, gadia un “ka A sôr mba asema a vihi ve tsung la, A kange ve avav.” (Ps. 147:3) Ken mbamlu mba taver tsung, mba ishima i ze se iyol sha mi je kpa, Aôndo una fatyô u nan se myôhôr, aluer se er msen hen a na a jighjigh u nan shi se mba kuran atindi a na yô.—Ôr 1 Yohane 3:19-22; 5:14, 15.

8. Zum u mbamhen asev ve ne se ure yô, Yehova una wase se nena?

⁸ Atsan kposo kposo ka a na se hen kwagh ken ishima tsung je se ure, nahan ashighe agen a gba u or a sur se ishima sha er se de u henen akaa a nan se iuren yô. Sha agee ase tseegh yô, se fatyô u nôngon a akaa a karen jighjigh wase u nan ne ga. Nahan kpa, Orpasalmi wa icam ér: “Zum u mbamhen ve ngeem ken ishima yô, mbamsurshima Ou nam ishima i saan saan.” (Ps. 94:19) Shi Paulu kpa nger ér: “Ishima i̱ de nyian ne sha ma kwagh ga, kpa akaa a a gbe ne la, Aôndo A̱ fa a ken hanma kwagh cii sha msen man sha mzamber a ishughun, man bem u Aôndo u a gande hanma mfe wase cii una kura asema a en man mbamhen enev ken Kristu Yesu ye.” (Fil. 4:6, 7) Aluer se mba ôron Ruamabera shi gbidyen kwar sha mi yô, kwagh ne una wase se kpishi se kera henen akaa a nan se iuren ga.—2 Tim. 3:15-17.

9. Ka nyi ia wase se shighe u i lu se ken ishima dang-na?

⁹ Ashighe agen yô, iyol ia kpe se je, se kôr ityough ga yô, a hingir se ken ishima dang. Alaghga se nenge ser se kuma u eren ma tom ken tiônnongo shin tom u Ruamabera a tese ér se eren la ga. Ken mlu ne kpa, Yehova una fatyô u wasen se shi surun se asema. U tesen ikyav yô, zum u i tsua Yosua ér a hemen Mbaiserael ve nôngo ityav a ityar i agee i í lu ihyom a ve la yô, Mose kaa a Mbaiserael ér: “Taver ishima lu icihi, de cie ga, de luun a mciem iyol sha kwagh ve kpaa ga; gadia TER, Aôndo wou, ka Un A ze a we imôngo ye; Una kende u ga, Una undu u kpaa ga.” (Dut. 31:6) Sha iwasen i Yehova yô, Yosua yange kôrcio u hemen ior mba Aôndo nyôron a ve ken Tar u Ityendezwa la, shi ve hemba mbaihyomov vev cii ityav. Cii man shighe ne yô, Yehova vande wasen Mose hen Zegemnger u Nyian sha imba gbenda ne.—Eks. 14:13, 14, 29-31.

10. Aluer ican i se lu ker la bende a gbong-gbong wase yô, ka nyi iwasen se zua a mini?

¹⁰ Mbamzeyol vea fatyô u benden a gbong-gbong wase kpaa. Aluer se mba yan kwagh sha inja shi memen doo doo shi eren anumbe shi lun tsembelee yô, a wase se u lun gbong-gbong. Shi aluer se mba a mnenge u Bibilo sha kwagh u uma yô, kwagh ne kpa una wase iyol yase. Sha nahan yô, shighe u se lu ken ican yô,  doo u se umbur kwagh u er Paulu la man mkaanem nam ma taver or ishima man, ma kaa ér: “Mba eren se ican sha hanma ian kpa i her se a her ga. Lan se ishima cii kpa se hunde ishima kera ga. Mba tôvon se a ican nahan kpaa i ta se kera ga. Mba kôron se tan inya, kpa i wua se ga.”—2 Kor. 4:8, 9.

11. Se sôr angev mbu ken jijingi nena?

¹¹ Atsan agen aa fatyô u vihin mlu wase u ken jijingi. Sha ikyaa ingin kpa Yehova una fatyô u wasen se. Mkaanem nam na se ibumun ér: “TER ka A kôr mba ve gbe la cii, kenden a mba ve lu ngugh ngugh la sha.” (Ps. 145:14) Se ker iwasen hen mbatamen mba ken tiônnongo sha er vea wase se u nôngon a angev mbu ken jijingi yô. (Yak. 5:14, 15) Shi aluer se mba umbur ishimaverenkeghen yase i Ruamabera a pase se kwagh u i la hanma shighe yô, se fatyô u wan ishima a akaa a karen jighjigh wase u nan la.

Akav a Tesen Msurshima u Aôndo a Ne Yô

12. Pase er Yehova yange ôr kwagh a Aberaham sha gbenda u surun un ishima yô.

¹² Jijingi yange mgbegha Orpasalmi ugen kaa ér: “Umbur mkaanem Ou ma U er a wanakiriki Wou la, gadia [we Yehova] U erem m ngu a ishimaverenkeghen. Ka ishimasurun yam i ken ican yam ne, er mkaanem Ou ma taver uma wam yô.” (Ps. 119:49, 50) Nyian ne se mba a Mkaanem ma Yehova ma i nger la; ma a akav kpishi a tesen msurshima u Aôndo a ne se la. U tesen ikyav yô, alaghga ishima yange ia za Aberaham iyol shighe u Yehova pase un ér un ngu za timen gar u Sodom man Gomora la. Tertamen u jighjigh ne pine Aôndo ér: “Ú tim orperapera a orifer imôngo?” Yehova sur Aberaham ishima shi na un ibumun ér aluer un zua a mbaperapera 50 tseegh kpa, una kera tim Sodom ga. Nahan kpa, Aberaham seer pinen Yehova kwagh kuma acin ataan, a kaa ér: Aluer u zua a mbaperapera 45 shin 40 shin 30 shin 20 shin 10 di ye? Hanma kwa u Aberaham una pine yô, Yehova a wa ishima a na shi a pase un ér, una tim Sodom ga. Shin er mbaperapera lu ken gar la nyôr pue ga nahan kpa, Yehova war Loti man ônov nav mbakasev.—Gen. 18:22-32; 19:15, 16, 26.

13. Hana yange tese ér un suur sha Yehova nena?

¹³ Yange sar Hana, kwase u Elkana tsung u maren wan. Kpa gema lu ikyômkwase, nahan kwagh ne za un iyol kpishi. A er msen hen Yehova sha kwagh ne, nahan Pristi u Tamen, Eli kaa a na ér: “Aôndo u Iserael A̱ na u kwagh u u sen Un yô.” Kwagh ne yange sur Hana ishima, nahan “ishigh nagh kera tese ishima i vihin ga.” (1 Sam. 1:8, 17, 18) Hana suur sha Yehova  vangertiôr, a wa zayol na sha ikyev i Yehova. Shin er Hana fa er kwagh la una za a kure ga nahan kpa, a zua a mmem ken ishima. Shighe kar yô, Yehova ungwa msen na. A wa iyav a mar wannomso, a ii un iti er Samuel.—1 Sam. 1:20.

14. Yange gba u a sur Davidi ishima sha ci u nyi, man a ker msurshima hen ana?

¹⁴ Tor Davidi u ken Iserael u tsuaa la kpa ka ikyav igen i tesen or u yange Aôndo sur nan ishima yô. Er Yehova a “nengen ken ishima” yô, zum u a tsua Davidi ér a va lu tor u Iserael la, a fa er Davidi lu or u mimi shi tsee ishima sha kwagh u mcivir u mimi yô. (1 Sam. 16:7; 2 Sam. 5:10) Nahan cii kpa, shighe kar yô, Davidi er idya vea Betesheba shi ker gbenda u yeren isholibo na la, nahan a na zwa i wua nom na. Davidi va kaven er kwagh u un er la i lu isholibo i vesen yô, a er msen hen Yehova ér: “Zungwem mhôônom Aôndo, sha erdoo Wou; sha mhôônom Ou ma kôron yum la, esem akaabo am kera. Ôôm iferkwagh yam kera ca ca, wanger mo sha isholibo yam. Gadia mo m fa akaabo am, isholibo yam ngim sha ishi gbem.” (Ps. 51:1-3) Davidi yange gema ishima sha mimi, nahan Yehova de un isholibo na la. Nahan kpa, Davidi ya ican i isholibo na la va a mi la. (2 Sam. 12:9-12) Kpa mhôônom ma Yehova zungwe un la, ma sur wanakiriki na u hiden a iyol ijime ne ishima.

15. Ka iwasen i nyi Yehova yange na Yesu shighe u zurum u una kpe laa?

¹⁵ Shighe u Yesu lu shin tar ne la, a tagher a ameen kpishi. Aôndo na ian ameen ne kar jighjigh u nan u Yesu, kpa er Yesu lu or u vough, u suur sha Yehova hanma shighe shi wa iyol na sha ikyev i hemen Na yô, a za hemen u tilen sha mimi her gbem. Shighe u zurum u a nenge Yesu mker shi a wua un la, a er msen hen Yehova ér: “Ka ishima Yam ga, i̱ lu ishima You i̱ er ye.” Tsô ortyom ande hen Yesu taver un ishima. (Luka 22:42, 43) Aôndo yange sur Yesu ishima shi sue un shi na un ishimataver i gba u una lu a mi hen shighe la la.

16. Aluer gba u se kpe sha ci u mtil wase sha mimi yô, Aôndo una er nyi sha ican yase laa?

¹⁶ Aluer se ayol a ase sea tagher a ku sha ci u mtil sha mimi wase u Mbakristu la je kpa, Yehova ngu a tahav mbu wasen se, shi una wase se u tilen sha mimi hen a na kpaa. Heela tseegh ga, ishimaverenkeghen i mnder u shin ku la ne se msurshima. Se mba veren ashe a iyange i ‘a tim orihyom u masetyô kera la, ka ku’ je la. (1 Kor. 15:26) Yehova ngu umbur mba civir un sha mimi mba ve kpe la, kua mbagenev kpaa, nahan una va nder ve shin ku. (Yoh. 5:28, 29; Aer. 24:15) Er se ne jighjigh a ityendezwa i Yehova a er sha kwagh u mnder u shin ku la yô, kwagh ne ngu a sur se ishima shi a na se ishimaverenkeghen shighe u i lu tôvon se a ican yô.

17. Yehova una fatyô u surun se asema shighe u or u doon se ishima nan saa ku nena?

¹⁷ Ka kwagh u surun se ishima kpishi u fan ser mba doon se ishima mba ve lu shin iwar la cii mba a ian i a va nder ve, vea hide a lu uma ken tar u he, ape akaa a van se a ican, a a lu hegen ne cii aa kera lu ga la! Shi mba civir Yehova mba ve lu “zegeikpelaior,” mba vea va war mkur u botar ne la, vea lu a ian i icivirigh kpishi i keghen mba a va nder ve shin ku vea lu uma shin tar la gbenda shi tesen ve!—Mpa. 7:9, 10.

Aôndo u Tsôron Ka Ijiir i Teman

18, 19. Mba civir Aôndo mba zough a ishimataver shighe u i lu tôvon ve a ican la nena?

¹⁸ Mose yange wa icam i kundun iyol, taver  Mbaiserael ishima ér: “Aôndo u tsôron ka ijiir you i teman, vegher u shin yô, ave a tsôron nga.” (Dut. 33:27) Shighe kar yô, profeti Samuel va kaa a Mbaiserael ér: “De kera gbihin nen TER ga, kpa civir nen TER a ishima yen cii. . . . TER Una gbihi ior Nav kera ga, sha ci u iti Na i vesen la.” (1 Sam. 12:20-22) Aluer se za hemen u varen a Yehova ken mcivir u mimi yô, mayange una kende se ga. Una za hemen u nan se iwasen i kwagh a gbe se a mi la.

¹⁹ Aôndo ngu zan hemen u suen ior nav shi surun ve ishima ken ayange a masejime ne. I ndera tôvon mba civir Aôndo a vese imôngo a ican sha tar cii, shi wuhen ve ken purusu hemba anyom dubu hegen, sha ci u mba civir Yehova yum. Kwagh ve ne tese ér, mimi je, Yehova surun ior nav ishima ken ashighe a ican. U tesen ikyav yô, yange i wuhe anmgbian ugen ken purusu, ken tar u ngise i yilan ér Soviet Union la, kuma anyom 23 sha ci u jighjigh na u nan. Nahan cii kpa, i ker gbenda u zan un a kwaghyan u ken jijingi sha er a sur un ishima shi a taver un ishima yô. A kaa ér: “Ken anyom la cii, m hen u suur sha Yehova shi zuan a ishimataver hen a na.”—Ôr 1 Peteru 5:6, 7.

20. Se fatyô u lun a vangertiôr ser Yehova una kende se ga sha ci u nyi?

²⁰ A̱ lu nyi je sea va tagher a mi kpa, doo u se umbur mkaanem ma Orpasalmi ma surun se ishima man, ma kaa ér: “TER Una ta ior Nav kera ga.” (Ps. 94:14) Shin er se ayol a ase kpa i gbe u a sur se asema nahan kpa, se mba a ian i injaa i surun mbagenev asema. Er se va nenge ken ngeren u dondon ne nahan, se fatyô u surun mba ve lu zungwen ken tar u ngeen a mbamzeyol ne asema.

Ú Na Mlumun Wer Nyi?

• Ka akaa agen a nyi aa fatyô u van se a icanaa?

• Yehova surun mba civir un asema nena?

• Aluer se tagher a ku yô, ka nyi ia sur se ishima?

[Mbampin mba ngeren u henen]

[Ngeren u kiriki/​Foto u sha peeji 25 la]

ER SE NÔNGO A AKAA A AA FATYÔ U VIHIN . . .

▪ Ishima yase yô Ps. 147:3; 1 Yoh. 3:19-22; 5:14, 15

▪ mbamhen asev yô Ps. 94:19; Fil. 4:6, 7

▪ mlu wase u ken ishima yô Eks. 14:13, 14; Dut. 31:6

▪ gbong-gbong wase yô 2 Kor. 4:8, 9

▪ mlu wase u ken jijingi yô Ps. 145:14; Yak. 5:14, 15