Mpin U Mbaôron Takerada Ne . . .

Kanyi i Lu Iyou i Tartor?

▪ Iyou i Tartor ka iyou i civir Aôndo i Mbashiada mba Yehova ve nyer mbamkombo mba kwaghaôndo ker yô. Ayou a Tartor nga udubu udubu sha tar jimin cii. Hanma kasua yô, atôônanongo a Mbashiada mba Yehova a hemban iyenge 105,000 nga a nyôr mbamkombo ken Ayou a Tartor ne.

Hanma Iyou i Tartor yô, ngi a ijiir i ior teman henen Bibilo shi ungwan akaaôron a ken Bibilo Ajiir a teman ne kpishi nga a alyebagu u tilen sha mi pasen kwagh ken mbamkombo mba i nyer ken Iyou i Tartor la. Ashighe kpishi ka i ver mkônom ma ior vea fatyô u teman sha mi er 100 zan zan 300 nahan. Ashighe agen Iyou i Tartor shi ka i lu a kpoyou môm shin uhar man afishi kua kpoyou u koson ityakerada i pasen Bibilo man ityakerada igen i ior mba ken nongo u Kristu vea timen sha akaa ken i yô.

U fatyô u nengen a akaa a hweegh man akaa agen a nga a lu ken ayou a aduaav a Mbakristu mbagenev kpishi la ken Iyou i Tartor ga. U nenge a atse a nanden nagh man ieev shin terankon ker ga. Sha ci u nyi? Mbashiada mba Yehova na jighjigh ér u civir Aôndo a akaa angara nahan ka u peren tindi u Bibilo u a kaa ér, “yevese nen akombo a civir” la. (1 Mbakorinte 10:14; Yohane 4:24) I er akaa a hweegh ken ucôôci man utempel kpishi je gande u ôron. Kpa gema Ayou a Tartor yô, i maa a akuma akuma, sha gbenda u aa lu a iwasen kpishi yô. I hemba nan ishima sha akaa a ken Bibilo a i tesen ken Ayou a Tartor la a mlu u imaagh ki ayou shon la.

Er nan i yer ijiir ne ér Iyou i Tartor? Mba hembe ôron kwagh u atesen a Bibilo man loho u vesen u Bibilo i̱ er sha kwagh u “tartor u Aôndo” la ken mbamkombo mba i nyer ken Iyou i Tartor la; man lu tartor ne je lu itinekwagh i kwaghaôndo u Yesu pasen la ye. (Luka 4:43) Nahan yô, ishemberti i Iyou i Tartor, i̱ yange i due a mi ken kwavanyom u 1930 la, pase ityôkyaa jighilii i í maan ayou ne yô, inja na yô mba maan a ér a̱ sue mcivir u mimi shi a̱ lu ijiir i vesen i a pasen ior “Loho u Dedoo u tartor” her yô. (Mateu 24:14) Sha nahan yô, Ayou a Tartor ne nga sha ci u eren uiniongo shin kpenga her ga. Mba zough a inyaregh ki maan Ayou a Tartor ne, kua inyaregh ki nengen sha a ken inyaregh ki ior ve eren iyua sha asema a ve la. Mba karen a gbande u ngohol iyua sha ishigh ki iorov ken ayou ne ga. Er ma i eren nahan yô, i gema i ver akwati ijiir i môm, u hanma or u nan soo cii yô nana fatyô u gbihin iyua shimi yô.

Hanma ijiir sha tar cii yô, kwagh u i eren ken Ayou a Tartor la kaha ga, kpa i gema i maa a sha igbenda kposo kposo shi nga indi kwagh môm ga. Mba maan a sha gbenda môm ga sha ci u mlu u ikyav mbi maan kwagh a mi kaha sha ajiir kposo kposo, shi mlu u ahumbe kpa ngu kwagh môm ga shi Mbashiada mba Yehova mba sha ajiir agen mba a inyaregh er mbagenev nahan ga. I maa ayou ne agen sha akam, agen ka sha ikyon, agen di ka sha awen. Ayou a Tartor agen yô, i maa a sha msongo, i ver ian vegher môm shi i kuva a sha ihila.

Hanma or nana fatyô u zan mbamkombo ken ma Iyou i Tartor, hanma shighe u nan soo cii. (Mbaheberu 10:25) Jighilii yô, mba nyer mkombo u ken igbar u ka i pase kwagh sha itinekwagh i ken Bibilo sha ci u ior mba ken nongo u Kristu man mbavannya la ken hanma kasua. Yô, ma u ze mkombo hen Iyou i Tartor i hen ijiir you ma u za nenge er i lu yô.

[Foto u sha peeji 10]

Malawi, ken Afrika

[Ufoto u sha peeji 10]

Tar u Ingila, Great Britain