Shighe Ngu Van U Aferakaa Aa Bee yô!

AÔNDO na se Mkaanem nam ma ma pase se atôakyaa a a ne ve ior ve eren aferakaa yô. Shi a na se ian i eren kwagh u se soo la kua ishima i kôron iyol tsaha kpaa, nahan se fatyô u palegh kwaghbo aluer se soo yô. (Duteronomi 30:15, 16, 19) Er i lu u se fatyô u eren kwagh nahan yô, se fatyô u fan asaren a bo a se lu a mi ken a vese la shi eren kwagh u i doo u se er sha er se dugh a ken a vese kera yô. Se er nahan yô, ieren yase la ia hingir u van se a msaanyol kua ior mba se lun imôngo a ve la kpaa.—Pasalmi 1:1.

Nahan cii kpa, sea nôngo nan nan ser se palegh aferakaa je kpa, afer a ior mbagenev ve  eren la nga vihin tar ne seer a seer. Bibilo ta se icin ér: “Fa kwagh ne. Ken ayange a masejime yô, ashighe a ican aa va.” I̱ tese kwagh u a ne ve ayange ne a lu “ashighe a ican” yô, i̱ kaa ér: “Ior vea hingir mbawan ayol a ve ikyo tseegh man mba inyaregh ki doo ve ishima man mbahagher sha akaa man mbagengese iyol man mbaôron kwagh dang dang, man mbahemban mbamaren ve ato man mbalun a ishughun ga man mbalun wang ga, man mbalun a dooshima ga man mba ve soo u himen iyongo kpaa ga man mbaerenangereke man mbakôron ayol a ve tsaha ga man anomaior a bo man mba kwagh u dedoo a doo ve ga man mbapasen ior aker man mbawan uma ve ikyo ga man mbamoron ayol a ve man mba iember i iyolough i hembe doon ve a Aôndo la. Sha ashe yô mba a mlu u civir Aôndo la kpa mba geman mba nyiman agee la. Nyagh ambaaior la.”—2 Timoteu 3:1-5.

Alaghga u nenge a ishember i “ayange a masejime” la ken kwaghôron u profeti u i nger sha heen ne. U kav inja i ishember la kpa? Ior kpishi nenge ér ishember i “ayange a masejime” la, tese ér kwagh ngu u i lu u una kure yô. A lu di nyi laa? Nenge ase kwagh u Aôndo a tende zwa ken Mkaanem nam la.

A tim mbaaferev kera cica cii.

‘Shi côhin tsô iferor á kera lu ga; mimi je, ú nenge sha ijiir i nan, nan nan kpaa, kpa nana lu ga. Kpa mbaasemaleghlegh yô, vea ya dyako u tar, á saan ve iyol sha mngee u bem.’ —PASALMI 37:10, 11.

‘TER kor mba A doo ve ishima la cii, kpa mbaaferev yô, Una tim ve kera.’—PASALMI 145:20.

Mkighir una kera lu ga.

‘Una yima oribanave zum u nana vaa yô, man icanor kua or u nan lu a orwasen ga kpaa. Una paa uma ve sha mkighir man ipira.’ —PASALMI 72:12, 14.

‘Akaa a i gbe a la kpaa á va pase a sha ikyev i mlu u hôôn la á tuhwa, á za a mi ken mlu u engem u lun a ikyangenev ga u ônov mba Aôndo la.’—MBAROMANU 8:21.

A kure mbamgbe mba iorov.

‘Hanmô ve nana tema shin itine i kon u wain u nan, man shin itine i kon u tur u nan, ma or nana kera ta ve mciem iyol ga; gadia ka zwa u TER u akum a Sha je, u kaa nahan ye.’—MIKA 4:4.

‘Vea maa uya man vea tema keregh, vea kaha ishule i ikyon i wain, man vea ya atam a i. Mayange vea maa ya, orgen á kar á tema ker ga, vea lôô, man orgen á kar á ya, ga; gadia er ayange a ikyon a lu nahan kape ayange a ior Av kpaa aa lu la; uicuwan Av kpaa vea ya tom u ave ve zan zan je.’—YESAIA 65:21, 22.

Ijirôron i mimi ia ban ga.

‘Man hire Aôndo Una kera kure ijir sha ci u uicuwan Nav mba ve ve a mliam hen Na tugh man tetan ga yee . . . Me kaa ne, Una kure ijir fese je.’—LUKA 18:7, 8.

‘Kwagh u mimi doon TER ishima, man shi te mba i doo Un a ve la kera ga. Mba koson ve gbem.’—PASALMI 37:28.

Perapera una kar a tile sha ityough ki ieren i or wan iyol i nan ikyo tseegh la.

‘Mba ve tem shin tar la [vea] henen perapera.’—YESAIA 26:9.

‘Se mba keghen Usha mba hev je man tar u he u perapera una tema ker yô, sha ityendezwa Na la.’—2 PETERU 3:13.

Ior Mba Geman Aeren a Ve Hegen Je Kpaa

Sha kpôô yô, se cii uityendezwa mban vea doo se kpishi. Kpa se mba a ma ibumun i tesen  ér uityendezwa mban vea kure je he? Jighilii yô, se mba a ikyav hegen je i tesen ér uityendezwa mba Aôndo vea kure sha mi kpee. Kanyi i lu ikyav shono? Ikyav tese ér ior umiliôn imôngo sha tar nyian fatyô u den ieren i wan ayol a ve ikyo tseegh la, kua ijimba man ipila kpaa, shi ve hen u lun ior mba mimi, mba lun a bemshima shi lun inja kundu kundu. Nyian ne, Mbashiada mba Yehova mba ve hembe iyenge miliôn utaankaruhar la mba ken mzough u a tser tar cii yô, kwagh u mbavia a mbavia ngu ken mzough ne ga, kua mpav u hen atô u ijô kposo kposo man ityar man iniongo i patii kua atsanaior man mbainyarev la kpaa ga; ka akaa aa a ve a ihyom man ipila man iwoo-or, hii sha ayange a tsuaa la je zan zan nyian je ne. * Mgem u ior ve lu geman aeren a ve nyian nahan ne ka ityôkyaa i vesen i se fatyô u nan jighjigh ser uityendezwa mba Aôndo vea kure sha mi sha tar jimin cii yô.

Kpa, kanyi i lu wasen ve u geman aeren a ve nahana? Ityendezwa igen ken Bibilo, i̱ profeti Yesaia yange nger la i̱ na mlumun sha mpin ne. Yange nger ér:

“Zum la gbaseela una teman vea waniyôngo imôngo, anyam kpaa una yaven a wanivo imôngo; gumbua man gumbegha kua icighanile vea teman imôngo, wanye u kpeghee una hemen ve. . . . begha je kpaa una ya toho er bua nahan. Wanikyundan u man atumba una numbe hen zwa u tayar, wan u den atumba una za uwegh ken zwa u igbinde. Vea vihi kwagh ga, vea tim kwagh sha icighanwo Wam cii kpaa ga, gadia tar ua mgbough a mfe u TER er mngerem ma ngee shin zegemnger nahan.”—Yesaia 11:6-9.

Kwaghôron u profeti ne ngu ôron kwagh u shighe u annyamev vea lu bem bem a uumace la tseegh shinii? Ei, a ôr kwagh hemba heela. Fa wer vegher u masetyô u kwaghôron u  profeti ne tese kwagh u una va a mgem ne yô, ér: “Tar ua mgbough a mfe u TER er mngerem ma ngee shin zegemnger nahan.” Mfe u Aôndo gem ieren iannyamevaa? Mayange ga. Kpa una fatyô u geman aeren a ior shi ngu geman ior kpaa! Kwaghôron u profeti ne tsenga ôron ér ior mba yange ve eren akaa er inyamtoho nahan la vea de aeren a ve la, vea gema a hingir u lun a aeren a Kristu, gadia ve hen atesen a Bibilo shi mba dondon a kpaa.

Nenge ase ikyav sha kwagh u Pedro. * Yange za nyôr nongo a mzough ugen u mbawan tswam, gadia á na jighjigh ér un ngu nôngon kwagh sha ci u ior mba i nzughul a ve la. Tsô i tese un u tan num sha ior, mba been cii yô, i na un wada ér a̱ za ta bom, a̱ hembe barki u dasenda ugen cica cii. Er lu wan iyol una za tan bom ne la, dasenda kôr un. Pedro tsa ken purusu kuma iwer 18; shighe u lu ken purusu la á za hemen u eren akaa a hendan a gomoti. Hen shighe la, kwase u Pedro hii u henen Bibilo vea Mbashiada mba Yehova. Pedro dugh purusu yô, un kpa maa hii u henen Bibilo. Akaa a yange hen sha kwagh u Yehova Aôndo la mgbegha un u geman aeren a na kpishi, shi gema mnenge na sha kwagh u uma kpaa. Pedro kaa ér, “M sugh Yehova kpishi er anyom a m lu ken mzough u mbawan tswam la cii m wua or môm ga nahan. Hegen ne m ngu yaren tom a sanker u jijingi u Aôndo, ka Bibilo je la, sha u ôron ior loho u bem u mimi, man u  perapera, loho u dedoo u Tartor u Aôndo la.” Pedro yange hide za hen barki shon u wa ishima u hemben un kera cica cii la sha er una za ôr ior loho na u bem man kwagh u tar u ipila ia kera lu ker ga la.

Mgem u Mkaanem ma Aôndo ma gem ior kpishi la seer nan se ityôkyaa i nan jighjigh a ityendezwa i Aôndo a er ér aferakaa cii aa kure kpee, a bunde ga la. Sha mimi yô, ior vea za hemen u eren akaabo gbem sha won ga, kpa vea gema vea hingir ior mba dedoo. Ica a gba ga tsô Yehova una tim un u yange hii van a aferakaa, Satan Diabolo u a lu tuur tar ken ityô ken myer, u lu eren akaabo la. Bibilo kaa ér: “Se fa se due ken Aôndo, kpa tar cii ngu sha ikyev i Orbo.” (1 Yohane 5:19) Kpa ica a gba ga tsô una kera lu ga. Mba ve vende u undun igbenda ve i bo sha apera la kpaa vea kera lu ga. U lun uma hen shighe la a lu kwagh u doon kpishi!

Kanyi or nana er keng ve nana va lu uma hen shighe la? Umbur wer, ka “mfe u TER” á lu wasen ior u geman aeren a ve nyian ye, shi ka mfe shon kpaa una gema tar cii ken hemen ye. Nahan aluer u zua a mfe u vough u ken Bibilo la shi u ngu eren sha mi er Pedro nahan yô, we kpa u fatyô u lun a ishimaverenkeghen i va lun uma ken tar u “perapera una tema ker” la. (2 Peteru 3:13) Sha nahan yô, se mba taver we ishima ser, zua a mfe u Aôndo man u Yesu Kristu er ian i lu her ne, gadia mfe ne una fatyô u van we a uma u tsôron.—Yohane 17:3.

[Ngeren mba shin kpe]

[Mkaanem ma sha peeji 9]

We kpa u fatyô u lun a ishimaverenkeghen i va lun uma ken tar u “perapera una tema ker” la.—2 PETER 3:13