Mpin U Mbaôron Takerada Ne . . .

Mbashiada mba Yehova mba been ior angev sha ivandee?

▪ Ma shighe môm tsô kpa Mbashiada mba Yehova mba a bee ior angev sha ivande ga. Ve na jighjigh er Yesu nahan ér, tom u vesen u ve lu a mi yô, ka tom u pasen ior loho u dedoo u Tartor u Aôndo la. Shi ve na jighjigh kpaa ér mba fe Mbakristu mba mimi sha ivande i eren been ior angev ga, kpa ka sha kwagh ugen u a hembe lun a inja cii yô.

Sha kpôô yô, iangev mbi Yesu Kristu bee ior sha mhôôn ken derianyom u hiihii la ka kwagh u lun se cii a inja. Kwagh ne ka ibumun i tesen ér zum u Yesu, Tor u Tartor u Aôndo una hemen la “ma or . . . nana kera kaa er: Kwagh nyoon mo, ga.”—Yesaia 33:24.

Kpa, gema shighe wase ne di ye? Ior mbagenev ken ucôôci kposo kposo kua ken ukwaghaôndo mbagenev mba ve lu Mbakristu ga yô, senge ér ve mba been ior angev sha uivande mba eren. Kpa Yesu iyol na yange ta se icin gbang gbang sha kwagh u ior mba vea senge ér, ve̱ er “akaa a ageegh kpishi” ken iti na la. Yesu una kaa a ve ér: “Mayange je M fa ne ga, yem nen heen kera, ne mbaaferev mban.” (Mateu 7:22, 23, mgem u Bibilo i í yer ér International Standard Version la) Nahan mimi je, uivande mba ior ve senge ér ve mba eren ainge, sha u been ior angev ne tese ér Aôndo lumun ve shin iveren i Aôndo ngi sha a vee?

Nenge ase kwagh u Bibilo i er sha kwagh u iangev mbi Yesu been ior la. Aluer se tôô kwagh u i nger ken Ruamabera sha u pasen gbenda u Yesu been ior angev la se kar sha kwagh u mba been ior angev sha ivande ve eren ainge ne yô, se hingir u kaven fese ape uivande vev mbara ve dugh yô, a̱ lu hen Aôndo shin a̱ lu hen a na ga kpa se fa.

Yesu been ior angev sha ci u una zua a mbadondon kpishi shin una urugh ikpelaior i̱ dondo un ijime ga. Er ma eren nahan yô, ashighe agen a bee ior angev ken iuv. Ashighe kpishi Yesu una bee or angev yô, a kaa a nan ér nana de er or môm kwagh sha mi ga.—Luka 5:13, 14.

Mayange Yesu ngohol inyaregh hen ior sha uivande mba eren la ga. (Mateu 10:8) Shi angev hemba un u been or ma shighe môm ga. Mbauangev mba ve va hen Yesu cii a bee ve angev, shi iangev mbi a bee ior la har sha mngee u jighjigh ve u nan ga. (Luka 6:19; Yohane 5:5-9, 13) Nenge ase yô, Yesu nder mbakpenev shin ku je kpaa!—Luka 7:11-17; 8:40-56; Yohane 11:38-44.

Shin er Yesu er uivande mban nahan kpa, awashima u tom na yô lu u kohol ior eren uivande mba kpilighyol sha er una gema ve hen Aôndo ga. Er Yesu ma er nahan yô, gema hemba veren ishima sha u eren tom u yôôn loho u dedoo u Tartor u Aôndo la. Yesu tese mbadondon un tom u geman ior hingir mbahenen la, man lu u vea tese mbagenev kwagh u ishimaverenkeghen i va lun ken Tartor u Aôndo, ape vea kera gba angev sha won ga la.—Mateu 28:19, 20.

Sha mimi yô, yange i na mbadondon Yesu mbagenev ken derianyom u hiihii la iyua i injaa i been ior angev sha ivande la, nahan kpa lu u á va kar a iyua ne kera. (1 Mbakorinte 12:29, 30; 13:8, 13) Mba fe Mbakristu mba mimi nyian sha tahav mbu been ior angev sha ivande ga, kpa ka sha dooshima u tangen iyol ga, u a magh ve imôngo la. (Yohane 13:35) Uivande mba been ior angev mba i eren ainge mban fatyô u wasen akuraior kposo kposo kua ior mba sha ajiir kposo kposo u hingir Mbakristu mba mimi, mba dooshima u tangen iyol ga la á magh ve ken mzough ga.

Nahan kpa, nongo u Mbakristu ugen gema ngu u dooshima a magh ve gbang gbang je ve lumun u bulan ayol a ve shin ma orgen kpaa ga, kua sha shighe u i lu nôngon ityav kpoghuloo je kpaa yô. Ka hanma nongo laa? Ka Mbashiada mba Yehova. Sha tar cii, i fa ve sha dooshima u sha inja i Kristu u ve lu a mi la. Ka icighan jijingi u Aôndo tseegh una fatyô u kohol ior mba ken akuraior kposo kposo kua ityar man ijô kposo kposo imôngo ken mzough ye, man kwagh ne ka ivande je. Er nan u ze mkombo ve u za nenge iyol you ga?

[Foto u sha peeji 27]

Sha mimi yô, Aôndo ngu a mba been ior angev sha ivande (er mba i tese heen ne) nahanaa?