Mpin U Mbaôron Takerada Ne . . .

Paradiso u I Er Kwagh Na ken Bibilo la Ngu Hana?

▪ Yesu yange tôndo zwa a orgen u na un jighjigh sha ishimataver, u yange lu u una kpen yô, ér: “Ú lu a Mo imôngo ken Paradiso.” (Luka 23:43) Or shon una lu hana? Paradiso la una lu sha shin una lu shin tar gayô una lu hen ma ijiir igen hen atô u sha man tar ape uumace ka ve za kegh shighe u á ôr ve ijir yôô?

Shighe ngu u uter asev mba tsev yange ve lu ken Paradiso yô. Bibilo kaa a vese: “TER Aôndo er sule ken Eden vegher u sha ityoughkitaregh, ver or u A er la keregh. . . . Tsô TER Aôndo tôô or la ver un ken sule u Eden, sha u a̱ sôron u man a̱ kuran u kpaa.” (Genese 2:8, 15) Shighe u i gema mkaanem man ken zwa Grika la, i nger ishember i “sule” la ken zwa Grika ér pa·raʹdei·sos, man ka ishember ne kpa i gem i ken zwa Tiv ér “paradiso” ye.

Nom vea kwase ka vea maren ônov vea seer yô i gba u vea maa ayou a he a seer, nahan mbamaren asev mba hiihii mbara kpa yange gba u vea gbanger a Paradiso la shighe u tsombor u uumace ua lu kehen seer a seer la, nahan Paradiso shon una kera lu ken Eden tseegh ga. Aôndo yange kaa a ve ér: “Iv nen tar, gema nen u, u̱ lu sha ikyev yen.”—Genese 1:28.

Nahan awashima u un u a gbe se la yô, lu u uumace ve lu ken Paradiso shin tar ne shi ve mar ônov ker kpaa. Yange lu u ve cii vea lu uma ken sule u doonashe shin tar ne, ape iwar i mbakpenev ia lu ga yô. Lu u tar ne ua hingir ya u uumace u tsôron. Kape i lu je ve akaa a igbetar a shin tar ne nga a doo se yum ne! I gba se sha u se lu uma shin tar u doonashe.

Awashima u Aôndo la gemaa? Ei. Gadia Yehova bum a vese ér: “Kape kwaghôron Wam, u a dugh ken zwa Wam, una lu la, una hide her a Mo gbilin ga, kpa una er kwagh u M we ishima yô.” (Yesaia 55:11) Yange i gba uumace anyom nga kar 3,000 yô, Bibilo ôr kwagh u un u “A maa tar man A er u kpaa la” ér, “A gba u er u̱ lu gbilin dang ga,” kpa “A maa u sha er ior ve̱ tema sha u” yô. (Yesaia 45:18) Awashima u Aôndo ne gema ga. Shighe ngu van u Tar ua hingir paradiso yô.

Kwagh u i doo u se fa sha kwagh ne yô, avur a Bibilo kpishi aa á er kwagh u Paradiso la pase er uma una lu shin tar ne yô. U tesen ikyav yô, kwaghôron u profeti u Yesaia la kaa ér: “Vea maa uya man vea tema keregh, vea kaha ishule i ikyon i wain, man vea ya atam a i.” (Yesaia 65:21) Ka han i maan uya, shi i kahan ishule i ikyon i waina? Ka han i ye atam a ikyono? Ka shin tar ne. Anzaakaa 2:21 pase wang ér: “Gadia mbaperapera vea tema sha tar, man mbananjighjigh kpaa vea tema sha u gbem.”

Yesu kpa yange ôr kwagh u paradiso u shin tar ne. Mimi yô, yange ôr kwagh u paradiso u sha la kpaa, kpa a ôr kwagh u paradiso shon sha ci u ior kpuaa tseegh. (Luka 12:32) Ve mban ne ka vea kpe yô, i nder ve shin ku ve yem ve za kohol Kristu ken Paradiso u sha la, sha er vea hemen ior mba vea lu ken Paradiso u shin tar la a Kristu imôngo yô. (Mpase 5:10; 14:1-3) Mba vea tema tor a Yesu sha la vea er kwagh u a kôrcio u nengen sha Paradiso u shin tar la sha inja shi a sôron un vough er atindi a Aôndo a tese nahan yô.

Yesu yange fa je ér ka awashima u Aôndo sha ci u tar ne je la. Gadia un lu sha vea Ter na shighe u i er sule u Eden la. Hanma or u nan lu a jighjigh u nan nyian yô nana fatyô u zuan a uma ken tar u ua va hingir paradiso ken hemen la. (Yohane 3:16) Yesu tôndo zwa a ambaaior la ér: “[Ne] lu a Mo imôngo ken Paradiso.”—Luka 23:43.

[Ape i zough a foto ne yô u sha peeji 26]

© FORGET Patrick/SAGAPHOTO.COM/Alamy