Iniôngon I Uumace Ve Nenge Ér Vea Bee A Ibanave La

MBA ve lu mbanyarev yô, kera mba a zayol u ibanave ga. Kpa i zer nôngon ér a kar a ibanave i uumace cii kera, kpa ka gban sha mi ga. Hii nan ve kwagh a lu nahana? Ityôkyaa yô, mbanyarev soo ér ma or shin ma kwagh môm a̱ na vea gba ican, shin a̱ kar a ve sha aan a ve lu sha mi la sha ga. Tor Solomon u ngise hemen Mbaiserael la yange nger ér: “Nenge, mliam ma mba i kighir ve la, man ve lu a orsurun ve ishima ga; mba ve kighir ve la ve lu a tahav, kpa ve lu a orsurunshima ga.”—Orpasenkwagh 4:1.

Mbautahav kua mba lun a kwagh ave vea fatyô u sôron tar, nahan been a ibanave sha tar keraa? Jijingi u Aôndo yange mgbegha Solomon nger ér: “Nenge ase, ka gbilinkwagh ci ca, ka u zendan ahumbe ityô tsô! Kwagh u a vande huren kera yô, [una] fatyô u hingir jighelaa ga.” (Orpasenkwagh 1:14, 15) Se nenge a mimi u mkaanem man wang sha u timen sha iniôngon i uumace ve nôngon sha ayange ne ér vea bee a ibanave la.

Mbamhen Mba sha Kwagh u Mzeikyura u Ior Cii

Er ken derianyom u sha 19 la, ityar igen kpuaa lu zuan a inyaregh sha ikyômpeni man kpenga u eren hemba er i vanden zuan a mi la yô, ior mba lun tagher tagher mbagenev na ishima tsung sha u been a ibanave. A fatyô u karen akaa a injaa a shin tar ne la sha ior vough vough je he?

Ior mbagenev yange ve hen ér gomoti u tyemimôngo una fatyô u zuan ior mba sha tar cii vea hingir kwagh môm, nahan una kar hanma or inyaregh sha ugbayol mba nan vough vough. Nahan kpa, mbanyarev gema soo mhen ne ga. Kpa mhen u yange i due a mi ér “Hanma or nana̱ na gomoti kwagh er nan fetyô cii, shi nana̱ ngohol kwagh hen gomoti sha mbamgbe mba nan vough” la yange doo ior kpishi je zua ga. Mbakpishiv lu veren ishima ér ityar cii i lu ken gomoti u tyemimôngo ne sha er tar cii ua hingir ijiir i dedoo i zayol a lu her ga yô. Ityar igen kpuaa i lun a kwagh ave yange i nyôr u eren ieren i  gomoti u tyemimôngo shi i er uiceghzwa ér ia nengen sha ior vev “sha ayange a uma ve cii.” Yange ve senge ér ve bee a ibanave kera, or môm ken ityar ve kera kungu ican ga.

Nahan kpa, gomoti u tyemimôngo ne fatyô u been a ior mba wan ayol a ve ikyo tseegh la sha tar kera ga. Ishimaveren i yange i soo ér ior ve̱ lu mba keren mkpeyol u ityôô, kera lun u ve ayol a ve ga la cii gba mnger. Ior mbagenev venda kwagh u wasen mbaatsanev la, ve kaa ér ka a̱ naan mbaatsanev mbagen kwagh mgbeghaa yô, ve kera soo tom u eren ga. Kwagh u Bibilo i er ne ka aie ga, i̱ kaa ér: “Ma orperapera môm u shin tar u nan eren kwagh u dedoo nan eren isholibo ga, nan ngu ga. . . . Aôndo er or dedoo, kpa mba keren u eren akaa sha ayom yum.”—Orpasenkwagh 7:20, 29.

Ishimaveren igen yô, lu kwagh u ior kpishi yilan ér the American Dream la, inja na yô, ka mhen u ior i Amerika yange ve lu a mi ér vea gema tar ve u lu ijiir i dedoo i aluer or kegh iyol i eren tom tsô yô, nana̱ lu yôugh yôugh la. Ityar kpishi sha tar yange i tsua hemen u gomoti u ader a pupuu shi ve bugh ikyômpeni shi ve lu eren ikpenga kpaa; ve lu nengen ér ka akaa a a ne ve tar u Amerika u lu a kwagh ave je la. Kpa ka hanma tar yange u fatyô u eren kwagh u tar u Amerika soo ér hanma or u ken tar ve nana̱ lu la ga; kwagh lu nahan sha ci u veghertar u i yer ér North America la yange lu a inyaregh lu sha ci u gbenda ugomoti mba hen ijiir la hemen la tseegh tsô ga. Atôakyaa a vesen a yange na ve tar u Amerika lu a inyaregh yô, lu akaa a injaa a i dughun shin inya ken veghertar ne kpishi la, kua ian i tar ne lu a mi i eren kpenga vea ityar igen a ican shio la. Heela tseegh ga, kpenga u tar u eren sha gesa la va ior a liba tseegh ga, shi u na ior gba kpenga kpaa. Ityar i i lu a kwagh ave la ia lumun u wasen igen i i gbe ican la je he?

Gbenda u Nan Ityar i ken Veghertar u Yuropa Iwasen, U Í yilan Ér Marshall Plan la Yange U Bee a Ibanavee?

Shighe u i nôngo Ityav Mbi Tar cii Mbi sha Uhar i bee la, i vihi tar u Yuropa kaca kaca, shi ijen lu nôngon u wuan ior kpishi. Yange ishima nyian gomoti u tar u Amerika sha kwagh u msamber u gomoti u tyemimôngo lu samber ken Yuropa la. Nahan anyom a nyiin cii, tar u Amerika lu nan ityar i yange i lumun hemen ve la inyaregh kpishi ér ve hide ve sôr ikyômpeni ve her shi ve kaha ishule. Ior kpishi yange ve nenge gbenda u i due a mi u̱ nan veghertar u Yuropa iwasen, u i Yilan ér Marshall Plan la ér ka mzehemen. Tar u Amerika yange u wase ityar i shin Ityôtar i Yuropa la kpishi, nahan i kera nyôr ken ibanave i vihin tsung ga. Kwagh ne lu gbenda u been a ibanave sha tar ciilii?

Er kwagh u Marshall plan ne lu zan doon yô, gomoti u tar u Amerika na ityar i gban ican sha tar cii iwasen, nahan kwagh ne wase i u seer tomsule man ayouacii man imakeranta kua igbenda i zenden kpaa. Tar u Amerika pase wang ér awashima ve u nan ior iwasen la yô, lu u keren mtsera u tar u Amerika. Ityar igen kpa nôngo ér ia seer lun a tahav, sha u nan ityar kposo kposo iwasen. Ityar ne vihi inyaregh hemba ki yange Amerika vihi sha kwagh u Marshall Plan la ica je. Shin er ityar ne i ne iwasen ne anyom a kar akunduatar nahan kpa, kwagh u injaa due ker ga. Ka mimi ityar igen i yange i vande lun ken ibanave la hingir u lun a kwagh ave mgbeghaa, hemban je yô, ityar i sha Ityoughkitaregh ki Ashia la. Nahan kpa, sha ajiir agen yô, er iwasen ne na mbayev pande u kpen shi mbayev kpishi lu henen imakeranta nahan kpa, ityar kpishi za hemen u lun ken ibanave tsung.

Er I Hii Ve Iwasen i Nan Ityar Igen la I Bee a Ibanave Ga Yô

U wasen ityar i lun ken ibanave sha u i due ken ibanave kera la yange hemba taver a u wasen ityar i lun a kwagh ave la u hiden sôron ityar ve shighe u ityav bee kera la. Veghertar u Yuropa yange vande lun a ikyômpeni man igbenda i zenden, shi eren kpenga. Yange gba u a hide a sôr a sôr akaa ne tseegh. Kpa ken ityar i i gbe ican yô, ityar igen yange ia na i iwasen sha u eren i igbenda i zenden sha mi shin maan i imakeranta kua ayouacii je kpa, ior ve za hemen u lun ken ibanave tsung, sha ci u ityar la ban a ikpenga i eren kua akaa a injaa a i dughun shin inya la man igbenda i eren ikpenga.

 Uzayol mba ka ve va a ibanave man uzayol mba ibanave ka i va a mi la wa ker kpelegh kpelegh tsô. Ikyav i tesen yô, angev ka mbu na or nyôr ken ibanave, ibanave shi ka i na or nyôr ken uange. Mbayev mba kwaghyan a ban ve, shin ve ye kwaghyan u injaa ga yô, ka ve kera taver iyol ga, shi kwagh ne ngu a bende a mhen ve kpaa, nahan zum u ve we ikyondo kpa ve kera fatyô u koson ônov vev ga. Shi zum u ityar i i lu a kwagh ave ka ia tôô kwaghyan u neer i ia za na ityar i i lu ken ibanave la ér ka “iwasen” yô, mbasulev kua mbakpengav mba hen ityônya ka ve kera lu a kpenga ga, nahan kwagh ne a seer van a ibanave cii. Aluer mba tindin a iwasen hen ugomoti mba ityar i gban ican yô, alaghga kwagh ne una va a ican i yan hulugh hulugh: Ka i lu ior zange u iin akaa a i ne iwasen a mi la, nahan kwagh ne a va a anyighe, anyighe di a seer van a ibanave. Jighilii yô, iwasen i ityar igen i ne la wase ga, sha ci u i fatyô u been a tamenkwagh u a ne ibanave la ga.

Kwagh U A Ve a Ibanave Yô

Ka er ityar kua ugomoti kua ior ve eren akaa sha ci u keren mtsera ve tseegh la ve ior ve lu ken ibanave tsung nahan ye. U tesen ikyav yô, ugomoti mba ityar i lun a kwagh ave la na ishima sha kwagh u been a ibanave sha tar kera tsembelee ga, sha ci u i na ve a na ishangen nahan gba u vea er kwagh u mba ve ne ve ishangen la ve soo yô. Sha nahan yô, ve yange mbasulev mba ken ityar i i lu ken ibanave la u za teen iyiav vev ken ityar i lun a kwagh ave la sha er mbasulev mba ken ityar i lun a kwagh ave la vea gba kpenga ga yô. Shi mbahemenev mba ken ityar i lun a kwagh ave ka ve pande inyaregh kpishi ve kimbi mbasulev mba ken tar ve, sha er vea wase ve ve̱ hemba teen iyiav vev a mbasulev mba ken ityar i lun ken ibanave la yô.

Sha nahan yô, ka uumace ve ve a ibanave je ka u henen a hen ga, gadia ieren i ior kua ugomoti i keren mtsera ve la ka ieren i uumace. Solomon, u lu môm ken mba ve nger Bibilo la ngise nger nahan ér: “Or ka nana lu a tahav sha orgen yô, nan eren nan ican.”—Orpasenkwagh 8:9.

Sha nahan yô, ishimaverenkeghen ngi i va been a ibanave je he? Ma gomoti ngu u una fatyô u geman mlu u orumace yôô?

[Ngeren u kiriki sha peeji 6]

Tindi u Nôngon a Ibanave

Yehova Aôndo yange na ikyurior i Iserael u ngise la atindi a yange vea kor yô, ior kpishi ma lu ken ibanave ga yô. Tindi yange kaa ér, i̱ na hanma tsombor dyako u inyaagh, saa kwe u Levi u u lu kwe u upristi la tseegh. Yange lu u dyako u tsombor una gba saan ga, gadia lu kwagh u or nana yam inya nana saa a mi ga. Anyom yange aa kar 50 yô, i gba u a hide a inya i hanma or a na nan shin tsombor u nan. (Levitiku 25:10, 23) Yange angev shin aikyôr gayô hwev mbua na a gba u or nana tee inya i nan yô, i gba u a hide a mi a na nan gbilin sha inyom i Jubili la. Nahan lu u tsombor môm ua kera lu ken ibanave i ikyov ikyov ga.

Kwagh ugen u Tindi u Aôndo yange na ior ian i eren yô, lu u or u nan nyer ken mtaver yô nana fatyô u teen iyol i nan hingir kpan u orgen. Yange nan tsenga ngohol inyaregh sha anyom a i gbe u nana er tom kpan la, nan kimbi anzô a nan a mi. Yange nana kera fatyô u paan iyol i nan sha inyom i sha utaankaruhar la ga yô, i gba u a pase nan a tuhwa shi a na nan samuyia kua ilev sha er nana shi a za hii tom sule u nan yô. Heela tseegh ga, yange a gba u or nana na icanor injô yô, i gba u nana wa mtsera sha mi ga, Tindi yange tswer Mbaiserael u wan mngerem sha injô i ve ne anmgbianev vev la. Shi Tindi yange kaa ér ior ve de sondo ikpisule ve i̱ been ga, sha er mbaatsanev vea yar twar her yô. Sha nahan yô, lu u Oriserael môm nana zamber kwaghyan ga.—Duteronomi 15:1-14; Levitiku 23:22.

Nahan kpa, yiase tese ér Mbaiserael mbagenev yange ve nyôr ken ibanave. Er nan ve kwagh lu nahana? Ityôkyaa yô, Iserael kura Tindi u Yehova ga. Nahan ior mbagenev hingir mbanyarev mba lun a inya, mbagenev hingir atsanaior a lun a inya ga, er ken ityar igen kpishi kpa lu nahan. Mbaiserael mbagenev lu ken ibanave sha ci u ve kera wa ikyo sha Tindi u Aôndo ga, shi ve wa ikyo sha mkpeyol ve hemba u mbagenev.—Mateu 22:37-40.