Mpase 4:1-11
4 Kwagh ne eren kera yô, m lu kenger, tsô nenge! hunda ugen sha lu ivegher, maa m ungwa ikyenge i hiihii, i̱ kaa er ka busa nahan, i̱ lu ôron kwagh a mo kaan ér: “Va sha heen, me tese u akaa a i gbe u aa er keng yô.”
2 Kwagh ne eren kera yô, fese je maa tahav mbu jijingi hii u eren tom ken a mo, tsô nenge! ikyônough ki torough lu sha hen ijiir i ki, shi or tema sha ikyônough ki torough ki shon.
3 Un u tema sha ki la lu er ka iwen i yasepa man iwen i sardiu* nahan. Ikyume kase ikyônough ki torough kira ningir tser, i̱ lu iyol er iwen i emeradi* nahan.
4 Mkônom ma torom 24 kase ikyônough ki torough ki shon, tsô m nenge a mbatamen 24 tema sha ma, ve haa akondo a pupuu iyol, hanmô ve cir idyer i tor i sha zanaria sha ityou.
5 Inyiar man amo kua idyuran lu duen ken ikyônough ki torough kira; shi amenger a usu ataankarahar lu yeghen hen ishigh ki ikyônough ki torough kira, amenger ne tile sha ityough ki ujijingi mba Aôndo mba utaankaruhar mbara.
6 Kwagh lu hen ishigh ki ikyônough ki torough kira er ka zege gelase u lun a mngerem shimi nahan, lu er ka krista yô.
Akaauma anyiin a lun a ashe iyol kpulughuu, ken ishi man ken ijime cii, gema lu hen atô vea* ikyônough ki torough kira, kase ikyônough ki torough ki shon wa atô.
7 Kwaghuma u hiihii la lu er ka begha nahan, kwaghuma u sha uhar la lu er ka gumbua nahan, kwaghuma u sha utar la lu ishigh er ka or nahan, kwaghuma u sha unyiin la di lu er ka igyuve i̱ i̱ lu purugh nahan.
8 Akaauma a anyiin la cii, hanmô yô lu a akper ataratar; ashe lu sha mi kpulughuu ningir tser, ken won kua kimi. Akaauma la lu ôron nduuluu, atetan man tugh cii, ér: “Icighan, icighan, icighan Yehova* Aôndo, un ka U Hemban Agee Cii, u ngise lu, shi a lu, shi a lu van la.”
9 Hanma shighe u akaauma la a lu wuese iengem i Un u a tem sha ikyônough ki torough kira, Un u a lu lun zan zan gbem sha won la, shi nan un icivir shi sughun un cii yô,
10 mbatamen mba 24 mbara ve gba ve cir ishigh inya sha ishigh ki Un u a tem sha ikyônough ki torough la, ve civir Un u a lu lun zan zan gbem sha won la, shi ve bugh ader a tor a ve, ve haa sha ishigh ki ikyônough ki torough kira, ve gba kaan ér:
11 “We Yehova,* Aôndo wase, u kuma u ngohol iengem man icivir man tahav, sha ci u u gba akaa cii, shi ka sha ishima you a hingir u lun, shi yange i gba a ye.”
Ngeren mba shin kpe
^ Shin “iwen i injaa i lun nyian.”
^ “Iwen i emeradi” ka i lu iyol ikyôn ikyôn, shi i nenge tsura.
^ Shin “lu vea.”
^ Nenge Ngeren u Pasen Asember.
^ Nenge Ngeren u Pasen Asember.
