Yohane 16:1-33
16 “M ôr ne akaa ne sha er ne undu jighjigh wen u nan* ga yô.
2 Ior vea dugh ne ken shinagoge kera. Jighilii yô, shighe ngu van u hanma or u nana wua ne cii, nana hen ér nan er Aôndo icighantom yô.
3 Kpa vea er akaa ne sha ci u ve fa Ter shin mo kpaa ga.
4 Nahan kpa, m ôr ne akaa ne sha er zum u shighe a kuma u aa er yô, ne umbur er yange m ôr ne a yô.
“Sha hiihii la m ôr ne akaa ne ga, sha ci u m lu vea ven imôngo.
5 Kpa hegen ne, m ngu yemen hen Un u a tindim la; nahan kpa, mô wen môm nan pinem ér, ‘U ngu zan hana?’ ga.
6 Kpa er m er ne akaa ne yô, asema a en iv a ijungwen.
7 Nahan cii kpa, ka mimi je m kaan ne ye, m ngu yemen ka sha ci u iwasen yen. Gadia aluer m yem ga yô, orwasen la una va hen a ven ga; kpa aluer m yem yô, me za tindi un hen a ven.
8 Man zum u un shon la una va yô, una pase tar kwagh u a lu isholibo la wang, kua kwagh u a lu perapera man ijirôron la:
9 una hii sha kwagh u isholibo, sha ci u ve nam jighjigh ga;
10 maa una gba sha kwagh u perapera, sha ci u m ngu yemen hen Ter, ne kera nenge a mo ga;
11 maa una va sha kwagh u ijirôron, sha ci u i vande ôron tor u tar ne ijir kera.
12 “M shi a akaa kpishi a ôron ne, kpa ne fatyô u kaven a hegen ga.
13 Kpa zum u un shon la* una va yô, ka jijingi u mimi la je la, una wase ne u kaven mimi cii, gadia una gba ôron kwagh sha mnenge na ga, kpa ka kwagh u a ongo la una ôr ye, shi una pase ne akaa a aa va er la kpaa.
14 Ngula una nam icivir, sha ci u ka kwagh u una ngohol hen a mo la una pase ne ye.
15 Akaa a Ter a lu a mi cii ka a am. Ka nahan ve m kaa mer ka kwagh u una ngohol her a mo la una pase ne ye.
16 Shi kpuaa tsô ne kera nenge a mo ga, shi shighe una karen kpuaa yô, ne nenge a mo.”
17 Tsô mbahenen nav gba pinen ayol a ve ér: “Inja i kwagh u a lu ôron a vese ne ér nyi? A kaa ér, ‘Shi kpuaa tsô ne kera nenge a mo ga, shi shighe una karen kpuaa yô, ne nenge a mo,’ man, ‘sha ci u m ngu yemen hen Ter.’”
18 Nahan ve lu kaan ér: “Inja i kwagh u a kaa ér, ‘shi kpuaa’ la ér nyi? Se fa kwagh u a lu ôron la ga.”
19 Yesu fa er ve soo u pinen un kwagh yô, nahan a pine ve ér: “Ne mba pinen ayol a en kwagh ne sha ci u m kaa mer: ‘Shi kpuaa tsô ne kera nenge a mo ga, shi shighe una karen kpuaa yô, ne nenge a mo’ yumuu?
20 Mimi mimi je* me kaa ne, ne va vaa, shi ne gber kwelegh, kpa tar ua ember; ne zungwe, kpa a va gema ijungwen yen la ia hingir iember.
21 Kwase ka nana toghor mar yô, i nyoon nan* sha ci u shighe kuma u nana mar, kpa ka nana va maren wan shon yô, nan kera umbur ican i nan la ga, sha ci u iember i nan zough a mi i maren or shin tar la.
22 Nahan ne kpaa, hegen ne mba zungwen; kpa shi me va nenge a ven, nahan asema a en aa iv a iember, man or môm nana kar a iember yen la kera ga.
23 Sha iyange la, ne kera pinem ma kwagh ga. Mimi mimi je me kaa ne, aluer ne sôn Ter nyityôkwagh cii kpa, una na ne ken iti yam.
24 Zan zan hegen kpa, ne mba a sôn ma kwagh ken iti yam ga. Sôn nen, nahan a na ne, sha er iember yen ia iv yô.
25 “M ôr ne akaa ne sha anzaakaa. Shighe ngu van u me kera ôr ne kwagh sha anzaakaa ga, kpa me ôr ne kwagh u Ter wang yô.
26 Sha iyange la, ne sôn Ter kwagh ken iti yam; er m lu ôron nahan kpa, m ngu kaan mer me sôn kwagh sha ci wen ga.
27 Gadia Ter iyol na kpa ne doo un ishima, sha ci u m doo ne ishima, shi ne na jighjigh ner ka Aôndo a tindim ye.
28 Ka Ter a tindim m ve shin tar ye. Nahan er m lu undun tar ne hegen yô, m ngu yemen hen Ter.”
29 Mbahenen nav gema kaa ér: “En-heen, hegen u ngu ôron se kwagh wang wang, kera ka sha anzaakaa ga.
30 Hegen se fa er u fe akaa cii yô, nahan kera gba u ma or nana pine u kwagh ga. Ka nahan ve se ne jighjigh ser u due hen Aôndo ye.”
31 Yesu gema kaa a ve ér: “Ne na jighjigh hegenee?
32 Nenge! Shighe ngu van, man a kuma kpaa, u a sambe ne cii, hanma wen nana yem hen ya u nan, ne undum tswen yô. Kpa m ngu tswen ga, sha ci u Ter ngu vea mo.
33 M ôr ne akaa ne sha er ne zua a bem hen a mo yô. Ican ia er ne shin tar ne, kpa taver nen ishima! Mo m hemba tar.”
Ngeren mba shin kpe
^ Zwa Grika, “ne nôngo gbeev.”
^ Ishember i “un shon la” i hen ivur 13, man 14 la ngi ôron kwagh u “orwasen” u i er kwagh na sha ivur 7 la. Yesu yange yila icighan jijingi ér “orwasen” inja er ka or nahan (kpa ka tahav, ka or ga).
^ Zwa Grika, “Amen, Amen.” Nenge Ngeren u Pasen Asember.
^ Zwa Grika, “ka nan zungwe tsung.”
