Yange orgen kôr Annette ta inya cii ve Annette mase kaven kwagh u or shon soo u eren a na ye. Annette kaa ér: “Yange m er hanma kwagh u m fatyô cii sha er una pasem yô. M nôngo mer me ngor, kpa ikyenge due ga. M lu daan un, tumen un angahar, tan un azu shi tsumban un akughur. Lu hen shighe ne or ne vihim iyol sha ihyô ye. Maa m cia, m kera nagher ga.”

A lu we nahan yange ma u er nena?

Shin er ka wea zenden ken won tugh ve u wa ikyo sha u kwaghbo a de eren we ga, u lu tsevaa nahan kpa, akaabo aa fatyô u tseren we. Bibilo kaa ér: “Ayem a gban ka or u fefa nan hembe ga, . . . icivir kpaa ngi sha ci u mbahemban fan kwagh ga; gadia shighe man aikyôr mba ve sha gbenda ve cii.”—Orpasenkwagh 9:11.

Mbayev mbagen, er Annette nahan, mba tagher a ior mba ve fe ve ga, mba ka ve kôr ve ér vea yav a ve sha igyosor yô. Mbayev mbagen yô, ka i lu ior mba ve fe ve dedoo je, shin mba hen icombor ve. Wankwase ugen iti na ér Natalie. Shighe u lu anyom pue la, wannomso ugen u lu ya ikyua a na yô, kôr un yav a na sha igyosor. A kaa ér, “Sha hiihii la, yange cier mo iyol shi kunya kôrom a iyol yam kpishi, nahan m ôr or môm kwagh sha mi ga.”

Zan zan hegen kpa ishima ngi nan Anete ibo sha kwagh u yange er un la. A kaa ér, “Ka m zer henen sha kwagh u yange za hemen hen tugh mbura ken ishima gbem. M nenge mer yange ma m nagher ma hemba nahan, ma m osough. Kpa yange kuman mo ihyô yô, mciem gbam iyol, maa m kera nagher ga. Kpa m nenge mer doo u yange ma m nagher her.”

Natalie kpa ishima ngi nan un ibo her. A kaa ér: “Yange m tôô mer kwagh a erem nahan ga, man doo u yange ma m nenge nahan ga. Mo man anngôm u kwase cii mbamaren asev wa se tindi ér se luun imôngo shighe u se lu numben ken won yô. Kpa m ungwa ga. Nahan lum er ka mo je m bugh wan u ya na dondo a ya wam la gbenda u bulan mo nahan. Kwagh ne yange vihi tsombor wam kpishi, shi lum er ka mo je m ne tsombor wam ishimavihin yum nahan. Ishima hemba vihin mo sha kwagh ne cii.”

Aluer ishima ngi nan we ibo er Anete man Natalie nahan yô, umbur wer or u i kighir nan i yav a nan cii yô, nan yav a or sha ishima i nan ga. Ior mbagenev na yô, ka inja er kwaghbo ne ka beerkwagh nahan. Kwagh ka una er nahan yô, ve kaa ér kera kpa kape mbayevnomso ve eren je la, shin ve kaa ér, or u i yav a nan sha igyosor la nan ker i iyol i nan. Kpa or môm tsô nan soo ér i yav a nan sha igyosor ga. Aluer i kighir we i yav a we nahan yô, ka ibo you ga!

Ka mimi, u ôron kwagh u i nger ér “ka ibo you ga” la ka zange, kpa u nan jighjigh a mi yô, a gema a lu ican kpishi. Mbagenev mba henen sha kwagh u vihin u yange er ve la her, nahan ishima ngi nan ve ibo shi mba zungwen kpaa. Kpa aluer u gba teman a kwagh ne ving nahan, ka an a hemba wasen nana? Ka we shin ka or u a nzughul a we la? Nahan doo u u gba teman a mi ving nahan ga; kwagh ugen ngu u i gbe u u er yô.

Bibilo kaa ér zum u orjighjigh Yobu lu yan ican ken ishima tsung yô, a kaa ér: “Me ôr kwagh sha ishimavihin yam i tsung la.” (Yobu 10:1) We kpa aluer u er nahan yô, a wase u. Aluer u ôr or u u ne nan jighjigh kwagh ne yô, nana wase u u hemba kaven inja i kwagh u a er u la, man er u er ve ishima a pande u zan we iyol sha kwagh shon la kpaa.

Anete nenge ér kwagh ne ka mimi. A kaa ér: “Yange m ôr ijende yam igen, nahan a wam kwagh ér mo m ôr mbatamen mbagenev ken tiônnongo. Doom kpishi er yange m er kwagh la yô. Yange ve tema a mo acin imôngo ve ôrom kwagh u nam mo ishimasurun, ér mo m de kera, kwagh u yange erem la ka ibo yam ga. Kwagh u er la cii lu ibo yam ga.”

Natalie yange ôr mbamaren nav er i yav a na sha igyosor yô. A kaa ér, “Yange ve nam ishô. Ve wam kwagh ér m ôr mbagenev kwagh sha mi. M eren nahan yô, ishima yam saan.”

Netalie shi yange zua a ishimasurun sha msen u eren. A kaa ér, “Yange m lu lamen a Aôndo ken msen, nahan kwagh la wasem kpishi, hemban je yô hen shighe u m lu nengen mer me fatyô u teren orumace môm kwagh sha mi ga la. Ka mea er msen yô, m fatyô u ôron kwagh wang. Msen ngu a na m zua a bem ken ishima shi i kundum iyol kpaa.”

We kpa u er nahan yô, u zua a “shighe u waren.” (Orpasenkwagh 3:3) Nenge sha iyol you tsembelee shi eren akaa a nan we msaanyol. Mem tsembelee. U hemban cii yô, suur sha Yehova, Aôndo u a surun se asema la.—2 Mbakorinte 1:3, 4.

Aluer u ngu wanyekwase man ishiôr you ngi kighir we ér u er kwagh u a wanger ga yô, venda a na shia shia, kpa a lu kwaghbo ga. Kaa a na wang wer, “De kwagh la!,” shin “De benden mo uwegh iyol ga!” De cian wer nana va undu u ga. Aluer nan undu u sha ityôkyaa la yô, nan kuma u sôôr we ga! Gba u u lu a ishiôr i injaa, i ia na u icivir shi ia tese icivir sha gbenda u u eren kwagh la yô.

“Shighe u m lu ken kôleeji la, mbayevnomso mbagenev va gbam uwegh sha kwara-atumba, ve lam alam a dang sha a mo, ugen la kaa ér aluer ve yav a mo yô, a doom gbem.”—Mkaanem ma Coretta, wankwase ugen.

U nenge wer mbayevnomso mbara yange ve

1. Lu eren a er asenge a naa?

2. Lu hian a hia a naa?

3. Lu zan un iyol ér vea yav a naa?

“Shighe gen la m lu yemen shin bôôsu, nahan wannomso ugen hii u lamen alam a dang sha iyol yam, shi za uwegh kôrom. M daa un uwegh kera, m kaa a na mer a hide keera. Maa hide lu kenger mo er m shi iyol nahan.”—Mkaanem ma Candice, wankwase ugen.

U nenge wer ka nyi yange wannomso ne lu eren a Kandis?

1. Lu eren a er asenge a naa?

2. Lu hian a hia a naa?

3. Lu zan un iyol ér vea yav a naa?

“Ken inyom i i bee la, wannomso ugen zer a mo ér kwagh wam doo un shi un soo u man ahumbe vea mo, shin er m zer vendan a na nahan kpaa. Shighe ugen a ovur mo ave iyol. M kaa a na mer a de kwagh la, kpa soo u den ga. Kwagen la m ngurum m lu wan akôv, maa va gbidyen uwegh sha atô.” —Mkaanem ma Bethany, wankwase ugen.

U nenge wer yange wannomso la:

1. Lu eren a er asenge a naa?

2. Lu hian a hia a naa?

3. Lu zan un iyol ér vea yav a naa?

Ken mbamlumun mbara cii, ka u sha mpin u sha 3 la a lu u shami ye.

Er nan ve u hian a or la i lu kposo a u hiin nan shin zan nan iyol ér a yav a nanaa?

Ior mba zan or iyol ér vea yav a nan mba hidi ijime ga. Or la ka nana vendan a ve kpa ve deen ga

Ieren ne ka beerkwagh ga. Ka i na yô, i va hingir u yaven a or sha ipila.