Orgen lu ken tar u Ushi, u civir Yehova yô. Iti na ér Yobu. Lu a inyaregh kpishi shi mar ônov ngee. Lu or u fan kwagh, shi wasen atsanaior man kasev mba noov vev kpe undu ve yô, kua mbayev mba lun a ormaren ga. Kpa er Yobu lu or u eren kwagh u vough yô, lu u mayange je una nyôr ken zayol gaa?

Satan Diabolo lu nengen kwagh u Yobu lu eren ne, kpa Yobu fa ga. Tsô Yehova pine Satan ér: ‘U fa kwagh u Yobu, or u a civir mo la kpa? Orgen môm shin tar kuma sha a na ga. Ungwan imo yam shi eren kwagh u vough.’ Satan gema kaa ér: ‘Ka mimi Yobu ungwan we. Gadia u ngu kuran un shi u ver un doo doo. U na un inya kua ilev. Ngohol ase akaa a a lu a mi la tsô u nenge er una de u civir we yô.’ Yehova maa kaa a na ér: ‘U fatyô u karen Yobu nengen. Kpa m na u ian mer wua un ga.’ Er nan ve Yehova yange de ér Satan a̱ kar Yobu? Yange fa dedoo ér Yobu una gba ga.

Satan yange za hii u karen Yobu sha u eren un atsan atô kposo kposo. Hiihii yô, a tindi ior mba i yilan ve ér Mbasabea la ve za ii Yobu ibua kua ujaki. Ka been yô, usu tim iyôngo i Yobu cii. Shi kweior ugen, Mbakaldi, va ii Yobu urakumi cica cii. Mbatomov mba ve lu nengen sha ilev mbin cii i wua ve. Tsô kwagh u hemban vihin cii er Yobu. Ônov nav cii kpe ken iyou. Zum u ve lu eren iniongo ken iyou shon yô, i yôhôr i kighir ve. Nahan ishima vihi Yobu kpishi, kpa de u civir Yehova ga.

Satan yange soo ér Yobu a ya ican i hemba nahan. A er avav gba Yobu iyol cica cii, nyoon un kpen kpen. Yobu fa  kwagh u na ve akaa ne lu eren ga. Nahan kpa, Yobu lu civir Yehova her. Aôndo yange nenge akaa ne cica cii, nahan doo un a Yobu kpishi.

Tsô shi Satan tindi iorov utar mbagenev ér ve za kar Yobu. Ve va kaa a na ér: ‘A̱ shi nan kpa u er isholibo u ngu yeren. Ka isholibo you la Aôndo a tsahan we sha mi ye.’ Yobu kaa a ve ér: ‘M er ma kwaghbo ga.’ Kpa Yobu gema hii u henen ér ka Yehova a lu eren un ican la ye, nahan a kaa ér Aôndo ngu eren a na sha inja ga.

Gumor ugen i yilan un ér Elihu; yange tema ving lu ungwan er iorov mba utar mbara lu lamen vea Yobu yô. Maa va kende kaa a ve ér: ‘Ne cii akaa a ne lu ôron la ka shami ga. Yehova hemba kwagh u se fe la ica je. Mayange una er kwagh u ifer ga. A fa hanma kwagh shi wasen ior ken mbamzeyol vev.’

Yehova maa lam a Yobu. A pine un ér: ‘Shighe u yange m lu eren sha man tar la, u lu hana? Er nan ve u lu kaan wer m ngu eren a we sha inja ga? U ngu ôron kwagh, kpa u gema u fa er i hii ve akaa ne a lu eren ga.’ Yobu lumun ibo, gema kaa ér: ‘M tsume. M ungwa kwagh wou, kpa ka hegen m fe u kpôô kpôô ye. Kwagh môm u hemban we ngu ga. Mea fe yô, ma m ôr kwagh nahan ga.’

Satan karen Yobu been yô, Yehova hide na Yobu hingir gbong gbong her shi na un akaa hemba er yange vande lun a mi la. Yobu tsa sha won kpishi, shi lu ken msaanyol zan zan kar kpen. Yehova yange ver Yobu doo doo sha ci u a ungwa imo na hen shighe u taver u eren nahan je kpaa. A lu nyi je ia er kpa, u lu er Yobu nahan shi u za hemen u civir Yehova her kpa?