1, 2. Ka ityom i taver i nyi yange i tindi Eliyaa, man Ahaba lu inja kposo a na nena?

ELIYA yange soo u zan hen ijiir i or lu ga yô, za eren msen hen Ter na u sha la. Kpa ikpelaior i í kase un la sember nengen er a er msen usu due sha yô, nahan ve kpishi ve lu a na ikyooso ikyooso sha u a ver ve doo doo yô. Lu u Eliya una vande zan ityom igen i taver, una been yô una kôndo sha ityough ki Uwo u Karmel una za er msen hen Yehova un tswen. Aôndo yange tindi un hen Tor Ahaba.

² Mlu u iorov mba uhar mban kaha kpishi je. Ahaba hua ikyondo i icivirigh i tor, lu or u wan hua, u yange venda Aôndo shi lu or u tsoghul ishima sha kwagh ga yô. Eliya di gema hua ikyondo-tom i profeti; a̱ shi nan kpa, lu ikyondo i elemee i sha ikyôvough ki inyamegh shin lu ikyondo i í tume i sha ice rakumi shin ice ivo yô. Un lu or u taver ishima, u tilen sha mimi man u lun a jighjigh kpaa. Iyange i í ta ikyaren i fan Aôndo u mimi ne lu nôngon u been hen shighe ne, man kwagh u Ahaba vea Eliya er sha iyange ne la tese er ve lu anza kposo kposo yô.

3, 4. (a) Ahaba man mbacivir Baal mbagenev ya kunya sha iyange i tan ikyaren la nena? (b) Ka mbampin mba nyi se lu timen sha mi?

³ Ahaba man mbacivir Baal mbagenev ya kunya sha iyange ne. I er kwagh a kwaghaôndo u mba civir akombo, u Ahaba vea Torkwase na Yesebel va a mi ken tartor u ikwe pue i Iserael la vihi kpishi. I pon Baal ér ka gbilinkwagh u dang. Uprofeti mba aôndo u lun a uma ga ne, genger amo yila aôndo ve, vine amar shi tôndo avav ayol ér a̱ ungwa ve kpa kanshio u tindin a usu ér u̱ nande nagh vev kura. Baal fatyô u waren uprofeti nav 450 mba ve kuma ku la ga. Kwagh ugen kpa ngu u Baal kanshio u eren yô, man lu u ica a gba ga tsô á tese myen na ne hanma or nana nenge. Uprofeti mba Baal zamber a na je hemba anyom atar ér a̱ nôô ura, icegh ki ken tar u Iserael la ki bee, kpa Baal kanshio u eren nahan. Lu u ica a gba ga tsô, Yehova una tese mhembe na sha u nôôn ura.—1 Utor 16:30–17:1; 18:1-40.

 ⁴ Kpa Yehova una er kwagh ne hanma shighe? Man Eliya er nyi sha shighe u lu keghen ér Yehova a̱ nôô ura laa? Man kwagh u orjighjigh ne er la tese se nyi? Se time nen sha kwagh ne sha er se zua a mlumun sha mbampin mban yô.—Ôr 1 Utor 18:41-46.

5. Eliya yange kaa a Ahaba ér a̱ er nyi, man ikyav tese ér Ahaba hen kwagh ken akaa a a er sha iyange la je he?

⁵ Eliya yange za kohol Ahaba kaa a na ér: “Kôndo, za ya kwagh, ma kwagh, gadia ihuran i zegeura ngi.” Tor u bo ne hen kwagh ken akaa a yange er sha iyange la je he? Bibilo pase jighilii ga, nahan kpa kwagh u i er ken Bibilo heen ne tese ér yange gema ishima shin zamber a profeti ne ér a̱ er msen hen Yehova a de un isholibo na ga. Er Ahaba ma er nahan la yô, gema mough “kôndo sha u za yan kwagh shi man kwagh kpaa.” (1 Utor 18:41, 42) Eliya di er nena?

6, 7. Eliya yange er msen sôn nyi, man lu sha ci u nyi?

⁶ “Eliya kar za unde sha ityough ki Karmel; a gure inya, a kuma ishigh hen anu na.” Ahaba yem u za yan kwagh, kpa Eliya yô ian due un i eren msen hen Ter na u sha la. Nenge er ivur ne i pase iyolhiden a mi ijime i Eliya yô; a tume anu inya, shi a suwa  ityough inya je er una bende icur inya nahan. Eliya lu eren nyi? Se ker a ker ahaba ga. Yakobu 5:18 kaa a vese ér Eliya er msen sha u ura u nôô icegh ki bee yô. A̱ lu msen shon je lu eren sha ityough ki Uwo u Karmel ne ye.

⁷ Yehova yange vande kaan ér: “Me nôô ura shin tar.” (1 Utor 18:1) Nahan Eliya er msen ér awashima u Yehova ne a̱ kure sha mi. Anyom nga kar er dubu nahan yô, Yesu kpa va tese mbadondon un, ér ve eren msen sha u i̱ er ishima i Aôndo, awashima Na a̱ kure yô.—Mat. 6:9, 10.

8. Ikyav i Eliya la tese se nyi sha kwagh u msen u erene?

⁸ Kwagh u Eliya er ne tese se kwagh u msen kpishi je. Yange hemba gban Eliya ishima u awashima u Aôndo a̱ kure sha mi vough. Zum u se lu eren msen yô, doo u se umbur ser: “Ka sea sôn nyityô kwagh u a lu sha ishima Na vough yô, A ungwa se.” (1 Yoh. 5:14) Sha kpôô yô, gba u se fa kwagh u a lu ishima i Aôndo sha er se er msen hen a na una ungwa se yô—kwagh ne gema ka ityôkyaa i dedoo i se henen Bibilo ayange ayange yô. Sha mimi yô, Eliya kpa yange soo ér icegh la ki bee sha ci u ican i ior nav lu yan la. Shi alaghga lu wuese Yehova kpishi sha ivande i a nenge Yehova er sha iyange la la. Se kpa gba u se eren msen sha ci u mkpeyol u mbagenev shi se eren msen u wuese Aôndo kpaa.—Ôr 2 Mbakorinte 1:11; Mbafilipi 4:6.

9. Ka nyi Eliya yange tindi wanakiriki na ér a ere, man ka aeren a Eliya ahar a nyi se lu timen sha mi?

⁹ Eliya na jighjigh ér Yehova una bee icegh la, kpa gema fa shighe u Yehova una er kwagh ne ga. Nahan profeti ne er nyi shighe u lu keghen ér Yehova a nôô ura laa? Bibilo i̱ kaa ér: “A kaa a wanakiri na er: Kôndo za nenge vegher u shin zegemnger. Tsô a kôndo, a za jinge, a kaa er: Ma kwagh ngu ga. A kaa er: Za, zan zan kuma kwa taankaruhar.” (1 Utor 18:43) Kwagh u Eliya er ne tese se akaa ahar. Hiihii yô, profeti ne lu a vangertiôr ér Yehova una bee icegh la. Kwagh u sha uhar yô, lu tsevaa.

10, 11. (a) Eliya yange tese ér un na uityendezwa mba Yehova jighjigh nena? (b) Se fatyô u lun a imba jighjigh u nan ne sha ci u nyi?

¹⁰ Er Eliya lu a vangertiôr ér Yehova una kure ityendezwa na yô, sar un u nengen a ikyav i tesen ér ura ngu sôôn nôôn. A tindi wanakiriki na ér a kôndo ape una fatyô u nengen ica yô, a za nenge aluer ma ikyav ngi sha kwavaôndo i tesen ér ura ngu sôôn  nôôn yô. Wanakiriki na za hidi yô, a ôr un loho u maan iyol ga cii, ér: “Ma kwagh ngu ga.” Kwavaôndo wanger sha mi wang, abeen lu ga. U nenge a kwagh u taver we sha kwagh ne ve ga̱? A lu u umbur yô, Eliya sember ôron a Tor Ahaba ér: “Ihyuran i zegeura ngi.” A er nan man profeti ne una ôr kwagh nahana? Gadia ibeenegh ki ura tsô lu sha kwavaôndo ga.

¹¹ Eliya lan ityendezwa i Yehova er la ga. Er lu profeti u Yehova shi zaan un ityom yô, a na jighjigh ér Aôndo na una kure mkaanem Nam mara kpee. Eliya lu a vangertiôr kpishi, je yô lu un er un hii u ungwan ihyuran i ura kera kpaa nahan. Kwagh ne umbur se kwagh ugen u i er ken Bibilo ér Mose yange er yô. I kaa ér: “A taver ishima er ngu nengen a u i nengen a Na ga la nahan.” We u nengen wer Aôndo ngu kpôô kpôô kpa? Aôndo er akaa kpishi a se fatyô u nan un jighjigh imba ne shi nan uityendezwa nav kpa jighjigh yô.—Heb. 11:1, 27.

12. Eliya tese ér un ngu tsevaa nena, man shighe u i va kaa a na ér anibeen u cuku ngu sha kwavaôndo yô, a er nena?

¹² Shi nenge ase er Eliya lu tsevaa kpaa yô. Yange tindi wanakiriki na, kwa môm shin kwa har tseegh ga, kpa lu kwa taankaruhar! Alaghga tsô wanakiriki la vôr a ityom i Eliya lu tindin un sha kwagh môm môm gbem ne, kpa er sar Eliya u nengen a ikyav i tesen ér ura ua nôô yô, a gba uwer ga cii. Wanakiriki ne ze kwa u sha utaankaruhar la yô, a kaa ér: “Nenge, anibeen ngu duen shin zegemnger kpuaa er ikyevwe i or nahan.” Nenge ase a wanakiriki la ken ishima you er a dugh uwegh a lu tesen iniembe i anibeen u a dugh sha kwavaôndo vegher u Zegemnger u Tamen la yô. Alaghga tsô anibeen u wanakiriki la nenge a mi la wase un kwagh ga. Kpa Eliya yô, ibeenegh kira lu un zegekwagh. Nahan a ôr wanakiriki na kwagh u una er fese yô, wener: “Mough, za kaa Ahaba wer, sôr ikyekye you, sen sha er ura ua yisa u ga yô.”—1 Utor 18:44.

13, 14. (a) Se dondo ieren i Eliya i lun tsevaa la nena? (b) Ka nyi i tese ér gba u se eren kwagh torough torougho?

¹³ Sha kwagh ne kpa, Eliya ver se ikyav i dedoo kpen kpen. Se kpa se mba uma hen shighe u Aôndo a sôôn eren kwagh u kuren awashima na yô. Eliya yange kegh shighe u icegh kia bee yô; mbacivir Aôndo nyian di mba keghen shighe u tar u ú hôngor ne ua kure yô. (1 Yoh. 2:17) Gba u se za hemen u lun tsevaa sha shighe u Yehova Aôndo a lu a tim tar ne ga ne, vough er Eliya kpa er nahan. Wan u Aôndo, Yesu wa mbadondon un kwagh ér: “Yô, kuran nen, gadia ne fa iyange i Ter wen Una va la ga.” (Mat. 24:42) Kwaghôron u Yesu ne tese ér kwagh môm tsô kpa mbadondon un vea fa sha kwagh u shighe u tar ne ua kure la ga shinii? Ei, gadia Yesu ôr akaa kpishi a tesen er tar ua lu sha ayange a mkur una  mgbôghom la yô. Se cii se fatyô u nengen a akaa a á lu ikyav i tesen ér ‘mkurtar’ mgbôghom yô.—Ôr Mateu 24:3-7.

¹⁴ Hanma kwagh u a lu ikyav la yô, tese se wang ér mkurtar mgbôghom. Ikyav ne kuma u ia mgbegha se se gema eren Yehova tom torough torough kpa? Eliya yange nenge a anibeen sha kwavaôndo kpuaa tseegh kpa na jighjigh ér Yehova sôôn nôôn ura. Profeti u jighjigh ne va ahengee?

15, 16. Shighe u anibeen due sha kwavaôndo la, lu nyi i er fele fele, man alaghga Eliya lu veren ishima ér Ahaba una er nyi?

¹⁵ Bibilo kaa ér: “Tsô [ka] tem dôghôô yô, kwavaôndo ile dimii sha abeen kua ahumbe, zegeura gba. Tsô Ahaba henda ikyekye, yem ken Yesereel.” (1 Utor 18:45) Akaa yange er hen shighe la fele fele. Er wanakiriki u profeti ne lu ôron Ahaba loho ne zan a mi ave la je anibeen la samber, kwavaôndo ile dimii. Zege uraahumbe gba karen. Tsô ura nôô, icegh ki ki za ken tar u Iserael anyom atar man tiôn la maa bee. Ikpoghonya i ken tar la ma mngerem ma uram mara. Er ura la lu nôôn her kpishi la, ifi u Kishon va iv poo, man a̱ shi nan kpa, mngerem mara kua a awambe a uprofeti mba Baal mba i wua la. Mbaiserael mba hembanato mbara kpa, zua a ian hegen i timin mcivir u Baal ken tar ve kera, sha er Yehova una de ve asorabo a ve yô.

¹⁶ Eliya lu veren ishima ér kwagh a lu nahan kpee je! Alaghga lu henen ér, shin Ahaba nenge akaa a a lu zan hemen ne nahan, una er nena-o? Una gema ishima a de u civir Baal kpa? Kwagh u er sha iyange ne la lu kwagh u vesen u yange ma wase Ahaba ma gema ishima yô. Se fa kwagh u Ahaba lu henen ken ishima hen shighe la ga. Bibilo kaa di tsô ér: “Ahaba henda ikyekye, yem ken Yesereel.” Kwagh u er la tese un kwaghfan je he? Yange kange ishima ér una gema inja kpa? Akaa agen a a mase eren sha iyange ne la tese ér Ahaba er kwagh nahan ga. Er lu aikighe nahan kpa, kwagh u Ahaba man Eliya lu a bee ga.

17, 18. (a) Er Eliya lu yemen sha gbenda u zan ken Yesereel la, lu nyi i er unu? (b) Kwagh u Eliya yange hii ayem hen Karmel, yevese zan zan kar za aren Yesereel la kpiligh iyol nena? (Nenge ngeren u shin kpe la kpaa.)

¹⁷ Profeti u Yehova ne kpa mough gba yemen sha gbenda  shon môm u Ahaba yem la. Lu gôgô gbenda, shi lu dimii hen shighe la shi ndôhôr inya kpaa. Kpa kwagh u kpilighyol gema er.

¹⁸ “Uwegh ku TER lu sha Eliya, a fiir ikyondo shin iwenge, a yevese a kar Ahaba sha hemen zan zan hen hunda u Yesereel.” (1 Utor 18:46) Ikyav tese wang ér “uwegh ku TER” lu sha Eliya, lu wasen un sha gbenda u kpilighyol. Yesereel yange gba ica kuma ukilomita 30 nahan, man Eliya lu anye ga. * Tôô ken ishima wer u nenge a profeti ne er a ker gôgô ikyondo na la a fiir shin iwenge sha er una yevese sha ishima na yô; ngu yevese sha gbenda u amgbiôr a ngee sha mi la, zan zan a za kohol ikyekye i tor henda la je a ta a kar i, a yem a uve!

19. (a) Agee kua gbong gbong u yolough u Aôndo na Eliya la umbur se akaaôron a profeti a nyi? (b) Shighe u Eliya lu yevese yemen Yesereel la, yange una fa ken ishima ér nyi?

¹⁹ Kwagh ne yange una doo Eliya kpen kpen! Yange a saan un iyol kpishi u zuan a imba agee man gbong gbong u yolough la, man lu agee a shighe u lu iyev la je kpa, alaghga lu a mi nahan ga yô. Kwagh ne umbur se kwaghôron u profeti u a er kwagh u shighe u tar ua lu Paradiso ve mbajighjigh vea hide a lu gbong gbong, a agee iyol la. (Ôr Yesaia 35:6; Luka 23:43) Er Eliya lu yevese yemen sha gbenda u amgbiôr ngee sha mi la, a fa ken ishima na er i doo Ter na, Yehova Aôndo u mimi tswen la a na yô!

20. Se nôngo sha afatyô wase u zuan a averen a Yehova nena?

²⁰ Yehova wa iyol kegh kegh u veren se doo doo. Nahan se nôngo nen sha afatyô wase cii sha er se zua a averen na yô, gadia averen la doo je gande ôron. Doo u se lu tsevaa er Eliya nahan, se ver nen ishima se nengen nen akav a tesen ér Yehova sôôn eren kwagh hegen u tar u vihi kpishi, shi shighe a bee cica cii ne. Atôakaa nga kpishi a se fatyô u nan uityendezwa mba Yehova “Aôndo u mimi” la jighjigh, er Eliya kpa er nahan yô.—Ps. 31:5.