Bibilo ôr ken Genese 22:6 ér, shighe u Aberaham soo u wan agoyol u za nan naagh hen ijiir i icaa igen la, a “tôô ikyon i nanden nagh penda wan na Isaka sha vande, un iyol na yô, kôr usu man ihyô sha uwe; tsô ve uhar cii, ve gba yemen imôngo.”

Ijiir i môm kpa Ruamabera pase gbenda u i keer usu sha ayange a tsuaa la ga. Kpa ortôvon sha akaa ugen ôr kwagh sha ikyaa ne. A na jighjigh ér or môm kpa yange nana ‘fatyô u tôôn nomborusu yemen a mi gôgô zende,’ er zende u Aberaham man Isaka la nahan ga. Sha nahan yô, alaghga tsô lu kwagh u a fatyô u keer usu a mi la, i ter heen ye.

Nahan kpa, mbagenev kaa ér yange i lu kwagh u ican kpishi u keer usu sha ayange a tsuaa la. Aluer gba sha mi yô, yange i hemba lun ior zange u dughun aka a usu a lun kpenger kpenger hen mbawanndor a ve, a u ve nôngon ér vea keer usu ayol a ve la. Sha nahan yô, mbafantakerada kpishi na jighjigh ér, Aberaham yange tôô ikyagh ki alaghga lu ityegh ki a ta ishiligh sha mi a kôr sha uwe yô. Ityegh kin lu a aka a usu a lun kpenger kpenger, a yange dugh hen tugh mbu karen la yô. (Yes. 30:14) Yange a tôô aka a usu a lun kpenger kpenger sha imba gbenda ne nahan yô, i lu zange u za keer usu sha ayeer a ikyon hanma ijiir cii ken zende.