U Fa Kpa?
Ikyekye i Oretiopia u eren tom hen ya u tor lu hiden zende shimi ve Filibu va kohol un shimi la yange i lu nena?
Ishember i ken zwa Grika i i gem ken Icighan Bibilo i Tar u He ér “ikyekye i kpelan” la, a fatyô u lun ma ikyekye ken a akeke a kpelan a kpela. (Aer. 8:28, 29, 38) Nahan kpa, ikyav tese ér ikyekye i kpelan i Oretiopia lu shimi la yange i kehe hemba ikyekyeutya, shin ikyekye i kpelan i gban ayem a mi. Nenge ase atôakyaa a a ne ve se ôr nahan yô.
Oretiopia la lu ortom u tagher tagher hen ya u tor, u za zende u icaa yô. Yange “lu sha iantom i vesen sha ikyev i Kandesi, torkwase u Mbaetiopia, shi nengen sha akaa a na cii.” (Aer. 8:27) Sha ayange a tsuaa la, tar u Etiopia gbanger wa tar u i yer u nyian ér Sudan la kpa ker, kua vegher u tar u Igipiti u ken imbusutariyan la. Shin er alaghga or la za zende la sha akeke a kpelan kposo kposo nahan kpa, ka keng yange una lu a ikyav kpishi, sha ci u lu zende u icaa. Sha ayange a mbaapostoli la, lu sha akeke a kpelan a kpela a lun akaver anyiin, i tôôn ior ye. Takeda ugen u u pase akaa a ken takeda u Aerenakaa yô kaa ér, “Akeke kpelan la yange a lu a ian i tôôn ikyav kpishi, shi a na zende u nyoon iyol ga, shi ior ve fatyô u zan ijende i icaa je kpaa.”
Oretiopia la lu ôron takeda shighe u Filibu va kohol un la. Bibilo kaa ér, “Filibu ze ikyua yô, a ungwa [or u eren tom hen ya u tor la] lu ôron ruamabera u profeti Yesaia la genger genger.” (Aer. 8:30) Gbenda u yange i er akeke akpelan la lu kwagh u aa fatyô u yevese kpishi ga. Er akeke la yevese kpishi ga yô, or u eren tom hen ya u tor la fatyô u ôron takeda er lu yemen shimi la, shi Filibu kpa fatyô u zenden sha angahar za kohol un.
Oretiopia la “kaa a Filibu ér a unde a tema vea na.” (Aer. 8:31) Ikyekye i kpelan i gban ayem a mi la yô, or u hendan la yange nan tile sha. Kpa shin ikyekye i kpelan i zan zende a mi la, ian lu i or u eren tom hen ya u tor la kua Filibu cii vea fatyô u teman yô.
Kwagh u takeda u Aerenakaa ityough 8 kua ityakeda i yiase igen i ôr la na yô, ufoto mba ken ityakeda i se gber sha ayange ne tese ér Oretiopia u eren tom hen ya u tor la yange lu shin ikyekye i kpelan i kehen hemban ikyekyeutya shin ikyekye i gban ayem a mi.
