MBAKRISTU mba sha ayange a mbaapostoli la yange ve nôngo kpoghuloo ve ar a ior kpishi a “loho u Dedoo u tartor” la, er ve fatyô la. (Mat. 24:14) Mbagenev je yô, yange ve yem ken ityar igen je kpaa. Ikyav i tesen yô, apostoli Paulu yange yem hen haregh u i yer nyian ér Turkey la, za pase kwagh her kpoghuloo shighe u lu zenden eren tom na u mishen la. * Anyom nga kar er 2,000 nahan yô, ken inyom i 2014 la, shi i hide i er kyampen i kwaghpasen i vesen ken tar u Turkey. Yange i er kyampen ne sha ci u nyi? Lu unô er kyampen shono?

Mbapasenkwagh mba ken Turkey hemba iorov 2,800 nahan, kpa tar la gema ngu a iyengeior miliôn 79. Kwagh ne tese ér, ior mba i gbe u hanma orpasenkwagh ken tar u Turkey nana pasen ve kwagh la zurum iorov 28,000 nahan. Sha nahan yô, ka iorov kpuaa tseegh ken tar la, mbapasenkwagh ve fetyô u pasen ve kwagh ye. Kwagh u na ve i er kyampen i vesen ne yô, lu u pasen ior kpishi kwagh sha anshighe kpuaa er ve fetyô la. Anmgbianev mba nomso man mba kasev mba kuman er 550 nahan, mba lamen zwa Turkey mba ve lu ken ityar igen yô, mough va ken tar u Turkey, va kohol mbapasenkwagh mba hen ityônya, ve er kyampen la imôngo. Lu nyi i due kere?

Yange i pase ior kpishi kwagh. Tiônnongo ugen ken geri u Istanbul kaa ér: “Ior yange vea nenge a vese yô, ve pine ér: ‘Ne mba eren mkohol u vesen heene? Se nenge a Mbashiada mba Yehova hanma ijiir cii!’” Shi tiônnongo ugen ken geri u Izmir nger ér: “Orgen u lu eren tom hen ijiir i tilen nyôron mato yô, va kohol ortamen ugen hen ityônya pine un ér: ‘Ka nyi i lu zan hemene? Ne seer tom wene?’” Sha mimi yô, ior yange ve nenge kyampen i i er la.

Yange doo anmgbianev mba ve mough ken ityar igen la u eren tom ne kpen kpen. Anmgbian Steffen, u mough ken tar u Denmark la, kaa ér: “Hanma iyange yô, m pase ior mba ve lu a vande ungwan kwagh u Yehova ga yô kwagh. Yange m nenge mer, m ngu nan ior mba fan iti i Yehova sha mimi.” Anmgbian Jean-David u a mough ken tar u France la, nger ér: “Sha godobi môm tseegh se pase kwagh sha mi ahwa imôngo. Kwagh ne kpiligh iyol je gande! Ior kpishi yange ve fa Mbashiada mba Yehova ga. Hanma hunda u sea za her yô, se nôngo u hiin iliam a orya shi tesen nan môm ken uvidio asev shi nan nan ityakerada yase.”

Anmgbianev 550 mba ve er tom ne la, na ior ityakerada nôngo u kuman er 60,000 nahan ken kasua uhar tseegh! Kyampen ne yange i na yô, i pase ior kpishi kwagh.

 Se seer lun a gbashima sha tom u pasen kwagh la. Tom u pasen kwagh ne taver anmgbianev mba hen ityônya mbara ishima kpishi. Mbagenev kpishi ken ve hii u henen sha kwagh u eren tom u pasen kwagh ayange ayange la. Jighilii yô, yange mba eren kyampen ne inyom kar yô, iyenge i mba eren pania u keke ken tar u Turkey la seer, je yô, ken atô u mbapasenkwagh 100 yô, iorov 24 ve hingir pania u keke la.

Anmgbianev mba yange ve mough ken ityar igen ve za kyampen ne la, pase er kwagh ne wase tom ve u pasen kwagh, shighe u ve hide ken ityar ve la je kpaa yô. Anmgbian u kwase Şirin, u mough ken tar u Jamani la, nger ér: “Kera taver anmgbianev mba ken Turkey u pasen kwagh shighe u ian i dugh la ga. Ka m cia ashe kpishi u pasen ior kwagh shighe u ian i dugh yô. Kpa sha ci u kyampen i vesen ne man ikyav i anmgbianev mba hen ityônya la, kua mbamsen mba m er la yô, m fatyô u eren kwagh u ngise m faantyô u eren ga la. Yange m pase kwagh sha igbenda i girgidogo i shin inya, shi m na ior utrak je kpaa! Hegen ne, m kera cier ashe er ngise nahan ga.”

Anmgbian Johannes u mough ken tar u Jamani la, kaa ér: “M hen akaa agen a a wasem ken tom wam u pasen kwagh la yô. Anmgbianev mba ken Turkey soo u pasen ior kpishi mimi ne, er ve fetyô la cii. Ka ve er tom a hanma ian cii u pasen kwagh. Nahan m hidi m yemen ken Jamani yô, m tsua u eren nahan vough. Shi hegen ne, ka m pase ior kpishi kwagh i hemba ave a tse.”

Anmgbian u kwase Zeynep, u mough ken tar u France la, kaa ér: “Kyampen la wasem ken tom wam u pasen kwagh la kpishi. Kwagh ne wasem u seer taver ishima shi seer suur sha Yehova.”

Mbapasenkwagh seer lun kôôsôô ayol a ve. Dooshima man mzough u lu hen atô u anmgbianev mba ve mough ken ityar kposo kposo la, lu kwagh u vea hungur a mi ga. Anmgbian Jean-David u se vande teren kwagh na la kaa ér: “Se ‘bende’ erdoo u anmgbianev se nenge.” Shi a kaa ér: “Yange ve lumun ér se lu azende a ve, shi se lu vea ve er se mba tsombor môm nahan. Ve nyôr a vese sha uya vev. M fa je mer se mba ken mzough u anmgbianev u tar sha won cii, u m ôr kwagh na kwa imôngo ken ityakerada yase yô. Kpa hen shighe ne yô, m nenge kwagh ne iyol yam. Shi seer lun mo kwagh u icivirigh kpishi u lun môm ken ior mba Yehova je kpaa, shi m wuese un sha ian i doon tsung i a bugh sha ci wam ne.”

Anmgbian u kwase Claire, u mough ken tar u France la  kaa ér: “Wea mough ken tar u Denmark shin France shin Jamani gayô Turkey kpa, se cii se mba tsombor môm. Lu inja er Aôndo gema se cii se hingir tar môm nahan.”

Anmgbian u kwase Stéphanie, u mough ken tar u France la kaa ér: “Kyampen i vesen ne tese se ér, kwagh u a ne ve se lu ken mzough yô, ka dooshima u se cii se lu a mi sha Yehova la, ka aeren a ityôô shin zwa wase ga.”

Anmgbianev kpishi mba ken ityar igen, mba ve kpa ve er tom shon la hii u henen sha kwagh u moughon yemen ken tar u Turkey sha u za wasen tom u vesen u u shi her la. Ve mbagenev kpuaa nahan yem kera kpaa. Se wuese iniôngon i anmgbianev mba ve yem u za eren tom u pasen kwagh ape kwagh a hembe gban sha mbapasenkwagh la kpishi je.

Ikyav i tesen yô, nenge ase kwagh u annongo u cuku ugen u a lu a mbapasenkwagh 25 hen haregh ugen la. Ken anyom kpishi a karen la, lu ortamen môm tseegh lu her ye. Nenge ase er yange a saan mbapasenkwagh iyol ken inyom i 2015, shighe u anmgbianev ataratar mough ken tar u Jamani man u Netherlands, va u va wasen ve u eren tom hen ijiir i kwagh hemba gban sha mbapasenkwagh la yô!

Mba ve yem u za eren tom ape kwagh a hembe gban sha mbapasenkwagh ken Turkey shighe a we karen yô, ôr ér nyi sha kwagh u mlu u uma ve ken tar laa? Jighilii yô, ashighe agen uma ka a taver ve tsô, kpa averen gema nga u yemen za eren tom ape kwagh a hembe gban sha mbapasenkwagh la kpishi. Nenge ase kwagh u mbagenev ve kaa ne:

Anmgbian Federico, u a mough ken tar u Spain, a er kwase shi a hembe anyom 40 yô, kaa ér: “Er m lu a uyôughyôughmbaakaav mba me haa ishima yam sha mi ga yô, kwagh ne nam shighe shi bughum ian i hemban veren ishima yam cii sha akaa a a hemba lun hange hange la.” A nenge ér mbagenev kpa ve er kwagh u un er nee? A kaa ér: “Een, ga ka nyi! Ka wea mough a yem ken tar ugen a awashima u za wasen ior ve fa Yehova yô, jighilii yô, u ngu wan iyol you cii sha ikyev na. Ka u nenge er Yehova a we u ikyo je i hembe ave a tse yô.”

Anmgbian Rudy, u a mough ken tar u Netherlands, a er kwase shi a hembe anyom 50 yô, kaa ér: “Saan se iyol  tsung sha ci u se fatyô u kaan ser, se hemen ken tom u pasen kwagh ne, shi se mba ôron ior kpishi kwagh u mimi u ve lu a vande ungwan kwagh na ga yô. Ka sea nenge mba ve lumun mimi la, vea lu saan saan nahan, i doo se kpishi.”

Anmgbian Sascha, u a mough ken tar u Jamani, shi a hembe anyom 40 yô, kaa ér: “Hanma shighe u m dugh kwaghpasen cii yô, ka m zua a ior mba i lu je ve lu a vande ungwan kwagh u mimi ga yô. Er m lu sha ian i wasen ambaaior la u fan Yehova yô, kwagh ne ka a nam msaanyol kpishi.”

Anmgbian u kwase Atsuko, u a mough ken tar u Japan, a er nom shi a lu anyom 35 yô, kaa ér: “Ngise la, m soo mer Armagedon a va fele fele je. Kpa m va moughon m yemen ken tar u Turkey yô, m sugh Yehova kpishi er a lu wan ishima her yô. Er m lu seer nengen er Yehova a lu tesen er a er akaa la yô, hemba saren mo u lun kôôsôô a na cii.”

Anmgbian u kwase Alisa, u a mough ken tar u Russia, a er nom shi a hembe anyom 30 yô, kaa ér: “Er m lu civir Yehova sha imba gbenda ne yô, kwagh ne wasem m bende erdoo na la cii m nenge.” (Ps. 34:8) Shi a kaa ér: “Yehova ka Terem tseegh ga, kpa ka Ijende yam i kôôsôô, i m seer fan un ken mbamlu av kposo kposo yô. Uma wam iv a ashighe a saan iyol man akaa a doon tsung kua averen kpishi!”

Kyampen i vesen i pasen kwagh i i er ken tar u Turkey la na yô, loho u dedoo ne seer aren a ior kpishi. Nahan kpa, uharegh mba kpishi mba i lu a pase kwagh her ga yô. Hanma iyange yô, ior mba ve lu za pasen kwagh ape kwagh a hembe gban sha mbapasenkwagh ken tar u Turkey la, ka ve pase ior mba i lu je ve lu a ungwa kwagh u Yehova ga la kwagh. A doo u u pasen kwagh hen imba haregh laa? Aluer ka nahan yô, se mba taver we ishima ser: ‘Kende ashe sha, nenge, iyiav mbi ken ishule, mbi via kuma u sundan ve.’ (Yoh. 4:35) U fatyô u za wasen tom ken ma tar ape iyiav mbi ken ishule ‘mbi vie i kom u sundan’ la kpa? Aluer ka nahan yô, hii u wan agoyol hegen sha er u va fatyô u kuren awashima wou la yô. Kwagh u se fe yô, ka un ne: Aluer u seer eren tom u samber a loho u dedoo la, sha er u “ar ken ikighir i tar” yô, u zua a averen je a gande u ôron.—Aer. 1:8.