“Shighe u ne lu eren msen yô, de kimbir nen kwagh môm gbem . . . ga.”—Mateu 6:7.

Yehova soo ér sea eren msen yô, se̱ de kimbir mbamsen mba se kôr ken ityo, shin se̱ ôron mba i nger ken ma takeda u msen ga. Kpa ka a soo ér se ôron un kwagh u a lu se ken ishima la jighilii. Hen ase er aluer ijende you nan zer ôron kwagh môm a we gbem ve a due u ishima yô. Azende a mimi nga yeren ayol a ve kwagh ga. Ka sea eren msen ken mkaanem asem yô, se ôron Ter wase u sha la akaa ase kpôô kpôô.

“Ka nea sôn kwagh kpa ne zua a mi ga sha ci u ka ne sôn a awashima u vough ga.”—Yakobu 4:3.

Aluer se mba sônon Aôndo akaa a se fe ser a soo ér se̱ er ga shin se̱ lu a mi ga yô, mayange je una ungwa msen wase la ga. U tesen ikyav yô, Yehova ta se icin wang ér se de eren hua ga shi se de ne jighjigh a akaa a a lu a mimi ga la ga, er u keren ikyôr i doon nahan. Nahan, aluer or u gbidyen do nan er msen ér Aôndo a na ikyôr i doo nan nahan, una ungwa msen u nan la kpa? (Yesaia 65:11; Luka 12:15) Mayange Yehova a ungwa msen la ga! Saa se er msen a zua sha kwagh u Aôndo a ôr se ken Bibilo ve, una ungwa msen wase ye.

 “Or u nan gem togh ku nan kera sha u nana ungwa tindi ga yô, msen u nan je kpaa, ka kwagh u ndôhôrshima.”—Anzaakaa 28:9.

Mba yange ve vendan u dondon atindi a Aôndo a perapera sha ayange a i ngeren Bibilo la kpa, Aôndo ungwan mbamsen vev ga. (Yesaia 1:15, 16) Nyian kpa, gbenda u a eren kwagh la gema ga. (Malaki 3:6) Aluer se soo ser Aôndo a ungwan mbamsen asev yô, saa se nôngo sha afatyô wase cii se eren kwagh u atindi a na a tese yô. Kpa, aluer yange se vande eren akaa a doon ga ken ijime di ye? Kwagh la una na Yehova a ungwa msen wase mayange gaa? Ei, ka nahan ga cii! Aôndo una de se kwaghbo la, aluer se vaa afanyô sha kwagh u se er la sha mimi, shi se nôngo sha afatyô wase cii se gema eren kwagh u doon un yô.—Aerenakaa 3:19.