Ken ngeren u a kar la, se time sha akaa a Yesu yange ôr ér a a kohol a lu ikyav la. Ikyav la tese wang ér i ver Tartor u Aôndo sha, Yesu Kristu ngu tor u u.

Bibilo kaa ér Yesu una teman tor sha Tartor je maa una zenda Satan man azôv a na sha kera. Man ka kwagh u Yesu yange er vough je la. Nahan hegen yô, ka shin tar ne tseegh vea fatyô u eren kwagh ye, man kwagh ne kpa ka môm ken atôakyaa a a ne ve akaa a vihi kpishi shin tar ne, hii ken inyom i 1914 la je zan zan nyian yô.—Mpase 12:7, 9.

Er tar u lu vihin seer a seer nahan kpa, Yesu u a lu Tor u Tartor u Aôndo la, er akaa kpishi a a wase ior sha tar cii yô. Tom u tesen ior Bibilo sha tar cii u Yesu tsengaôron la na yô, ior kpishi mba henen shi dondon atindiakaa a Bibilo ken u uma vev hanma iyange. (Yesaia 2:2-4) Ior umiliôn imôngo hen u lun a mnenge u vough sha kwagh u tom u eren, shi ve sôr mlu u tsombor ve seer doon, shi mba akaa a yolough, kpa mba gem shighe man agee a ve cii mba ne sha u keren akaa ne ga. Ior mban hen fa u wasen ayol a ve hegen, shi mba hingir ior mba Aôndo a soo ér ve lu ken Tartor na yô.

Er Yesu a lu hemen sha hegen nahan kpa, ugomoti mba uumace di mba hemen shin tar ne her. Nahan kpa, Aôndo kaa a Yesu ér: “Tema tor hen atô u mbaihomov Ou!” (Pasalmi 110:2) Ica a kera gba ga tsô, Yesu una tim mba ve lu hendan a na la, kpa una gema a va mba ve lu ungwan imo i Aôndo la a mmem.

Hen shighe ne, Tartor u Aôndo ua er kwagh sha u:

• Been a kwaghaôndo u aiegh. Ukwaghaôndo mba ve tese akaa a aiegh sha kwagh u Aôndo, shi ve er ior ican, anyom uderi imôngo ne cii a kar a ve kera. Bibilo kaa ér kwaghaôndo u aiegh ngu er ka idyakwase nahan. Mtim na una va kpiligh ior kpishi iyol.—Mpase 17:15, 16.

• Been a hemen u uumace. Tartor u Aôndo, ua tim hemen u uumace cii kera.—Mpase 19:15, 17, 18.

• Been a aferaior kera. Mba ve nômbo ikyôr u eren ifer shi ve vende u wan ayol ave sha ikyev i Tartor u Aôndo la di ye? Bibilo kaa ér: “Aferaior yô, á tim a sha tar kera.”—Anzaakaa 2:22.

• Wuhen Satan man azôv. A wuhe Satan man azôv a na shin ihyungwa i i ze kweng la, sha er ve “de kera tsughun akuraior ga” yô.—Mpase 20:3, 10.

Akaa ne cii a a wase mba ve we ayol ave sha ikyev i Tartor u Aôndo la nena?

Er Yesu a lu hemen sha yô, una er akaa kpishi je a hemba hanma orumace u nan vande hemen cii. Iorov 144,000 mba i tsough ve ken uumace mba vea va lu hemen vea na la, vea wase un tom. (Mpase 5:9, 10; 14:1, 3) Una nenge ér, i er ishima i Aôndo shin tar ne. Ka nyi Tartor u Aôndo ua va er sha ci u mba vea lu shin tar laa?

• Ua bee a angev man ku kera. “Ma or u nan tem ker kpaa nana kera kaa ér: Kwagh nyoon mo ga,” shi “ku ua kera lu ga.”—Yesaia 33:24; Mpase 21:4.

• Ua va a bem u mimi man mkpeyol. “Mkpeyol u ônov ou kpaa una vese,” shi “hanmô ve nana tema shin itine i kon u wain u nan, man shin itine i kon u tur u nan, ma or nana kera ta ve mciem iyol ga.”—Yesaia 54:13; Mika 4:4.

• Ua na ior tom u dedoo. “Uicuwan Av kpaa vea ya tom u ave ve zan zan je. Vea kera er tom gbilin ga.”—Yesaia 65:22, 23.

• Ua sôr tar, ua hingir wang. “Taaikyôngo man ikpoghonya vea lu sar sar, deserti una ember, una mondo er ishohough nahan.”—Yesaia 35:1.

• Ua tese ior kwagh u vea er ve vea zua a uma u tsôron yô. “Man u̱ ve̱ zua a uma u tsôron yô, saa vea lu keren u fan we, we Aôndo u mimi tswen, man un u u tindi la, ka Yesu Kristu je la.”—Yohane 17:3.

Aôndo soo ér we u zua a averen ne. (Yesaia 48:18) Ngeren u a dondo ne, una pase kwagh u u fatyô u eren hegen ve, we kpa u va zua a averen a doon tsung ne yô.