Kwagh Gba Se a Tartor u Aôndo Sha Ci u Nyi?
Shighe u i gba uumace mba hiihii la, lu un u a gbe se, iti na i lu Yehova la tseegh lu Orhemen ye. Hemen na lu u sha dooshima. A er sule u doonashe ken Eden sha ci u uumace ér ve lu ker. Shi na ve akaayan kpishi. U seer yô, shi na uumace tom u injaa u vea eren yô. (Genese 1:28, 29; 2:8, 15) Uumace ma ve lu ken bem her luun er yange ve venda hemen u Aôndo ga yô.
Uumace mba hiihii mbara venda hemen u Aôndo
Bibilo pase ér ortyom u hendan kwagh a Yehova u i va gema yilan un ér Satan Diabolo yô, laha hemen u Yehova. A kaa ér aluer uumace venda ér Aôndo a de tesen ve kwagh u vea er ga, shi ve venda hemen na yô, a hemba saan ve iyol. Kwagh er vihi yô, Adam man Ifa mbamaren asev mba hiihii mbara dondo Satan, nahan ve hendan a Aôndo.—Genese 3:1-6; Mpase 12:9.
Er Adam man Ifa venda hemen u Aôndo yô, ya ve u lu Paradiso la saa, shi ishimaverenkeghen ve i lun uma gbem sha won a isholibo shio la kpa saa. (Genese 3:17-19) Kwagh u ve tsua la bende a ônov mba ve va mar la kpaa. Bibilo kaa ér, sha ci u isholibo i Adam la yô “isholibo nyôr shin tar sha or môm, man ku gema va sha ci u isholibo.” (Mbaroma 5:12) Isholibo shi va a zayol ugen u vihin tsung: “Or ka nana lu a tahav sha orgen yô, nan eren nan ican.” (Orpasenkwagh 8:9) Shin se kaa ser, er uumace ve lu hemen ayolave yô, mbamzeyol vea lu keng.
UUMACE HII U HEMEN
Nimrodi hendan kwagh a Yehova
Orumace u yange nan hii u hemen shin tar, u i ter kwagh u nan ken Bibilo yô, lu Nimrodi. Yange hendan a hemen u Yehova. Hii shighe u Nimrodi la je, ior mba lun a tahav mba eren tom a tahav vev u nzughul a mbagenev. Anyom a karen er 3,000 nahan, Tor Solomon nger ér: “Nenge, mliam ma mba i kighir ve la, man ve lu a orsurun ve ishima ga; mba ve kighir ve la ve lu a tahav.”—Orpasenkwagh 4:1.
Nyian ne kpa kaha ga. Ken inyom i 2009 la, takeda ugen u Mzough u Ityar Cii kaa ér, hemen u dedoo ga ka “môm ken akaa a vesen a a ne ve mbamzeyol ve lu seer a seer shin tar yô.”
SHIGHE KUMA!
Gba u tar ne ma u lu a hemen u dedoo man mbahemenev mba injaa. Man ka kwagh u Aôndo u a gbe se la a tende zwa u eren je la!
Hemen u orumace u u i senge ér hembe doon la je kpa, u kanshio u been a mbamzeyol mba vesen mba uumace mbara
Aôndo ver Tartor shin gomoti u una kar a tile sha ityough ki hemen u uumace cii yô. Tartor la “ua lu gbem sha won.” (Daniel 2:44) Ka Tartor ne ior umiliôn imôngo ve ndera sônon ér u va ye. (Mateu 6:9, 10) Kpa Aôndo una hemen gomoti ne iyol na ga. A tsua or u ken jijingi u ngise nan lu orumace yô, ér nana hemen. Ka ana Aôndo a tsua?
Kwagh Ugen u Alaghga Shi Una Doo U Yô
MBAMPIN MBA BIBILO I NE MLUMUN SHA MI LA
A Er Nan Ve Bem Una Va sha Tara?
Fa er Aôndo a tende zwa u van a bem sha tar cii sha ikyev i Tartor na yô.
