Mbagenev ka ve hen ér alaghga i gema kwagh sha Mkaanem ma Aôndo ma i nger ken Bibilo la. Kpa profeti Yesaia yange kaa ér mkaanem ma Aôndo ma a “lu her gbem sha won.” (Yesaia 40:8) A er nan ve se fa ser mimi je mkaanem ma Aôndo yange ôr ken uityendezwa nav la ma her voughlo?

Aôndo ngu a tahav mbu una fatyô u koson Mkaanem nam shi kuran ma sha er kwagh a nzughul sha ma ga yô. Sha ayange a tsuaa, shighe u i ngeren ukôpi mba Mkaanem ma Aôndo sha ave la, nomsombaiorov mba ngeren ma mbara yange ve ôr asangaabaacaa a ken kôpi u ve lu nengen ker ngeren la vindi vindi, sha er vea seer shin vea gema shin vea hungur ma kwagh sha mi ga yô. Nahan kpa, er uumace ve yina yô, mbangeren ukôpi mbara yange ve nzughul ankaam sha mi.

Ukôpi mba Icighan Ruamabera mba yange i nger sha ave tsuaa tsuaa la mba her udubu imôngo. Aluer ankwagh kaha ken kôpi u môm cuku tseegh kpa, a fatyô u nengen ken ukôpi mbagenev mbara, nahan fan kwagh u yange i hii ngeren la jighilii. Wea soo u seer fan yô, nenge ngeren u a lu a itinekwagh ér “I Nzughul a Bibilo Kera Ngi sha Ave a Tse la Gaa?” la, sha jw.org/tiv.

Ikyav i tesen yô, ken inyom i 1947 la, i zua a Uihyurenmbaruamabera mbagenev hen kpe Zegemnger u Kuugh. Lu Mbaarabia mba i yer ér bedouines la zua a mi ye. Uihyurenmbaruamabera mba tsev mban mbagenev ka ityakeda i Icighan Ruamabera i i tse i hembe anyom 2,000 yô. Mbatôvon sha akaa a ken Bibilo tôô ngeren mba tsev mban kar sha mkaanem ma Icighan Ruamabera u se lu a mi nyian ne. Ka nyi ve nenge a mini?

Ve tôv sha ngeren mba ruamabera mba tsev mbara tsembelee, nahan ve mase kaven er kwagh u se ôron ken Icighan Ruamabera nyian ne i lu mkaanem ma Aôndo ma yange i hii ngeren la yô. * Nahan se fatyô u nan jighjigh ser Aôndo koso mkaanem ma a ne i nger, ma lu icighankwagh la tsembelee, ma her vough sha ci wase nyian.

Sha nahan yô, se fatyô u ôron Mkaanem ma Aôndo vangertiôr shi nan jighjigh ser ma vough. Er se fe nahan yô, de se time sha kwagh ugen u se fatyô u henen sha kwagh u Aôndo ken akaa a uprofeti nav nger la yô.