Een, mbatyomov mba wan afer mba. Ka han ve dughu? Umbur wer Aôndo yange gba mbatyomov na ve iwua i tsuan kwagh u ve soo yô. Yange Aôndo gba nom man kwase u hiihii la, Adam man Ifa, ica gba ga maa ortyom ugen u lu a vande eren isholibo ga yô, er tom a ian i lu a mi i tsuan kwagh u a soo la sha inja ga. Yange va hii u hemban Aôndo ato shin tar, nahan na yô, Adam man Ifa kpa va kohol un ken ihyembeato na ne. (Genese 3:1-7; Mpase 12:9) Bibilo pase se iti i yange i yilan ortyom ne a mi ga, shi i pase se iantom i yange lu a mi sha, cii ve va hingir u hemban ato la kpaa ga. Kpa yange va hemban ato kera yô, Bibilo yila un ér Satan, inja na yô ér “Orhendankwagh,” shi i yila un kpaa ér Diabolo, inja na yô ér “Ormsende.”—Mateu 4:8-11.

Kwagh er vihi yô, lu un tseegh hemba Aôndo ato ga. Sha ayange a Noa la mbatyomov mbagenev mba i pase iyenge ve ga yô, ve “undu ijiir ve i teman jim,” i i na ve ken tsombor u Aôndo u sha la. Ve va shin tar ve va gema ken iyol i orumace sha er vea kure isharen ve i ijimbagh yô. Man gema lu kwagh u Aôndo yange gba ve wa ishima ér ve er la ga.—Yuda 6; Genese 6:1-4; 1 Peteru 3:19, 20.

Ka nyi yange i er mbatyomov mba wan afer mbana? Shighe u Aôndo va a mngerem ma deemee sha u karen a iferkwagh sha tar kera la, ve hide ve yem sha ken iyol i ken jijingi. Nahan kpa Aôndo kera na mbatyomov mba hembanato mban ian i hiden sha “tahav vev mbu i ver ve sha mi hiihii la ga.” Kpa a gema a gbihi ve ken ime i ken jijingi, i i yer ér Tartaru la. Mlu ve ne ngu er i kende ve ken “ahungwa a imegh” a zan tsung nahan. (Yuda 6; 2 Peteru 2:4) Mbatyomov mban hingir ujijingi mba bov shin azôv, mba sha ikyev i Satan Diabolo, “tor u ujijingi mba bov,” u “ka a gema iyol na er ka ortyom u iwanger nahan” la.—Mateu 12:24; 2 Mbakorinte 11:14.

Bibilo tese ér yange i ver Tartor u Aôndo sha, Mesiya hii u hemen sha u, ka gomoti u sha je la, ken inyom i 1914. * Ica i gbe ga yô, i daa Satan kua azôv a na sha, i gbihi shin tar. Ifer man ijimba i i dumbur sha tar nyian ne tese wang ér ka Satan man azôv a na ve lu oron iyev sha u tuur uumace ken ityô ér ve er akaa a dang, a vihin mlu ve ye.—Mpase 12:9-12.

Nahan kpa, ifer man ipila i vihin tsung i i lu zan hemen sha tar nyian la tese ér hemen u bo ne ngu sôôn been. Ica a gba ga tsô a wuhe mbatyomov mba wan afer mban, sha u ve de kera tsughun ior ga yô. Tartor u Aôndo ua hemen tar hen shighe u tar ua va hingir paradiso la, sha anyom 1,000. Anyom ne a karen kera yô, a hide a pase mbatyomov mba aferev mban sha u ve kar ior sha anshighe kpuaa. Maa a tim ve kera gbindigh gbindigh.—Mateu 25:41; Mpase 20:1-3, 7-10.