Aôndo Nengen Akaa A U Eren Laa?

YEHOVA, Orgban u Hemban la nengenee? Een, nengen yum! Bibilo ôr wang ér: “Wen u A er ishe yô, Una nenge ga ha?” (Pasalmi 94:9) Yehova hembe nengen kwagh a uumace ica je. Yehova nengen a mlu wase u ken won la tseegh ga, “karen asema” kpaa, shi a ‘fa ishima’ i hanma or cii. (Anzaakaa 17:3; 21:2) Ngu a tahav mbu karen fan mbamhen asev man awashima wase kua asaren a ken atô u ishima yase.

Yehova fa akaa a se tagher a mi ken uma cii, man ka sea vaa sea yila un yô, a yima se. Orpasalmi nger ér: “Ashe a TER nga sha mbaperapera, A kegh ato sha u ungwan myer ve kpaa. TER ngu ikyua a mba asema a vihin ve la, yem mba ve lu a ishima i zamber yô.” (Pasalmi 34:15, 18) Mfe u Yehova a fe mbamlu asev shi a ongo mbamsen asev la ka kwagh u surun se ishima kpen kpen!

Yehova Aôndo nengen akaa a ior ve eren ken iuv je kpaa. Sha mimi yô, “akaa cii nga gbar gbar, i tar a tar a kpaa sha ashe a Wen u kwagh a zough se a Na la.” (Mbaheberu 4:13) Nahan sea eren akaa a dedoo shin a bo kpa Aôndo nengen a cica cii. (Anzaakaa 15:3) Ikyav i tesen yô, Genese 6:8, 9 kaa ér “Gema doo TER a Noa” shi Noa “zenden vea Aôndo imôngo je.” Noa yange doo Yehova ishima shi zua a averen kpishi sha ci u ungwan imo i Aôndo shi waan atindi a na ikyo kpaa. (Genese 6:22) Kpa ior mba sha ayange a Noa la yô lu er Noa nahan ga, ve wa tswam kpishi shi ve eren aeren a dang kpaa. Aôndo yange nenge akaa a ve lu eren la cica cii. Yange “nenge isholibo i or kehe sha won, man hanma mhen u ishima i nan kpaa lu u bo tseegh gbem.” Ken masejime yô Yehova tim botar la, kpa gema war Noa a tsombor na cii.—Genese 6:5; 7:23.

Yehova una lumun we kpa? Sha kpôô yô, ashe a Yehova “nga jingen sha akaa a sha won cii, sha u Una pase agee Na hen mba asema a ve a lu jighelaa her a Na yô.” (2 Kroniku 16:9) Ica a kera gba ga tsô shi una tim mbaaferev sha tar kera, una gema a war mbaasemaleghlegh.—Pasalmi 37:10, 11.