U Ngu “Ornyar Sha Kwagh U Aôndo” Kpa?
U Ngu “Ornyar Sha Kwagh U Aôndo” Kpa?
“Or u nan lu koson inyaregh sha ci u iyol i nan, kpa nan kera lu ornyar sha kwagh u Aôndo ga la, kape kwagh u nan a lu ne.”—LUKA 12:21.
1, 2. (a) Ior wa iyol u eren kwagh u ve fetyô cii ér vea zua a nyi? (b) Ka mtaver man kwaghbo u nyi Mbakristu vea tagher a mi keng ne?
INIUMBE i keren akaa a injaa i mbayev mba sha ajiir agen ve eren la gban kan di iniumbe i mbayev tsô ga, ka kwagh u ior kpishi ve eren ken ityar kposo kposo man sha ikyov ikyov yô. U tesen ikyav yô, ken derianyom u sha 19 la i zua a zenaria kpishi shin inya ken tar u Australia man South Africa kua Kanada man tar u Amerika, nahan ior mba sha ajiir a icaa mough undu uyaav vev kua ior vev cii tume nongo yemen ken ityar i ve fa kwagh u i kpaa ga ne shi uma kpa taver ker la, ér vea za ker awen a injaa sha er vea zua a inyaregh kpishi yô. Sha mimi yô, ior wa iyol u eren nyi ityôkwagh i ve fetyô cii sha er vea zua a inyaregh vea kure asaren a ve yô.
2 Ior kpishi nyian mba kera yemen sha ajiir agen sha u za keren awen a injaa ga, kpa ka ve er tom kpoghuloo sha er vea zua a kwagh u vea ya yô. U keren kwaghyan ken tar u ainge ne ka tom u kiriki ga shi ka kwagh u ican kpen kpen. Aluer or ver ishima ga yô, nana hemba haren ishima i nan cii sha u keren kwaghyan man akondo kua ijiir i tsan, nahan nana kera wa ikyo sha akaa a a hembe lun a inja la ga, shin aa hungur a hungur nan kuaa je kpaa. (Mbaromanu 14:17) Yesu yange ôr injakwagh i i pase isharen i uumace ne vough yô. I nger injakwagh ne ken Luka 12:16-21.
3. Pase injakwagh i Yesu i i nger ken Luka 12:16-21 la asav-asav.
3 Yesu yange ôr injakwagh ne shighe u wa ior kwagh sha mluainja u kuran ayol a ase sha hua la. Se vande timen sha kwaghwan na ne vighe vighe ken ngeren u ken jime la. Yesu yange wa ior kwagh sha kwagh u hua u eren, been yô a shi a ôr ve kwagh u orinyar ugen u koso akaa a injaa kpishi ken iuna na kpa kuma un ga, hide hembe i sha maa i vesen sha er una seer koson akaa a injaa ker yô. Lu hen shighe u hen wener hegen yô un zua a hanma kwagh u uma na a soo cii, una tema kera una ember la je Aôndo kaa a na ér uma na ngu karen kera ye, man akaa a injaa a á ombo la cii ior mbagenev vea ya a. Tsô Yesu mase kuren kwaghôron na ér: “Or u nan lu koson inyaregh sha ci u iyol i nan, kpa nan kera lu ornyar sha kwagh u Aôndo ga la, kape kwagh u nan a lu ne.” (Luka 12:21) Se hen nyi ken injakwagh nee? Se er tom a kwagh u se hen la ken uma wase nena?
Or u Lu a Mzeyol u Vesen Yô
4. Se fatyô u kaan ser or u i er kwagh na ken injakwagh i Yesu la lu nyi oro?
4 Injakwagh i Yesu ôr la ngi ilian ga. Yesu yange hii injakwagh ne sha u kaan ér: “Sule u ornyar ugen doo iyiagh kpishi.” Yesu lu kaan ér or la zua a inyaregh nagh sha u eren ma anyighe shin sha ma gbenda u ifer ga. Inja na yô, or la lu or u bo ga. Kwagh u Yesu ôr la tese ér a̱ shi nan kpa or u ken injakwagh na la lu or u eren tom kpoghuloo. A fatyô u kaan ér yange lu or u wan agoyol sha ci u kper shi koson kwagh sha ci u tsombor na kpaa. Nahan sha mnenge u taregh yô, a fatyô u tôôn or ne karen sha or u eren tom u uke u nan eren tom kpoghuloo shi nan ver ishima sha ityom i nan yô.
5. Ka zayol u nyi or u ken injakwagh i Yesu la lu a mini?
5 A̱ lu nan kpa Yesu yila or u ken injakwagh ne ér ornyar, inja na yô or ne vande lun a akaa kpishi. Nahan kpa, er Yesu vande ôron nahan, or la lu a mzeyol. Sule na doo hemba er hen la, u doo je hemba kwagh u kwagh gba un a mi shin una fatyô u nengen sha mi yô. Or ne yange ma er nena?
6. Ka akaa a nyi ka i gba u mba civir Aôndo kpishi nyian vea tsuaa?
6 Mba civir Yehova kpishi nyian kpa tagher a imba mzeyol u ornyar ne kpa tagher a mi la. Mbakristu mba mimi ka ve nôngo tsung ér vea lu ior mba mimi, mba eren tom kpoghuloo man mba veren ishima sha tom ve kpaa. (Mbakolose 3:22, 23) Ka a tôô ve a tôô tom shin a̱ lu tom ve kpa, ve er u sha inja, man ashighe kpishi ka ve za ikyura ken kwagh u ve lu eren la. Ka a gba pe a na ve mzehemen sha tom shin ian ia due i vea zua a inyaregh yô, i gba u vea tsua kwagh u vea er sha gbaa ne yô. Doo u vea lumun mzehemen u i ne ve la sha er vea seer zuan a inyaregh yôô? Shi kape mbayev kpishi mba ve lu Mbashiada kpa ve̱ fe takerada ken makeranta je la. Nahan yô, alaghga a soo u tsuan ve tindin ér ve za imakeranta i vesen i hemban cii la. Nahan doo u vea gba lumun kwagh u ior kpishi vea lumun u eren ne tsôô?
7. Ornyar u ken injakwagh i Yesu la sôr zayol na nena?
7 Hide sha injakwagh i Yesu la yô, kanyi yange ornyar la er shighe u sule na doo iyiav je kera zua a ijiir i ombon mbi ga laa? A kaa ér una hembe iuna na kera una hide a maa i i hembe kehen yô, sha er una koso iyiav nav kua akaa a dedoo a un zough a mi la cica cii yô. Mhen la yange na un mkor man mkom ken ishima, je yô a kaa ér: “Me kaa a ishima yam mer: Ishima, u koso akaa kpishi, a aa kuma anyom imôngo je; gba memen tsô, yaan akaa, maan akaa, i̱ lu u iyol yagh yagh.”—Luka 12:19.
Ngu “Ibumeor” sha ci u Nyi?
8. Ka kwagh u injaa u nyi or u i er kwagh na ken injakwagh i Yesu la umbur ga?
8 Er Yesu ôr nahan, mbamhen mba ornyar ne na un mkor u mimi ga. Er lu inja er akaa ne aa fatyô u kuran ornyar ne nahan kpa, gema hungur un u eren ishima i Aôndo, kwagh u a lu kwagh u hemban cii la. Or ne lu henen kwagh na iyolna tseegh, er una mem una ya kwagh una ma kwagh shi una ember yagh yagh yô. Yange hen ér er un lu a “akaa kpishi” yô, kape ‘anyom kpa una lu a mi kpishi’ je la. Kpa kwagh kera za a na er hen la ga. Er Yesu vande ôron nahan, “ka sha u ngeen a akaa kpishi la man or nana lu a uma ga.” (Luka 12:15) Hen tugh mbura je, akaa a ornyar ne kohol la cica cii saa ishe, gadia Aôndo kaa a na ér: “We ibumeor ne! Ka nyian tugh je i lu keren uma wou hen we ye; nahan akaa a u kohol ne yô, aa hingir a ana?”—Luka 12:20.
9. Er nan ve i yer or u ken injakwagh la ér ibumeoro?
9 Se nyôr sha kwagh u Yesu soo u ôron ken injakwagh ne jighilii ve. Aôndo yila or la ér ibumeor. Takerada u pasen asemberatii ugen u i yer ér Exegetical Dictionary of the New Testament la kaa ér, ka a ter ishemberti i ken zwa Grika ne yô, i̱ lu u “tesen ér or ban a mkav.” Takerada ne pase ér, myer u Aôndo yila or u ken injakwagh ne ér ibumeor la tese er “i lu gbilin tsô ornyar la kohol akaa sha ci u kper yô.” Ishemberti ne ngi ôron kwagh u or u nan ban a kwaghfan ga, kpa ka “or u nan vende u suur sha Aôndo la i̱ lu ôron ye.” Kwagh u Yesu ôr sha kwagh u ornyar ne umbur se kwagh u va ôr a Mbakristu mba ken tiônnongo u Laodishia, u ken Ashia u Kiriki sha derianyom u hiihii la, wener: “U ngu kaan wer, m ngee a akaa, m hingir u lun a kwagh ave kpishi, ma kwagh kera banem ga, kpa u kera fa er u gbe kera, u lu mhôônom mhôônom, u kungu ican, u pir ashe, u lu idyelegh kpaa ga.”—Mpase 3:17.
10. Er nan ve u lun a “akaa kpishi” la una na or a tsa “anyom kpishi” ga?
10 Doo u se hide se hen sha kwagh u injakwagh ne i tese se la. Se mba hingir er or u ken injakwagh la sha u eren tom kpoghuloo, kohol “akaa a injaa kpishi” kpa kera eren kwagh u una na se tsa “anyom kpishi” la ga shinii? (Yohane 3:16; 17:3) Bibilo kaa ér: “Inyaregh ki lu a inja sha iyange i ishima i vihin la ga,” man “Or u nan suur sha inyaregh ki nan yô, nan gba.” (Anzaakaa 11:4, 28) Sha nahan yô, Yesu mase seer kwaghwan sha injakwagh la, ér: “Or u nan lu koson inyaregh sha ci u iyol i nan, kpa nan kera lu ornyar sha kwagh u Aôndo ga la, kape kwagh u nan a lu ne.”—Luka 12:21.
11. Er nan i doo u ishimaveren yase man mkpeyol wase una har sha uyôughyôughmbaakaav ga?
11 Shighe u Yesu kaa ér “kape kwagh u nan a lu ne” la, lu kaan ér mba ve har uma ve, inja na yô ishimaverenkeghen ve man mkpeyol ve cii a har sha uyôughyôughmbaakaav, er ornyar u ken injakwagh la nahan cii yô, kape kwagh ve kpaa una kure vough je la. U or “koson inyaregh sha ci u iyol i nan” la ka kwaghbo ga, kpa ka u kera lun “ornyar sha kwagh u Aôndo” ga la i lu kwaghbo ye. Orhenen Yakobu kpa yange ta icin sha kwagh ne, wener: “Man ne mba ne kaan ner, nyian shin kper sé za ken gar ngura, sé za tema heera inyom i môm sé er kasua sé zua a mtsera; ne mba kper tsô kpaa ne kera fe er uma wen una lu ga ne.” Kanyi i doo u vea eree? “Ma ne kaa ner: Aluer Ter Una rumun yô, se lu uma, sé er nahan, shin nahan.” (Yakobu 4:13-15) Aluer or ngee a inyaregh shin nan ngu a akaa a dedoo kpishi kpa nan kera ngu ornyar sha kwagh u Aôndo ga yô, a wase nan ga. Kpa inja i u lun ornyar sha kwagh Aôndo la ér nyi?
Lu Ornyar sha Kwagh u Aôndo
12. Se er nyi ve se lu mbanyarev sha kwagh u Aôndo?
12 Yesu pase ken kwaghôron na la er u lun ornyar sha kwagh u Aôndo la a lu kposo a u or ombon uyôughyôughmbaakaav sha ci u nan yô. Sha nahan yô, Yesu lu kaan ér kwagh a de hembe gban se u ombon akaa a injaa shin ember uma sha akaa a se lu a mi la ga. Kpa se gema se yar tom a akaa a se lu a mi la sha u taver shin maan mlu wase vea Yehova. Aluer se mba eren nahan yô, se mba mbanyarev sha kwagh u Aôndo. Sha ci u nyi? Sha ci u ieren ne ia na se ian i zuan a averen hen a na kpishi. Bibilo kaa a vese ér: “Iveren i TER ngi ve a inyaregh, tom u nyoonyol seer ma kwagh sha i ga.”—Anzaakaa 10:22.
13. Iveren i Yehova ngi “ve a inyaregh” nena?
13 Yehova ka una veren ior nav yô, a na ve kwagh u a hembe doon cii yô. (Yakobu 1:17) U tesen ikyav yô, shighe u Yehova na Mbaiserael ijiir i vea tema la, yange na ve “tar u atumbabua man iyough dumbur ker” yô. Er i kaa ér tar u Igipiti kpa lu tar u atumbabua man iyough dumbur ker nahan kpa, tar u Yehova na Mbaiserael la lu kposo a tar u Igipiti sha kwagh u vesen môm. Mose yange kaa a Mbaiserael ér, “ka tar u TER, Aôndo wou, A nengen sha u yô.” Inja na yô, vea za ikyura gadia Yehova iyolna una nenge sha a ve. Yange Mbaiserael vea civir Yehova sha jighjigh yô, a ver ve doo doo shi ve ember uma u dedoo, u a hembe akuraior a a kase ve la cii yô. Sha kpôô yô, ka iveren i Yehova i “ve a inyaregh” ye!—Numeri 16:13; Duteronomi 4:5-8; 11:8-15.
14. Ka akaa a dedoo a nyi mba ve lu mbanyarev sha kwagh u Aôndo la ve zough a mi?
14 Shi i gema ishemberkwaghôron i lu “ornyar sha kwagh u Aôndo” la ken mgem u Bibilo u Today’s English Version la ér lu “ornyar sha ishigh ki Aôndo.” Mba ve lu mbanyarev yô, ka ve hemba veren ishima sha kwagh u vea er ve ior a soo ve yô. Uma ve jimin cii ka a tese ieren ne. Ka ve soo ér ior ve nenge a akaa a ve lu a mi, a Bibilo i yer ér “ihyagh i uma” la. (1 Yohane 2:16) Kpa mba ve lu mbanyarev sha kwagh u Aôndo yô, Aôndo ngu a lumun ve shi ve zua a mrumun u sha mhôôn na shi ve ya ikyar a na kangenaa kpaa. Imba mlu la na ve mkpeyol man mkor hemba kwagh u inyaregh ma ki er ve la. (Yesaia 40:11) Nahan kpa mpin u a gem a lu yô ér, se er nan ve se lu mbanyarev sha ishigh ki Aôndo?
Lu Ornyar sha Ishigh ki Aôndo
15. Ka nyi se er keng ve se lu mbanyarev sha kwagh u Aôndo?
15 Or u ken injakwagh i Yesu la er tom taveraa sha er una zua a inyaregh yô, nahan i yila un ér ibumeor. Nahan aluer se soo u lun mbanyarev sha kwagh u Aôndo yô, saa se er tom taveraa shi se nôngo kpoghuloo se er akaa a a lu a inja sha ishigh ki Aôndo yô. Kwagh môm ken akaa shon yô, ka u kuran tindi u Yesu wa ér: “Nahan yô, za nen, za gema nen akuraior cii a̱ hingir mbahenen” la. (Mateu 28:19) Aluer se mba eren tom a tahav asev man mfe wase sha ci u ugbayol asev ga, kpa se mba eren tom a mi sha u pasen kwagh u Tartor shi geman ior hingir mbahenen yô, a fatyô u kaan ér se mba koson inyaregh yasegh. Mba ve er kwagh ne yô zua a averen kpishi ken mcivir u Aôndo. Nenge ase akav a tesen agen a a lu shin heen ne.—Anzaakaa 19:17.
16, 17. Ka akav a tesen a nyi nahan a tese imba uma i or a eren ve nana lu ornyar sha ishigh ki Aôndo?
16 Nenge ase kwagh u Orkristu ugen u sha Ityoughkitaregh yange er ne. Yange eren tom u sôron ukômputa, man tom ne vaan un a inyaregh kpishi. Kpa tom ne yaan un shighe cica cii, nahan a hingir u lun ibanave ken jijingi. Ken masejime yô, or ne de tom u sôron kômputa la hide gba eren kwaghman u nyohon u i yer ér ice cream la teen sha godobi sha er una hemba zuan a shighe u civir Aôndo shi eren akaa agen a hange hange yô. Mba yange ve eren tom vea na imôngo naha un tar kpishi, kpa lu nyi i gema i eree? A kaa wener: “M hemba ngun a inyaregh hegen a shighe u m eren tom u sôron kômputa la. Shi hemba saan mo iyol sha ci u m kera ngu a zayol u yange m luun a mi sha tom u m vanden eren la ga. Man u hemban cii yô, m hemba kporom ikyua a Yehova hegen cii.” Kwagh u Orkristu ne er la wase un u eren tom u pasen kwagh hanma shighe, man hegen ngu eren tom shin afishi a branci a Mbashiada mba Yehova a ken tar na. Sha kpôô yô, iveren i Yehova ngi “ve a inyaregh.”
17 Ikyav i kwase ugen u vese hen tsombor u makeranta u henen lu u tamenkwagh la kpa ka i se fatyô u henen kwagh sha mi yô. A hen yunivasiti ken tar u France, Mexico man Switzerland, man lu sha ian i zuan a tom u dedoo kpishi. Kwase ne kaa wener, “Yange m za ikyura kpen kpen; heela tseegh ga, ior ve nam icivir kpishi shi ve nam ian i eren akaa a dedoo kpaa. Nahan cii kpa, ken atô u ishima yam yô, kwagh u dedoo môm lu ga, akaa ne cii nam mkom cuku ga.” Lu hen shighe ne va fa Yehova ye. A kaa ér: “Er m lu zan hemen ken mcivir u Aôndo yô, sarem u eren ishima i Yehova shi panden akaa a Yehova a nem la nan un, nahan m tôô tom u pasen kwagh hanma shighe la.” Yange de tom u eren la, ica gba ga maa er batisema. A er tom u pasen kwagh hanma shighe la anyom 20 hegen, man saan un iyol kpaa. A kaa wener, “Mbagenev hen ér m vihi a vihi mfe u m lu a mi la, kpa shi ve nenge er i saan mo iyol yô, shi ve wuese inja uma i m lu eren hegen ne kpaa. Hanma iyange yô, ka m er msen mer Yehova a wasem me hide a iyol ijime sha er una lumun mo yô.”
18. Se lu mbanyarev sha kwagh u Aôndo er Paulu nahan nena?
18 Saulu, u yange va hingir apostoli Paulu la kpa yange lu a tom u ua va un a inyaregh kpishi yô. Nahan kpa a nger ér: “M nenge akaa cii hingir mo msaa sha ci u mfe u fan Kristu Yesu Terem la a hembe ica yum yô.” (Mbafilipi 3:7, 8) Hen Paulu yô, kwagh u zua a mi hen Kristu la hemba un hanma kwagh u tar ua fatyô u nan un cii. Aluer se kpa se kera zenda akaa a iyolough ityo ga kpa se gema se na ayol a ase sha u eren Aôndo tom hanma shighe yô, kape se ember uma u dedoo sha ishigh ki Aôndo je la. Mkaanem ma Aôndo taver se ishima ér: “Injar i mhir u iyol ijime, cian TER yô, ka inyaregh man icivir kua uma je.”—Anzaakaa 22:4.
Ú Fatyô u Pasen Kpa?
• Ka zayol u nyi or u ken injakwagh i Yesu la lu a mini?
• Yange i yila or u ken injakwagh la ér ibumeor sha ci u nyi?
• Inja i u lun mbanyarev sha kwagh u Aôndo la ér nyi?
• Se lu mbanyarev sha ishigh ki Aôndo nena?
[Study Questions]
[Picture on page 24]
Yange i yila ornyar la ér ibumeor sha ci u nyi?
[Picture on page 25]
Aan a zan ikyura ken uma aa hingir ikyaren i taver hen a vese nena?
[Picture on pages 26, 27]
“Iveren i TER ngi ve a inyaregh, tom u nyoonyol seer ma kwagh sha i ga”