Ityakerada yase pase ér Gogi u Magogi la ka iti i yange i na Satan Diabolo shighe u i daar un Sha i gbihi shin tar ne la, ica gba hegen. Yange i pase nahan sha ci u takerada u Mpase kaa ér ka Satan Diabolo una va hemen ken num u tar cii u a lu nôngon a ior mba Aôndo la ye. (Mpa. 12:1-17) Nahan yange se hen ser a shi nan kpa Gogi ka iti i Satan igen.

Nahan kpa, kwagh u se pase la gema due a mbampin mba hange hange mbagen. Sha ci nyi? Time ase sha kwagh ne: Shighe u Yehova lu ôron kwagh u mtim u a va tim Gogi la, a kaa ér: “Me gema u, Me na inyon i tswam i lun anza kposo kposo kua inyamtoho sha u i̱ ya u” yô. (Esek. 39:4) Shi Yehova kaa ér: “Sha iyange la, Me na Gogi ijiir i iwaregh ken Iserael . . . Ka heregh vea ii Gogi a ikpelaior na cii ye.” (Esek. 39:11) Nahan kpa, a er nan ve “inyon i tswam i lun anza kposo kposo kua inyamtoho” ia ya ortyomo? A er nan ve a “ii” Satan shin tar nee? Bibilo pase wang ér, a va ya Satan shin a ii un ga, kpa i pase ér a va kende Satan shin ihyungwa i i ze kweng la una lu shimi anyom 1,000.—Mpa. 20:1, 2.

I kaa a vese ér anyom 1,000 la aa been yô, a pase Satan maa “una due sha u tsughun akuraior a ken azongo a tar anyiin la, ka Gogi man Magogi je la, ka sha u una kohol ve sha ci u utya.” (Mpa. 20:8) Kpa aluer ka Satan a lu Gogi yô, una hide a bume Gogi inja nena? Sha nahan yô, “Gogi” u i er kwagh na ken takerada u Esekiel man Mpase la, ka Satan ga.

Nahan ka an nan lu Gogi u Magogi laa? Cii man se na mlumun sha mpin la yô, a gba u se time ken Ruamabera se fa mba vea va ta num sha ior mba Aôndo la. Bibilo ôr kwagh u num u ‘Gogi u Magogi’ una va ta sha ior mba Aôndo la tseegh ga, i ôr kwagh u num u “tor u ken imbusutarimese” man “utor mba shin tar” vea va ta sha ior mba Aôndo la kpaa. (Esek. 38:2, 10-13; Dan. 11:40, 44, 45; Mpa. 17:14; 19:19) Kwagh ne tese ér iniongo kposo kposo ia va ta num sha ior mba Aôndo? Ka nahan keng ga. Bibilo ngi ôron kwagh u num shon môm tsô, kpa geman teren num la sha ati kposo kposo je ka u henen ga. Se fatyô u kuren ikyaa nahan sha ci u nyi? Se ôr nahan sha ci u Ruamabera kaa a vese ér akuraior a sha won cii aa va nôngo ityav mbi masetyô mbi mbia va a ityav mbi Armagedon la.—Mpa. 16:14, 16.

 Aluer se gbidye kwar sha avur a Bibilo a a er kwagh u ityav mbi masetyô mbi a va ta sha ior mba Aôndo la cii yô, se kav wang ser ka Satan i yer un sha iti i Gogi u Magogi la ga, kpa ka mzough u akuraior cii a a va zua a ta num sha ior mba Aôndo la. A lu “tor u ken imbusutarimese” la una hemen mzough ne yee? Se fatyô u ôron nahan jighilii ga. Kpa mhen ne nôngo u zuan sha kwagh u Yehova a er sha kwagh u Gogi la, ér: ‘Wea mough hen ijiir you hen akighiratar a ken imbusutarimese, we man ior kpishi a we imôngo, ve cii vea lu sha anyinya, ikpelaior i ngeen tsung, man ikyumutya i ageegh.’—Esek. 38:6, 15.

Profeti Daniel, u un kpa lu uma shighe môm vea Esekiel la, ôr kwagh u tor u ken imbusutarimese la ér: “Igwa i sha ityoughkitaregh man i ken imbusutarimese ia ta un mciem iyol, nahan una due a ishima i nyoon tsung sha u timin ior kpishi man shi u saren ve kera. Una mande utenti mba iyou i tor hen harga u zegemnger a icighanwo u Icivirigh; nahan kpaa una tim her, ma or nana wase un kpaa ga.” (Dan. 11:44, 45) Kwagh ne zua sha kwagh u takerada u Esekiel u er sha kwagh u ityom i Gogi la kpian.—Esek. 38:8-12, 16.

Ka nyi ia er shighe u a nôngo ityav mbi masetyô ne a bee laa? “Hen shighe la Mikael [Yesu Kristu], ortaregh u a nengen sha ônov mba nongo wou [hii inyom i 1914] la, una mough á tile sha [sha Armagedon]; ican ia er sha shighe la, imba i i lu a er mayange ga yô, hii sha shighe u ikyurior i lu sha won, zan zan ar hen shighe ne; hen shighe la, á yima ior ou, hanma or u i nger nan ken ruamabera yô.” (Dan. 12:1) Shi Mpase 19:11-21 kpa pase ér ka Yesu una er tom ne sha ci u Aôndo ye.

Kpa ka an nan lu “Gogi man Magogi” u i er kwagh u nan ken Mpase 20:8 laa? Iti ne ngi ôron kwagh u ior mba vea va hemba Yehova ato shi vea ta num sha ior nav sha shighe u ikyaren i masetyô la cii, zum u anyom 1,000 aa bee kera la. Vea tese er ve ker ior mba Aôndo ihyom yô, vough er ‘Gogi u Magogi’ u a lu akuraior a sha won a a ta num sha ior mba Aôndo sha mkur u zegecan la nahan. Iniongo i ihiar ne cii a lu kwaghmôm una tser i ye, ka mtim u tsôron je la. (Mpa. 19:20, 21; 20:9) Nahan doo u a yila mba vea hemba Aôndo ato shighe u Anyom Dubu aa bee la cii ér “Gogi man Magogi.”

Er se lu mbahenen Mkaanem ma Aôndo zulee yô, se mba keghen sha u se fa mba ica a kera gba tsô vea hingir “tor u ken imbusutarimese” la. Nahan kpa, a lu nyi nongo je ia va hemen akuraior u nôngon num a ior mba Aôndo kpa, kwagh u se fe yô ka un ne: (1) A hemba Gogi u Magogi man akumautya na cii ityav gburu gburu shi a tim ve kera purututu; (2) Yesu Kristu u a tem Tor la, una va yima ior mba Aôndo shi una nyôr a ve ken tar u he, ape bem man mkpeyol u mimi una lu la.—Mpa. 7:14-17.