NGÔM yange pinem ér: “Er nan jim u soo u civir uter ou mbatsev ga? U fa er i lu ve ve ne u lu uma kpa? U tese ve wer u ngu a iwuese gaa? A er nan u gba den aeren a ityôô a sha ikyov ikyov la nahana? Aluer u venda u civir uter asev mba tsev yô, u ngu kaan wer mcivir wase cii ka ibumekwagh.” Ngôm ôron kwagh ne been yô, a mindi mliam, gba vaan.

Cii man shighe ne yô, iwer i karen ken ijime la, Mbashiada mba Yehova va ér vea hen Bibilo a ngôm. Kpa er soo u vendan a ve jighilii ga yô, a kaa ér ve hen kwagh a mo. Kpa hegen ne ishima vihi un a mo, man lu kwagh u vanden eren ga yô, sha ci u m hemban un ato ga. Nahan kpa, er m soo mer me na i saan Yehova iyol yô, m hemba ngôm ato kwa ne. Lu kwagh u taver mo kpishi, kpa Yehova nam agee.

Yange se eren kwaghaôndo u Mbabuda u ior kpishi ken tar u Japan ve eren la. Kpa m hen kwagh a Mbashiada mba Yehova iwer ihiar tseegh, maa m na jighjigh mer kwagh u Bibilo i er la ka mimi. M fe mer m ngu a Ter u sha yô, sarem tsung u fan un. Doo ngôm man mo u lamen sha kwagh u m lu henen la kpen kpen. Maa m hii u zan mbamkombo mba sha iyange i Lahadi ken Iyou i Tartor. M gbe fan mimi seer yô, m kaa a ngôm mer me kera eren mbaadini mba ken kwaghaôndo u Buda la ga. Fese nahan, maa gema inja. A kaa ér: “Aluer se mba a or hen tsombor wase u uter asev mbatsev ve doo nan ishima ga yô, ka kwagh u kunya.” Maa a kaa a mo ér m de Bibilo i henen kua mbamkombo mba zan. Lu kwagh u cuku kpa m hen mer ngôm una ôr ga yô! Ngôm gema hingir kwagh ugen.

M hen ken Mbaefese ityough 6 mer, Yehova soo ér m ungwan imo i mbamaren av. Terem kpa ta ikyaa a ngôm. Sha hiihii la, m hen mer aluer m ungwa imo ve yô, ve kpa vea kegh ato a mo, nahan bem una hide a gba hen tsombor wase. Heela tseegh ga, ikyaren yam i zan kôleeji lu zulum, nahan m soo u tôôn shighe wan iyol sha mi. Nahan m lumun u eren kwagh u ve ôr ne iwer itiar, kpa m gema m tôndo zwa a Yehova mer iwer la ia bee kera tsô, me hide me hii u zan mbamkombo.

Kwagh u m tsua u eren ne doo ga sha igbenda ihiar. Hiihii yô, m hen mer ishimatseen yam la ia gema ken ato u iwer itiar ga. Kpa fese nahan, m hii u lun ijen ken jijingi, shi m lu gban ica a Yehova seer a seer. Kwagh u sha uhar yô, mbamaren  av saa sha kwagh u ve ôr la ga, ngôm man terem lu hemban taver mo ishima ér m de u civir Yehova kuaa.

Yange m zua a ior ken Iyou i Tartor kpishi mba tsombor ve lu hendan a ve yô. Ve taver mo ishima ér Yehova una wasem. (Mat. 10:34-37) Ve kaa a mo ér ka mo me na tsombor wam ua va zua a myom ye. Nahan m hii u eren msen kpoghuloo, m soo mer me hen u suur sha Yehova.

Yange m tagher a ahendan kpishi hen tsombor wam sha igbenda kposo kposo. Ngôm yange a zamber mo shi a tema a hen sha kwagh ne a mo zutuu. Ashighe kpishi m lu ving, zwa kpa m bugh ga. Mea lagh a bugh zwa kpa, ashighe kpishi i hingir zwa, sha ci u hanma wase nan nôngon ér nana pase ityôkyaa i nan. M kav hegen mer, luun er yange mea we mbamnenge kua akaa a ngôm na jighjigh a mi la ikyo yô, alaghga ishima ma hemba gban un shimi. Kpa er m er nahan ga yô, mbamaren av seer mo ityom i hen ya sha er me zua a ian i zan mape ga yô. Ashighe agen i gesam ken iyou gayô i verem kwaghyan ga.

Kwagh hembe ngôm yô, a kaa a mbagenev ér ve wase un. A za zamber a tica wam ér a venda a mo m de u civir Yehova, kpa orti wa uwegh sha kwagh la ga. Ngôm shi za a mo hen manija u hen ijiirtom na, sha u or shon a pasem er ukwaghaôndo cii ve lu ibumekwagh yô. A hiden hen ya yô, ngôm a tôô telefon a yila anmgbianev asev kposo kposo, a gba zamber a ve a mliam ikyer ér ve wase un. Kwagh ne a vihim i pev, kpa mea zaan mkombo yô, mbatamen ve taver mo ishima ér ior mba ngôm a lu lamen a ve la cii, ngu pasen ve kwagh kpa a fa ga.

 Shighe kar yô, m tagher a ikyaa i zan yunivasiti. Mbamaren av wa iyol u nam mo kwagh u ve hen ér ka kwagh u hemban cii u una wasem ken uma yô. Ve ver ishima ér me been makeranta yô, me zua a tom u injaa. Yange lu kwagh u se fatyô u teman imôngo lamen sha kwagh ne ken bem ga, nahan m nger ngôm man terem uwashika imôngo, m pase ve mbaawashima av. Ishima vihi terem ker, a anger mo a kaa ér: “Aluer u hen wer u zua a tom yô, zua a mi kper la, gayô u ngu duen hen ya ne kera.” M sôn Yehova sha kwagh ne. Kpernan m dugh kwaghpasen yô, anmgbianev mba kasev uhar kposo kposo kaa ér m za tesen ônov vev. Nahan cii kpa, kwagh ne doo terem ga, shi de u lamen a mo kuaa, shi gema palegh mo. Ngôm kaa ér guda ma m lu kwasembaiv a u lun Kwaseshiada la.

Ashighe agen i lum er m venda u eren kwagh u mbamaren av ve soo la za per uwer, nahan m ngu peren tindi u Yehova nahan. Kpa er m seer eren msen shi gbidyen kwar sha avur a Bibilo a a er kwagh u dooshima u Yehova yô, kwagh ne wasem u lun a mnenge u vough sha kwagh u ahendan ne, shi m kav mer ityôkyaa i môm i i ne ve mbamaren av ve lu hendan a mo yô, kwagh wam gba ve ishima. Yehova wasem u sôron mhen wam ne, shi tesem kwagh u me er yô. Shi mea seer duen kwaghpasen yô, i seer saan mo iyol. Maa m wa ishima u eren tom pania.

M pasen anmgbianev mba kasev mbagen mer m soo u eren tom pania yô, ve wam kwagh ér m tamber ishima i gba mbamaren av shimi ve. M sôn Yehova kwaghfan shi m time ken ityakerada yase, shi m tôv sha mbaawashima av shi m lam a anmgbianev mba nomso man mba kasev mba vian ken jijingi sha kwagh ne. Maa m tsua mer me er ishima i Yehova. Heela tseegh ga, m nenge yô, aluer m tamber u eren pania tsô maa mbamaren av vea gema inja ga.

M hii pania u eren ken inyom i m lu been kôleeji la. M eren pania shighe kar yô, m wa ishima u za eren tom ape kwagh a hembe gban sha mbapasenkwagh yô. Kpa ngôm man terem soo ér m undu ya ga. Nahan m tamber zan zan m kar nyôron anyom 20. Ka va kuman mo u moughon yô, m nger afishi a branci mer i tindim hen vegher u Japan ugen ape anmgbianev asev lu la, sha er ishima ia wa gban ngôm shimi yô.

M yemen yô, saan mo iyol er m zua a ior kpishi mba m hen Bibilo a ve, ve er batisema yô. Shi yange m hen zwa Buter kpaa sha er me seer eren tom u pasen kwagh yô. M lu hen tiônnongo môm vea anmgbianev mba nomso mbagen uhar mba ve lu ikpur pania yô. M nenge a gbashima ve kua er ve lu wasen mbagenev la. Nahan awashima wam lu u hingir ikpur pania. Hen shighe ne, vihi ngôm iyol tsung kuma kwa har. Sha ashighe ne cii m hide hen ya sha u va nengen sha a na. Kwagh ne kpiligh un iyol, nahan a wa panden u hendan a mo.

Anyom nga kar ataankarahar yô, m zua a washika hen Atsushi, u lu môm ken anmgbianev mba ve lu ikpur pania, mba m vande teren kwagh ve la. A kaa ér un soo u vôson kwase, nahan un soo u fan aluer ka u me lumun u vôson un yô. Mayange m vande lun a imba isharen ne sha Atsushi ga, shi m hen mer un kpa lu a mi sha a mo ga. Uwer ngu kar yô, m nger un washika m kaa mer doom u ma se seer fan ayol a ase. Maa se kav er inja yase zua sha akaa kpishi yô, sha ci u se cii se soo tom u pasen kwagh hanma shighe la, shi se kegh iyol u eren nyi tom u i ne se cii. Shighe kar yô, se er ivese. Ngôm man terem kua anmgbianev av kpishi za ivese ne, nahan saan mo iyol kpishi!

Shighe u se lu eren pania u keke la, ica gba ga maa, i tsua Atsushi hingir ortamen u wasen ortamen  u sôron atôônanongo tom. Shi ica i gba ga maa se zua a averen agen. I na se tom u ikpur pania, maa shighe kar yô, i tindi se ér se za er tom u sôron atôônanongo. Se mba sôron atôônanongo a hen ningir la cii sha kwa môm yô, afishi a branci yila se sha telefon. I pine se er nyi? I pine se ér, ‘Ne lumun u za eren tom u sôron atôônanongo ken tar u Nepal kpa?’

M lu henen er mbamaren av vea ungwa er se lu yemen ica hiinii la ve a lu ve yô. Nahan m yila ve sha telefon. Lu terem tôô ye, nahan a kaa ér: “Ijiir i u lu zan la i doo.” Kasua u karen ken ijime la, ijende na igen na un takerada u u er kwagh u tar u Nepal yô, nahan terem lu vanden henen kera ér, ijiir la ia doo u zan zende her.

Er se lu za eren tom wase saan saan ken tar u Nepal ape ior ve fe kwagh yum la, shi se zua a iveren igen. Gba u se sôron atôônanongo a ken tar u Bangladesh kpaa. Tar ne ngu ikyua a tar a Nepal, kpa u gema u kaha sha igbenda kpishi. Yange i gba u se hen igbenda kposo kposo i pasen kwagh. Se mba eren tom ne anyom ataan nga kar yô, i hide i tindi se ér, se za er tom u sôron atôônanongo ken tar u Japan, ape se lu zan zan hegen la.

Tom u se er ken tar u Japan man Nepal kua Bangladesh la tesem akaa kpishi sha kwagh u Yehova! Hanma tar yô, aeren a ityôô a u kaha. Shi ken hanma tar yô, hanma or ngu a inja i nan. M kav er Yehova a nengen sha ior asange asange shi a lumun ve shi a wasen ve shi a veren ve yô.

Mo iyol yam kpa Yehova verem; a na m fa un, shi a nam tom kua nom u injaa. Aôndo wasem u tsuan akaa sha inja, shi hegen m ya ikyar a na kangenaa kua tsombor wam. M sugh Yehova er mo man ngôm se hidi se doo hegen yô. Doom kpishi er m hingir u lun ken bem vea Aôndo man ngôm yô.