Yehova Na Se Ian i Tsuan Kwagh u Se Soo La

Duteronomi 30:11-20

“ASHIGHE kpishi yange m gbaa cian a ityôkyaa shio tsô mer, me kanshio u civir Yehova sha mimi.” Ka kwagh Kwasekristu ugen, u hen wener akaa a vihin a yange er un yev la, aa na yô una kanshio u civir Aôndo yange ôr je la. Kpa kape i lu laa? Mimi je, se mba a mpe sha kwagh u a eren ken uma wase gaa? Ei. Yehova na se ian i tsuan kwagh u se soo u eren la, nahan se fatyô u tsuan akaa a se soo u eren ken uma wase yô. Yehova soo ér se tsua akaa a dedoo, man mkaanem nam Bibilo kaa se er se er kwagh ne yô. Time ase sha mkaanem ma Mose ma i nger ken Duteronomi ityough 30 la.

Taver u fan kwagh u Aôndo a soo ér se̱ er la shi eren unu? * Mose kaa ér: “Gadia tindi u m we u nyian ne a hemba u agee ga, man ngu ica kpaa ga.” (Ivur 11) Yehova kaan ér se er kwagh u se kanshio u eren la ga. Atindi na taver gande ga shi se fatyô u kuran a kpaa. Man shi se fatyô u fan a kpaa. Gba u saa se “unde sha aôndo” shin se “per zegemnger” ve se hen se fa kwagh u Aôndo a soo ér se eren ga. (Ivur 12,13) Bibilo pase se wang er se er a uma wase yô.—Mika 6:8.

Nahan kpa, Yehova kighir se ér se ungwa imo na ga. Mose kaa ér: “Nenge, m ver u uma man mkpeyol, ku man shi kwaghbo sha ishi nyian.” (Ivur 15) Se mba a ian i tsuan uma shin ku, kwaghbo shin kwagh u dedoo. Se fatyô u tsuan u civir Aôndo, nahan se zua a averen, gayô se tsua u hemban un ato, nahan se ya ican. Nyityôkwagh i se tsough cii, ngula mase shin ishima yase.—Ivur 16-18; Mbagalatia 6:7,8.

Kwagh gbe Yehova sha kwagh u se tsough u eren laa? Kwagh gbe un sha mi yumu! Aôndo yange mgbegha Mose kaa ér: “Yô, tsua uma.” (Ivur 19) Nahan kpa, se tsua uma nena? Mose pase ér: ‘TER, Aôndo wou, A̱ doo u ishima, ungwan imo Na, var a Na.’ (Ivur 20) Aluer se fa Yehova yô, nyityôkwagh ia er kpa, a doo se u ungwan imo na shi varen a na kpiangesaa. Aluer se er kwagh nahan yô, se lu tsuan uma, ka inja uma i í hembe doon hegen cii je la, man mba ve tsough inja uma ne cii mba a ishimaverenkeghen i va zuan a uma u tsôron ken tar u he la.—2 Peteru 3:11-13; 1 Yohane 5:3.

Mkaanem ma Mose man tese se mimi u nan se vangertiôr. Aluer kanyi je i̱ er u ken botar ne kpa, u ngu a tahav mbu geman uma wou, shi ka u ú kanshio u lun or u injaa ken tar ne gbindigh gbindigh je ga. Yehova na u ian i civirigh i tsuan kwagh u ú soo u eren la. Sha mimi yô, u fatyô u tsuan u soon Yehova, ungwan imo na shi lun jighjigh hen a na gbem. Aluer u tsua imba uma la yô, Yehova una ver iniôngon you la doo doo.

Mimi u a pase se ian i se lu a mi i tsuan a ishima yase u soon Yehova shi civir un la yange sur kwase u se vande teren un ken mhii u ngeren ne la ishima. Nahan a kaa ér: “Yehova doom ishima. Kwagh u a hembe lun kwagh u injaa yô, ka mdoo u Yehova a doom ishima la, kpa ashighe agen kwagh ne ka a hungur mo. Inja na yô, me fatyô u civir un sha mimi.” Sha iwasen i Yehova yô, we kpa u fatyô.

[Ngeren u shin kpe]