ORGEN u i yer un ér Jonathan, u mbamaren nav ve lu marnya u tar u Korea, kpa ve za mar un ken tar u Amerika yô, yange ior nyaghen un shighe lu iyev la. Ngur vesen yô, a ker ijiir igen i ior vea nyagh un sha ci u mlu u ishigh nagh shin tar na ga la, a za lu her. Or ne za hingir ortwer hen geri ugen ken imbusutarimese i kpentar u Alaska, ken tar u Amerika, ape mluyol na nôngo u lun kwagh môm a u ior mba ve vaan tswer hen iyouci na la. Jonathan lu henen ér, er un yem hen ijiir i ndôhôr, i í yer ér Arctic Circle la nahan kpa, un gema un war a war akaa a vihin tsung a ieren i nyaghen mbagenev ka i va a mi la je.

Ishimaveren i Jonathan ne va hingir gbilinkwagh zum u lu sôron kwase ugen u lu anyom 25 twer yô. Kwase ne hume, va bughun ashe, kenger Jonathan sha ishi yô, a tuhwa un, sha ci u i tese un iyev je ér a nyaghen ior i tar u Korea. Kwagh ne vihi Jonathan tsung, sha ci u a mase kaven ér, ape una za lu ve ior a de u nyaghen un je kpa ngu ga.

 Kwagh u er Jonathan ne tese mimi u vihin tsung ne. Ieren i nyaghen mbagenev la ngi hanma ijiir sha tar cii. Ka inja er hanma ijiir i ior ve lu yô, ieren i nyaghen mbagenev la ngi her nahan.

Shin er ieren i nyaghen mbagenev ne i ngee yum nahan kpa, ior kpishi ka ve venda ieren ne a vaa zwa. Sha mimi yô, ior kpishi mba ngôôr vendan ieren ne ga, kpa mba a ieren ne ken a ve. Kpa er nan ve kwagh u ior ve soo un ga tsung ne shi a gem a samber wuee yum nahana? Ikyav tese ér ior kpishi mba ve lumun a ieren i nyaghen mbagenev ga la, mba fe ér ve ayol a ve mba nyaghen mbagenev ga. We u na mlumun sha mpin la nena?

Sea fa shin sea fa ga kpa, ka ican u fan ser se mba a ieren i nyaghen mbagenev la ken a vese. Bibilo pase er i hii ve kwagh a lu nahan yô. I kaa ér: “Ishima i wa atseregh je hemba hanma kwagh cii.” (Yeremia 17:9) Sha nahan yô, alaghga se lu bumen ayol a ase ser, se soo hanma kweior cii. Shin se kaa ser se mba a ityôkyaa i injaa i i ne ve se nyaghen mbagenev ga yô.

Nenge ase kwagh u una wase se u kaven er ka i taver se u fan er se lu a ieren i nyaghen mbagenev la ken a vese yô: Tôô wer, u ngu yemen sha godobi tugh we tswen. Nahan u nenge agumaior ahar a u fe a ga yô, nga van we sha hemen. Agumaior ne gba ikyôr, man ka inja er ugen kôr kwagh ken uwe nahan.

U kure ikyaa wer agumaior ne soo u bulan wee? Alaghga ma kwagh u a vande eren we, una na yô, u kure ikyaa wer gba u ú wa ikyo, kpa sha mimi yô, kwagh shon la na u ishô u kuren ikyaa wer agumaior ne soo u bulan we he? Ka mpin ugen u i doo u ú pine iyol you je ne, Ka hanma zwa shin ikyurior nahan u hen wer agumaior ne due kere? Wea hen wer u ngu a ieren i nyaghen mbagenev la shin wea hen nahan ga kpa, mlumun u ú na sha mpin ne la una wase u u̱ fan.

Aluer se mba ior mba ôron kwagh sha mimi yô, se cii se lumun ser, hanma or yô, nan ngu a ieren i nyaghen mbagenev la ken a nan. Bibilo kpa i ôr kwagh u ieren i nyaghen mbagenev i ior kpishi ve lu a mi yô, ér: “Or nengen mluashe u ken won.” (1 Samuel 16:7) Er ieren i uumace ne i tser se cii, man ashighe kpishi ka i va a kwagh u vihin tsung nahan, ma ishimaverenkeghen ngi ér ieren i nyaghen mbagenev la ia tsa a bee sha won je he? Ma shighe ngu van u ieren i nyaghen mbagenev la ia va kera lu ma ijiir i môm sha tar ga yôô?