Kwase ugen u yange i taver un u lumun ér Yehova una zua a ityôkyaa i wan un ikyo yô, kaa ér: “A shi nan kpa kwagh u vesen u ngu a yange or u kporom hen Aôndo yô, ka u henen ér nan gba kwagh ga la, nahan m ngu nôngon mer me dugh mhen ne ken mo kera.” We kpa kape ka i lu u laa? Aluer ka nahan yô, alaghga u pine wer, ‘Yehova we mbacivir un ikyo asange asange mimi kpa?’ Mlumun ka een! Se fa ser kwagh ngu nahan sha ci u mkaanem ma Yesu ôr man.—Ôr Yohane 6:44.

Yesu u a hembe fan kwagh u Yehova kua ishima na a hanma orgen cii la, yange kaa ér nyi? (Luka 10:22) Yange kaa ér: “Ma or nana fatyô u gban van her a mo ga, saa Ter u A tindim la, Una urugh nan.” Nahan, se fatyô u hingir orhenen u Kristu, kua or u civir Yehova, Ter wase u sha la ga, saa Yehova iyol na una urugh se. (2 Mbatesalonika 2:13) Aluer se kav kwagh u Yesu yange ôr ne yô, se fatyô u nengen a ikyav i tesen wang ér Yehova we se ikyo asange asange la, ken mkaanem mara.

Yehova ka a urugh se inja nena? Ishember i ken zwa Grika i í gem ér “urugh” la, shi i ter i ape i ôr kwagh u kpelan kpev u i ker ishu ker la. (Yohane 21:6, 11) Kpa Yehova ngu a urugh se, a kighir se ér se civir unu? Ei. Yehova gba se, na se ian i eren kwagh sha ishima yase, sha nahan yô, kighir se ér se bugh ishima yase sha ci na ga. (Duteronomi 30:19, 20) Orfantakerada ugen ôr kwagh ne nahan ér: “Mba bughun hunda u ishima yase ken won ga, saa ken atô.” Yehova ngu tôvon asema a ior ubiliôn ubiliôn shin tar, keren mba asema a ve a lu hen a na la. (1 Kroniku 28:9) Ka una zua a imbaor la yô, a er kwagh a nan sha gbenda u doon tsung. Ngu a er nena?

Yehova ngu a urugh or u ishima i nan i tese ér ‘sar nan’ u civir un la. (Aerenakaa 13:48, NW.) Ngu a er kwagh ne sha igbenda ihiar. Hiihii yô, ka sha loho u dedoo u ken Bibilo, u ka i pase se asange asange la, man u sha uhar yô, ka sha ikyev i icighan jijingi na. Yehova ka una nenge a or u mimi u ken Bibilo la a doo nan yô, a na nan icighan jijingi na sha er a wase nan u kaven shi dondon mimi la ken uma u nan yô. (1 Mbakorinte 2:11, 12) A iwasen i Yehova shio yô, mayange se fatyô u hingir mbadondon mba Yesu mba mimi man mba civir Aôndo sha gbashima ga.

Nahan yô, mkaanem ma Yesu ma i nger ken Yohane 6:44 la, tese se nyi sha kwagh u Yehovaa? Yehova ngu a urugh ior sha ci u a nenge a kwagh u dedoo ken a ve, shi we ve ikyo asange asange. Kwase u se er kwagh na ken mhii u ngeren ne la, yange kaven mimi ne yô, a zua a msurshima kpishi. A kaa ér: “U civir Yehova la, ka ian i icivirigh i hemban cii i or a fatyô u lun a mi je la. Man aluer Yehova tsuam ér m civir un yô, tese ér m gba un kwagh.” We di ye? Er u fe wer Yehova we mba ve civir un mbara ikyo asange asange nahan, kwagh la mgbegha u u kporom ikyua a na kpa?