Ka nyi u er ve Bibilo ia maa u iyol u ôron shi u zua a mtsera kere? Nenge ase mbamhen utaan mba i due a mi heen ne. Ior kpishi dondo mbamhen mban nahan wase ve.

Ker ijiir i i doo yô. Tema hen ape i huan ving yô. Nôngo akaa a danen we a de lu kpishi ga, sha er u ver ishima you sha kwagh u u lu ôron la yô. Tema pe u zua a ahumbe a dedoo kua ape iwanger i lu tsembelee yô.

Lu a ishima i gbar gbar. Bibilo due ka hen Ter wase u sha la. Nahan aluer ieren yase ngi er i wanye u i sar nan u henen kwagh hen ter u nan u a we nan ikyo nahan yô, se hemba zuan a mtsera ker. Aluer u vande ngun a mbamhen mba shami ga sha kwagh u Bibilo yô, undu ve, gema na Aôndo ian a tese u.—Pasalmi 25:4.

Er msen cii man u ôr i ye. Ka mbamhen mba Aôndo ve lu ken Bibilo ye, sha nahan yô, saa una wase se ve se kav i ye. Aôndo tôndo zwa ér una na “mba ve sen Un la Icighan Jijingi” na. (Luka 11:13) Icighan jijingi una wase u u kaven gbenda u Aôndo a henen kwagh la. Shighe a karen yô, una bugh u ishima u kaven “akaacimin a Aôndo je kpaa.”—1 Mbakorinte 2:10.

Ôron i wer u soo u kaven kwagh u a lu ker la. De ôron Bibilo wer u nôngo u ôr u bee ga. Kpa hen sha kwagh u u lu ôron la tsung. Pine iyol you mbampin mban: ‘Ka aeren a nyi m nenge a mi ken or u m lu ôron kwagh u nan nee? Me dondo kwagh ne ken uma wam nena?’

Lu a akaa a u we ishima u eren yô. Wea soo wer Bibilo you i ôron la i hemba lun we a inja yô, nôngo u zuan a kwagh ker u u dondo ve uma wou una hemba doon yô. U fatyô u tsuan wer u er ambaakaa ne nahan: ‘M soo u seer fan kwagh u Aôndo.’ Shin, ‘M soo u seer lun or u injaa, shin nom u injaa, gayô kwase u injaa.’ Maa tsua ajiir a u ôr ken Bibilo ve aa wase u u kuren mbaawashima ou mban yô. *

Mbamhen utaan mba i dugh a mi sha heen mban vea wase u u hiin Bibilo i ôron. Kpa u er nan ve Bibilo shon ia hemba maan we iyol u ôrono? Ngeren u a dondo ne due a mbamhen mbagenev.