Гынансак-да, олар йити ысың бар ерлеринден хемише гача дуруп билмейәрлер. Шол себәпли кәбир доган-уялар: «Йыгнак душушыкларына я-да конгреслере гелйән имандашлардан атыр сепинмезлиги хайыш эдип болармы?» дийип сораярлар.

Элбетде, месихчи йыгнага гелйән адамларың хич бирине яманлык этмек ислемейәр. Себәби биз бирек-биреги рухландырмак ислейәрис (Евр. 10:24, 25). Йити ысдан эҗир чекйән адамлара кәте йыгнак душушыкларына гатнашмак кын боляр. Шол себәпли олар йыгнак яшулуларындан көмек сорап билерлер. Эмма Мукаддес Язгыларда атыр сепинмек бабатда гөркезме берилмейәр. Йыгнак яшулулары бу бабатда белли бир дүзгүн чыкармаярлар. Муңа гарамаздан, олар доган-уялара шейле адамларың ягдайына дүшүнмәге көмек эдип билерлер. Меселем, яшулулар өңки макалалара эсасланып, Гуллук душушыгының ерли зерурлыклар бөлүминде кәбир пикирлери окап я-да сыпайчылык билен билдириш эдип билерлер *. Эмма муны хер сапар гайталап дурмалы дәл. Йыгнак душушыкларына хакыкат билен гызыкланян дүрли-дүрли адамлар гелйәрлер. Биз оларың атыр сепиненлиги себәпли өзлерини оңайсыз дуймагыны ислемейәрис.

Йыгнак яшулулар йити ысдан эҗир чекйәнлериң ягдайыны гөз өңүне тутуп, олара Патышалык залының бир отагыны бермели. Шейдип, олар сес эшидилйән гурал аркалы йыгнак душушыкларыны диңләп билерлер. Эгер шейле мүмкинчилик ёк болса, онда яравсыз доган-уяларың йыгнак душушыкларыны телефон я-да язгы аркалы диңлейишлери ялы, олара-да шейле мүмкинчилиги дөретмели.

«Худая гуллугымызың» соңкы санларында хем конгресе гелйән адамлара атыр сепинмек барада маслахат берилйәр. Конгреслериң көпүси япык җайларда гечирилйәнлиги ве ол ерде хованы тәмизлейән серишделериң ишлейәндиги үчин йити ыслы атыры азрак сепинмеги хайыш эдилйәр. Эмма йыгнак душушыкларында атыр сепинмек барада белли бир дүзгүн чыкармалы дәл.

Биз залым дүнйәде бикәмилликден яңа эҗир чекйәрис. Шол себәпли бизиң аладамыз эдилсе, өрән бегенйәрис. Кәбир доган-уялар йыгнакда йити ыслы атыры азрак сепинип, башгаларың аладасыны эдйәндигини гөркезйәрлер. Шейдип, биз доган-уялара сөйгүмизи билдирерис!

Мукаддес Язгыларда Понтиус Пилатусың Исаны өлүм җезасына хөкүм эдендиги барада язылан (Мат. 27:1, 2, 24—26). Эмма ол барада башга-да тарыхы китапларда энчеме сапар душ гелйәр. Бир сөзлүге гөрә, гадымы язгыларда «Яхудада Рим хөкүмдарларының арасында (Пилатус хакында) иң көп ве җикме-җик маглуматлар берилйәр» («The Anchor Bible Dictionary»).

Яхуды тарыхчысы Иосифың эсерлеринде Понтиус Пилатусың ады энчеме гезек душ гелйәр. Ол Пилатусың Яхудада хәким болан дөврүнде үч гозгалаң боландыгыны язяр. Яхуды тарыхчысы Филон болса дөрдүнҗи гозгалаң барада язяр. Рим императорлары барада язан Тацит хем Понтиус Пилатусың Тибериниң дөврүнде Исаны хөкүм эдендигини тассыклаяр.

1961-нҗи йылда археологлар Кайсариядакы (Ысрайыл) гадымы Рим театрындан бир даш тапярлар. Онуң йүзүне латын харплар билен: «Яхуданың хәкими Понтиус Пилатус рехимдар худайларың ады билен (шу) Тибериумы багыш эдйәр» дийип язылан (сурата середиң). Ол бина Рим императоры Тибериуса багышланан ыбадатхана болмалы.

2002-нҗи йылың 15-нҗи июлында чыкан «Гаравул диңи» журналының «Окыҗыларың соваллары» атлы макалада уяның сувда чокундырылмадык я-да чокундырылан доганың янында Мукаддес Язгылар окувыны гечирйән махалы яглык даңмалыдыгы барада айдылыпды. Йөне инди бираз үйтгешмелер гиризилди.

Эгер уя сувда чокундырылан доганың янында Мукаддес Язгылар окувыны гечирйән болса, онда хөкман яглык даңмалы я-да ол окувы гечирмеги догандан хайыш эдип билер. Уя эркек кишә табшырылан юмшы берҗай эдйәр. Шол себәпли өйде сувда чокундырылан доган болан ягдайында-да, уя яглык даңмалы. Шейдип, ол Ехованың ёлбашчылык барадакы гөркезмесине хормат гойяндыгыны гөркезйәр (1 Кор. 11:5, 6, 10).

Мукаддес Язгылар окувыны гечирйән уя сувда чокундырылмадык ве янёлдашы болмадык доганың янында яглык даңмаса-да боляр. Эгер шейле ягдайда уяларың ынсыбы эзъет берйән болса, яглык даңып билерлер.