Шеол хем-де хадес нәме?

МУКАДДЕС ЯЗГЫЛАРЫҢ асыл нусгасында еврейче «шеол» ве грекче «адис» сөзлери 70 гезек душ гелйәр. Бу сөзлериң икиси хем өлүм билен багланышыклы уланыляр ве Мукаддес Язгыларың түркменче терҗимесинде «гөр», «довзах» хем-де «өлүлер дияры» дийип терҗиме эдилйәр. Бу сөзлер нәмәни аңладяр? Гел, Мукаддес Язгыларда оларың нәхили маныда уланыляндыгыны гөрели.

Вагызчы 9:10-да шейле дийилйәр: «Сениң барҗак өлүлер диярыңда [шеол] не иш бар, не ой-пикир, не билим, не-де акылдарлык бар». Бу аяда гөрә, шеол диен сөз гарындашларымызың җайланан габрыны аңладярмы? Ёк. Себәби Мукаддес Язгыларда габыр я-да мазар барада айдыланда, онуң асыл нусгасында «шеол» хем-де «адис» сөзи дәл-де, башга сөзлер уланыляр (Барлык 23:7—9; Матта 28:1). Шейле-де шеол бирнәче адамың җайланылян ерини, меселем, машгала мазарчылыгыны я-да өвлүйәни аңлатмаяр (Барлык 49:30, 31).

Онда «шеол» нәме? Мукаддес Язгыларда «шеол» хем-де «хадес» иң улы өвлүйәденем улудыгы айдыляр. Меселем, Ишая 5:14-де: «Өлүлер дияры [шеол] улалды ве агзыны гиң ачды» дийилйәр. Шеол сансыз-саҗаксыз адамлары ювутса-да, ол хич хачан: «Етерлик» диймез (Сүлейманың тымсаллары 30:15, 16). Чәкли адамы сыгдырян өвлүйәден тапавутлылыкда, «өлүлер дияры... дойян дәлдир» (Сүлейманың тымсаллары 27:20). Шеол хич хачан долмаз. Ол дүйпсүз чуңлук. Диймек, шеол я-да хадес ер йүзүнде белли бир ери аңлатмаяр. Башгача айданыңда, өвлүйәлериң хеммесини аңладяр. Өленлериң көпүси шол ерде ятыр.

Мукаддес Язгыларың дирелиш хакдакы таглыматы «шеол» хем-де «хадес» диен сөзлериң манысыны дүшүндирйәр. Мукаддес Язгылардан гөршүмиз ялы,  шеолдакы я-да хадесдәки адамлар дирелер * (Эйюп 14:13; Ресулларың ишлери 2:31; Ылхам 20:13). Худайың Сөзи өлүлер диярында Ехованың гуллукчыларындан башга, Худая гуллук этмедик көп адамларың хем бардыгыны айдяр (Зебур 55:15). Мукаддес Язгыларда «хем догрулар, хем эгрилер өлүмден дирелер» дийилйәр (Ресулларың ишлери 24:15).

[Чыкгыт]