Ехованың Шаятлары тебигы бетбагтчылыга учран доган-уялары голдамак үчин деррев гурамачылыклы херекет эдйәрлер. Шейдип, биз бири-биримизи хакыкатдан сөййәндигимизи гөркезйәрис (Яхя 13:34, 35; 1 Яхя 3:17, 18). Биз бу көмеги нәдип берйәрис?

Мадды тайдан көмек эдйәрис. I асырда Яхудада гүйчли ачлык боланда, Антакиядакы месихчилер имандашларына мадды тайдан көмек этдилер (Ресулларың ишлери 11:27—30). Шу гүнлерем биз башга юртларда яшаян доган-уяларың бетбагтчылыга учрандыкларыны эшиденимизде, ерли йыгнак аркалы олара мадды тайдан голдав берйәрис (2 Коринтослылар 8:13—15).

Зәхмет чекип көмек эдйәрис. Бетбагтчылыгың болан ерлериндәки йыгнак яшулулары доган-уяларың әхлисиниң аман-эсендигини билмек үчин, олары гөзлейәрлер. Көмек берйән комитет бетбагтчылыга учран доган-уяларың иймит, арасса агыз сувы, эгин-эшик ве җай билен үпҗүн эдилмегиниң хем-де олара лукманчылык көмегиниң берилмегиниң аладасыны эдйәр. Җайлары ве Патышалык залларыны дикелтмәге укыплы болан доган-уялар мейлетин зәхмет чекмәге гелйәрлер. Олар ёл чыкдаҗыларыны өзлери төлейәрлер. Гурамамыздакы агзыбирлик ве эгинме-эгин ишләп топлан теҗрибәмиз, бизе бетбагтчылык дөври герекли көмеги бермәге ярдам эдйәр. Биз диңе бир имандашларымыза көмек этмек билен чәкленмән, башга дине уйян адамлары-да голдамага чалышярыс (Галатялылар 6:10).

Дуйгудашлык билдирйәрис ве рухландырярыс. Тебигы бетбагтчылыга учран адамлар дуйгудашлыга мәтәч болярлар. Шейле ягдайда биз «бүтин теселлилер Худайы» болан Еховадан гүйч алярыс (2 Коринтослылар 1:3, 4). Биз адамлара Мукаддес Язгылардакы вадалары ве Худайың Патышалыгының әхли бетбагтчылыклары тизден ёк этҗекдигини шатлык билен гүррүң берйәрис (Ылхам 21:4).

• Ехованың Шаятлары бетбагтчылыга учран адамлара нәдип көмек эдйәрлер?

• Биз бетбагтчылыга учран адамлара нәдип рухы тайдан теселли берйәрис?