«Ýehowanyň Şaýatlary adamlar bilen mähirli gepleşýärdiler. Olar haýwanlary hem gowy görýän ekenler. Bir gün stendli wagyz edip duran Eleýn güjüklerime kökejik berdi. Şondan soň her gezek gezelenje çykanymda güjüklerim stende tarap ylgaýarlar.

Aýlar-günler geçdi. Güjüklerim-ä köke iýip hezil etdi. Menem Ýehowanyň Şaýatlary bilen gürrüňdeş boldum. Ýöne men olaryň dinine uýmaýardym, sebäbi olara ynanmaýardym. Men 70 ýaşy arka atypdym. Ruhanylaryň ikiýüzlüligini köp gördüm, şonuň üçin Mukaddes Kitaby özüm okanymy gowy görýärdim.

Bir gün men şähere gezelenç etmäge çykdym, görsem, Ýehowanyň Şaýatlary ýene-de stendli wagyz edip duran eken. Olar hem mähirli gepleşýärdi. Meniň soraglarymyň hemmesine Mukaddes Kitap esasynda jogap berdiler. Şeýlelikde, men olaryň dininiň dogrudygyna ynanyp başladym.

Bir gün Eleýn menden: „Siz haýwanlary Hudaýyň ýaradandygyna ynanýarsyňyzmy?“ diýip sorady. Men: „Hawa, ynanýaryn“ diýdim. Şonda ol Işaýa 11:6—9-njy aýatlary okap berdi. Aýatlar ýüregime jüňk boldy. Men Mukaddes Kitaby köpräk okasym geldi. Ýöne Ýehowanyň Şaýatlarynyň edebiýatlaryny okamaga ýaýdanýardym.

Her gün diýen ýaly Eleýn we äri Brent bilen gyzykly gürrüňler edýärdik. Olar maňa Injiliň dört Hoş habaryny we Resullar kitabyny okamagy hem-de hakyky mesihçileri nädip tanap bolýandygy barada oýlanmagy maslahat berdiler. Men olaryň aýdyşy ýaly etdim. Şondan köp wagt geçmänkä, Brent we Eleýn bilen Mukaddes Kitap okuwyny geçip başladym. Şol wagt 2016-njy ýylyň tomus paslydy.

Men her hepde Mukaddes Kitap okuwyna we ýygnak duşuşyklaryna sabyrsyzlyk bilen garaşýardym. Men Mukaddes Kitaby okap özümi bagtly duýýardym. Bir ýyldan soň özümi Ýehowa bagyş edip suwa çümdürildim. Häzir men 79 ýaşymda. Ýehowa müňde bir şükür! Ol maňa özüni tanatdy we halkyna goşulmaga kömek etdi».