Ke mafaufau vēia ko ki tatou e i te kakai o Ieliko. Ko te kakai tēnei e i Kanana, ko he fenua e hē tāpuaki ai nā tino ki a Ieova. E nofo ai he fafine ko Laava tona igoa.

I te taimi nae tamaiti ai ia, na fakalogo ia ki nā tala e uiga ki te vaeluaga o te Tai Kukula e Mohe, ma takitaki kehe nā tino Ihalaelu mai Aikupito. Na fakalogo ai ia ki te fehoahoani ki a te ki latou ke manumalo i nā taua ma o latou fili. Kua ia iloa e nofo pili mai nā tino Ihalaelu ki Ieliko!

I he tahi afiafi, na olo ai ni tino Ihalaelu e toka lua e hipai i te kakai. Na pa atu ki lāua ki te fale o Laava. Na valakaulia e ia ke nonofo ma ia. I te po, na iloa ai e te tupu o Ieliko e i ei ni hipai i te kakai ma kua nofo i te fale o Laava. Na uga e te tupu ni tamāloa ke puke mai ki lāua. Na mumuni e Laava nā hipai i te tuākaukau māfolafola o tona fale ma lea atu ki nā tamāloa a te tupu: ‘Nae i ki nei nā hipai, kae kua olo kehe mai te kakai. Kāfai koulua e olo nei, e maua atu ki laua!’ E iloa e koe pe aiheā e puipui ai e Laava nā hipai?​— Auā ko ia e talitonu ki a Ieova ma iloa ka foki e ia te fenua o Kanana ki nā tino Ihalaelu.

Ka ko hēki olo kehe nā hipai mai te fale o Laava, na folafola atu e ki lāua ka fakahao tona ola ma tona kāiga i te taimi e fakaumatia ai ia Ieliko. E ke iloa te mea ka taku atu ki a te ia ke fai?​– E taku atu e ki lāua: ‘Kave te maea kukula tēnei, ma tautau ki tō fāmalama. Kāfai e fai vēia, e haogālemu ia koe ma nā tino uma i tō fale.’ Na fai e Laava nā mea na lea mai ai nā hipai ke fai. E kē iloa pe ko he ā te tahi mea ka tupu?​—

I na aho mulimuli ake, na havavali nā tino Ihalaelu ma tāmilo i te kakai ma heai he piha. Na olo ki latou oi tāmilo i te kakai, e fakafokotahi i te aho. Kae i te aho tona fitu, e fitu nā taimi na tāmilo ai i te kakai. Ma taufōlua leo lalahi ki latou. Ma fakatōkilalo e Ieova nā pā o te kakai. Kae na tū lava te fale na tautau ai te maea kukula i te fāmalama! E kē kitea te fale i te ata?​— Na haoloto Laava ma tona kāiga!

 He ā te akoakoga kua kē maua mai ia Laava?​— Na talitonu ia Laava ki a Ieova auā na lahi nā mea lelei na iloa e ia e uiga ki a Ieova. E talitonu koe ki ei e vē ko Laava?​— E iloa e talitonu koe!