Mo te fia hefulu o tauhaga, na lolomi ma tufa atu e Molimau a Ieova nā fakaliliuga kehekehe o te Tuhi Paia. Kae na iloa e ki matou te manakomia ke lolomi he fakaliliuga fou e hili atu te fehoahoani ki nā tino ke “iloa te  meamoni,” ko te finagalo tēnā o te Atua mo nā tino uma. (1 Timoteo 2:3, 4) Ko tēia lā, na kamata oi tatala i te 1950 ni vaega o te matou fakaliliuga i te gagana fakaonapōnei faka-Peletānia, te New World Translation. Kua fakaliliu te Tuhi Paia tēnei i he auala hako ma te fakamāoni i te hili atu i te 120 gagana.

Na manakomia he Tuhi Paia e faigofie ke malamalama ai. E mahani oi hui nā gagana i te gahologa o taimi, ma e lahi foki nā fakaliliuga e hē manino ma tuai, e faigatā oi malamalama ki ei. Ko tēia, kua maua nā tuhituhiga anamua e hili te hako ma pili atu ki nā tuhituhiga muamua, kua maua nā ikuga lelei ke malamalama atili ai ki nā gagana na tuhia muamua ai te Tuhi Paia, ko te faka-Epelu, faka-Alamaika, ma faka-Eleni.

Na manakomia he fakaliliuga e fakamāoni ki te kupu a te Atua. Na i lo te finau ki nā tuhituhiga na fakaohofia mai e te Atua, ko nā tino fakaliliu Tuhi Paia na tatau ke fakamāoni ki nā tuhituhiga muamua. Kae, i te lahiga o nā fakaliliuga, ko te igoa o te Atua, ko Ieova, e heki fakaaogā i nā Tuhituhiga Paia.

Na manakomia he Tuhi Paia e kavatu te vikiga ki tona Tuhitala. (2 Hamuelu 23:2) I te New World Translation, kua toe tuku te igoa o Ieova ki tona tulaga muamua e 7,000 taimi i nā tuhituhiga kua leva o te Tuhi Paia e vē e fakaata mai i te ata e pito ki lalo. (Halamo 83:18) Ko te ikuga lelei o te fia o nā tauhaga nae hukehuke ma te māelegā, ko te Tuhi Paia tēnei ko he fiafiaga ke faitau ai, auā e manino mai ai nā manatu o te Atua. E tuha pe maua pe hē maua te New World Translation i tau gagana, e ki matou fakamalohia koe ke fai hau mahaniga lelei ke faitau te Kupu a Ieova i aho uma.​—Iohua 1:8; Halamo 1:​2, 3.

• Aiheā na faia ai e ki matou te fakaikuga e manakomia he fakaliliuga fou o te Tuhi Paia?

• Ko he ā te faiga lelei e fai i nā aho uma mo hō he tahi e fofou ke iloa te finagalo o te Atua?