KUNG BAKIT MAHALAGANG IRESPETO ANG SARILI

• Ipinapakita ng pag-aaral na kapag mababa ang tingin ng isa sa sarili niya, mas malamang na masyado siyang mag-alala sa mga bagay-bagay at magkaroon ng depresyon at problema sa pagkain. Mas malaki rin ang tsansang maging alkoholiko siya at gumamit ng droga.

• Kapag may respeto sa sarili ang isa, iniiwasan niyang ikumpara ang sarili niya sa iba. Dahil diyan, mas madali siyang makibagay sa ibang tao at magkaroon ng mga kaibigan. Pero nagiging mapamuna ang isa na walang masyadong respeto sa sarili, kaya nasisira ang kaugnayan niya sa iba.

• Kapag napaharap sa mga problema ang isa na may respeto sa sarili, nananatili siyang matatag. Magkamali man siya, nakapokus pa rin siya sa mga goal niya. Pero kapag walang masyadong respeto sa sarili ang isa, kahit ang maliit na problema ay nagiging malaki sa kaniya. Dahil diyan, mas madali siyang sumusuko.

 ANG PUWEDE MONG GAWIN

Pumili ng mabubuting kaibigan. Laging makisama sa mga taong may respeto sa iyo, iniisip ang kapakanan mo, at magpapatibay sa iyo.

Tulungan ang iba. Kapag mabait ka at tumutulong sa iba—pati na sa mga walang maibibigay na kapalit sa iyo—magiging masaya ka dahil sa pagbibigay mo. Totoo iyan kahit parang hindi nakikita ng iba ang mga ginagawa mo.

Tulungan ang mga anak mo na magkaroon ng respeto sa sarili. Magagawa mo iyan kung hahayaan mo silang solusyunan ang mga problema nila, hangga’t kaya nila. Makakatulong iyan para mas makayanan nila ang mas mahihirap na sitwasyon. Kapag natutuhan nilang gawin iyan, mas magkakaroon sila ng respeto sa sarili hanggang sa tumanda sila.