Johane wa Boraro 1:1-14
1 Nna monna yo o godileng,* ke kwalela mokaulengwe yo o rategang e bong Gaio, yo ke mo ratang thata.
2 Moratwa, ke rapelela gore o tswelele o na le botsogo jo bontle le gore dilo tsotlhe di tswelele di go tsamaela sentle mo botshelong.
3 Gonne ke ne ka itumela fela thata fa bakaulengwe ba ne ba tla mme ba mpolelela* gore o sa ntse o ikanyega mo boammaaruring, e bile ke itumelela gore o sa ntse o tshela go dumalana le boammaaruri.*+
4 Ga go na sepe se se intumedisang* go feta seno: go utlwa gore bana ba me ba sa ntse ba tsamaya mo boammaaruring.+
5 Moratwa, o bontsha gore o a ikanyega ka se o se direlang bakaulengwe, le fa gone e le batswakwa.+
6 Ba boleletse phuthego kafa o ratang ba bangwe ka gone. Fa ba tsamaya, tsweetswee dira bojotlhe go ba thusa ka tsela e e tla itumedisang Modimo.+
7 Gonne ba ne ba ya go rera kwa mafelong a mangwe ka ntlha ya leina la Modimo, ba sa tseye sepe+ mo bathong bao ba ditšhaba.
8 Ka jalo, re patelesega go amogela baeng ba ba ntseng jalo,+ gore re nne badirimmogo mo boammaaruring.+
9 Ke ne ka kwalela phuthego lekwalo, mme Dioterefese, yo o ratang go nna le maemo a ntlha mo gare ga bone,+ o nyatsa sengwe le sengwe se re se buang.+
10 Ke gone ka moo e tla reng ke tla koo ke bo ke baakanya dilo tse a di dirang tsa go anamisa maaka a matala ka rona.*+ Mo godimo ga moo, ga a tlotle bakaulengwe e bile ga a ba amogele;+ mme ba ba batlang go ba amogela, o leka go ba thibela le go ba leleka mo phuthegong.
11 Moratwa, o se ka wa latela sekao sa batho ba ba dirang dilo tse di bosula, mme latela sekao sa batho ba ba dirang dilo tse di molemo.+ Yo o dirang dilo tse di molemo ke wa Modimo.+ Yo o dirang dilo tse di bosula ga a ise a itse Modimo.+
12 Dimeterio o buiwa bontle ke bakaulengwe botlhe e bile tsela e a tshelang ka yone e tlhomamisa seo. Tota e bile, le rona re mmua bontle, mme lo a itse gore se re se buang ke boammaaruri.
13 Go na le dilo di le dintsi tse ke batlang go go di bolelela, mme ga ke batle go go kwalela tsone.
14 Le fa go ntse jalo, ke solofela go go bona mo bogautshwaneng, mme re tla bua re lebane.
E kete o ka nna le kagiso.
Bakaulengwe ba a go dumedisa. Ntumedisetse mokaulengwe mongwe le mongwe.
Dintlha Tse di Kwa Tlase
^ Kgotsa “mogolwane.”
^ Seger., “ba neela bosupi jwa.”
^ Seger., “o tsamaya mo boammaaruring.”
^ Kgotsa gongwe “se se dirang gore ke leboge.”
^ Seger., “a balabala ka rona a dirisa mafoko a a bosula.”
