Dipesalema 69:1-36
Go mokaedi wa “Malômô a Masoma.”* Pesalema ya ga Dafide.
69 Mpoloke tlhe Modimo, ka gonne metsi a tloga a nkgama.+
2 Ke nwetse kwa tengteng mo seretseng, kwa go se nang mmu o o omileng teng.+
Ke tsene mo metsing a a boteng,Mme molatswana o o elelang ka bonako o nkgogotse.+
3 Ke lapisitswe ke go goa;+Mometso wa me o phaphaletse.
Matlho a me a lapisitswe ke go nna ke letetse Modimo wa me.+
4 Ba ba ntlhoileng ke se na molato+Ba bantsi thata go feta meriri ya tlhogo ya me.
Ba ba batlang go mpolaya,E leng baba ba me ba ba boferefere,* ba bantsi.
Ba ne ba mpateletsa go busa se ke neng ke sa se utswa.
5 Wena Modimo, o itse boeleele jwa me,E bile molato wa me ga o a go fitlhegela.
6 Wena Morena Molaodimogolo, Jehofa wa masomosomo,E kete ba ba solofetseng mo go wena ba ka se tlhabiwe ke ditlhong ka ntlha ya me.
E kete ba ba go senkang ba ka se kokobediwe ka ntlha ya me,Wena Modimo wa Iseraele.
7 Ke a kgobiwa ka ntlha ya gago;+Ditlhong di apesitse sefatlhego sa me.+
8 Ke fetogile motho o sele mo go bomorwarre,Motswakwa mo baneng ba ga mmê ba basimane.+
9 Tsela e ke ratang ntlo ya gago ka yone e ntse jaaka molelo mo pelong ya me,*+E bile dilo tse di utlwisang botlhoko tse batho ba ba go kgobang ba di buang di nkwetse.+
10 Fa ke ne ke ikokobetsa ka go itima dijo,*Ke ne ka kgobelwa seo.
11 Fa ke ne ke dira gore letsela la kgetsi e nne diaparo tsa me,Ke ne ka fetoga sengwe sa go sotlwa* mo go bone.
12 Ba ba nnang mo kgorong ya motse ba bua ka nna,E bile matagwa a opela ka nna mo dipineng tsa bone.
13 Mme e kete thapelo ya me e ka tla kwa go wenaKa nako e e amogelesegang Jehofa.+
Ao tlhe Modimo, ka ntlha ya lorato lwa gago lo logolo lo lo sa kgaotseng,Nkarabe ka ditiro tsa gago tsa poloko tse di ikanyegang.+
14 Nkgolole mo seretseng;O se ka wa ntetla gore ke nwele.
Nkgolole mo go ba ba ntlhoilengLe mo metsing a a boteng.+
15 O se ka wa letla morwalela gore o nkgogole,+Kgotsa wa letla metsi a a boteng gore a nkometse,Kgotsa wa letla sediba* gore se tswale molomo wa sone mo godimo ga me.+
16 Nkarabe tlhe Jehofa, ka gonne lorato lwa gago lo lo sa kgaotseng lo molemo.+
Retologela kwa go nna ka ntlha ya kutlwelobotlhoko ya gago e kgolo,+
17 Mme o se ka wa fitlhela motlhanka wa gago sefatlhego.+
Nkarabe ka bonako, ka gonne ke mo matshwenyegong.+
18 A ko o nkatamele mme o nnamole;Nkgolole mo babeng ba me.
19 O itse go kgobiwa ga me le go tlontlololwa ga me le go kokobediwa ga me.+
O bona baba ba me botlhe.
20 Pelo ya me e phatlotswe ke go kgobiwa, e bile ntho ya teng ga e alafege.*
Ke ne ke solofetse go utlwelwa botlhoko, mme go ne go se na ope yo o nkutlwelang botlhoko,+E bile ke ne ke solofetse bagomotsi, mme ga ke a bona bape.+
21 Mme ba ne ba nnaya botlhole* gore e nne dijo tsa me,+E bile ba ne ba nnaya binika gore ke timole lenyora.+
22 Dira gore tafole ya bone e nne serai mo go bone,Le go atlega ga bone go felele ka masetlapelo.+
23 Dira gore matlho a bone a fifale gore ba se ka ba kgona go bona,Mme o dire gore mangole a bone a kgwetlhe* ka metlha.
24 Tshololela tšhakgalo ya gago mo go bone,Mme e kete ba ka tlelwa ke bogale jwa gago jo bo tukang.+
25 Dira gore kampa* ya bone e nne letlotla;Dira gore go se nne le ope yo o nnang mo ditenteng tsa bone.+
26 Gonne ba lelekisa motho yo o mo iteileng,E bile ba nna ba bala ditlhabi tsa batho ba o ba gobaditseng.
27 Oketsa molato wa bone ka molato o mongwe,Mme e kete ba ka se ka ba solegelwa molemo ke tshiamo ya gago.
28 A ba phimolwe mo bukeng ya batshedi,*+Mme e kete ba ka se ka ba kwalwa mmogo le basiami.+
29 Le fa go ntse jalo, ke a boga e bile ke mo ditlhabing.+
Ao tlhe Modimo, e kete maatla a gago a a bolokang a ka ntshireletsa.
30 Ke tla opelela leina la Modimo dipako,E bile ke tla mo tlotlomatsa ka go mo ntshetsa ditebogo.
31 Seno se tla itumedisa Jehofa thata go na le go ntsha ditlhabelo tsa dipoo,Go na le go ntsha dipowana tse di nang le dinaka le ditlhakwana.+
32 Ba ba pelonolo ba tla bona seno ba bo ba itumela.
Lona ba lo senkang Modimo, e kete dipelo tsa lona di ka nna le botshelo gape.
33 Gonne Jehofa o reeditse bahumanegi,+Mme ga a kitla a nyatsa batho ba gagwe ba ba tshwerweng.+
34 A legodimo le lefatshe di mmake,+Mawatle le sengwe le sengwe se se tsamayang mo go one.
35 Gonne Modimo o tla boloka Siona+E bile o tla tsosolosa metse ya Juda,Mme ba tla aga teng ba bo ba e* rua.
36 Ditlogolwana tsa batlhanka ba gagwe di tla e rua,+Mme ba ba ratang leina la gagwe+ ba tla nna mo go yone.
Dintlha Tse di Kwa Tlase
^ Gongwe go tewa seletswa sa megala, mofuta wa mmino kgotsa molodi wa pina, mme gone bokao jwa teng jwa mmatota ga bo itsiwe.
^ Kgotsa “baba ba me kwantle ga lebaka.”
^ Seheb., “Tlhoafalo ya ntlo ya gago e njele.”
^ Kgotsa gongwe “Fa ke ne ke lela e bile ke itima dijo.”
^ Seheb., “ka fetoga seane.”
^ Kgotsa “khuti.”
^ Kgotsa “e bile ke gaufi le go kgobega marapo.”
^ Kgotsa “semela se se botlhole.”
^ Seheb., “o dire gore dinôka tsa bone di rorome.”
^ Kgotsa “kampa e e ageletsweng ka lobota.”
^ Kgotsa “mo bukeng ya botshelo.”
^ Go tewa naga.
